ចិន៖ និស្សិតពេទ្យស្រីវ័យក្មេងជនជាតិចិន មកពីទីក្រុង Jinzhou ខេត្ត Liaoning ប្រទេសចិនម្នាក់ ថ្មីៗនេះទទួលបានការកោតសរសើរជាខ្លាំង នៅលើបណ្តាញសង្គម ក្រោយក្លាហានចូលខ្លួនទៅជួយសង្គ្រោះបុរសវ័យចំណាស់ម្នាក់ ដែលបានខ្យល់គដួលសន្លប់ នៅឯស្ថានីយរថភ្លើង។
ស្រីស្អាតរូបស្រស់ខាងលើនេះ ត្រូវបានគេស្គាល់ឈ្មោះថា Ding Hui គឺជានិស្សិតពេទ្យម្នាក់ នៅសាកលវិទ្យាល័យ Jinzhou Medical University ។
បើយោងតាមប្រភពសារព័ត៌មាន បានឲ្យដឹងថា នៅក្នុងថ្ងៃកើតហេតុនោះ ពោលគឺកាលពីចុងសប្តាហ៍មុននេះ Ding Hui នាងត្រូវបានគេរាយការណ៍ថា បានឈររង់ចាំរថភ្លើង នៅឯទីតាំងចំណតស្ថានីយរថភ្លើង Jinzhou South Railway Station ដើម្បីជិះធ្វើដំណើរត្រលប់ទៅផ្ទះរបស់នាងវិញ។
ខណៈពេលដែលកំពុងរង់ចាំជិះរថភ្លើង Ding នាងក៏ស្រាប់តែឭគេផ្អើលថា មានបុរសវ័យចំណាស់អាយុ៨១ម្នាក់ បានគាំងបេះដូង ដួលសន្លប់នៅតាមផ្លូវដើរក្បែរស្ថានីយ (បុគ្គលិកនៅស្ថានីយរថភ្លើងប្រកាសដាក់មេក្រូ ដើម្បីសុំជំនួយពីគ្រូពេទ្យ) ទើបដោយមិនបង្អង់យូរ Ding នាងក៏បានស្ទុះទៅមើលតែម្តង។ នេះបើយោងតាមការរាយការណ៍ពីកាសែត South China Morning ។
ភ្លាមៗពេលទៅដល់ Ding នាងក៏បានជួយធ្វើចលនាបេះដូង ឬហៅថា CPR ដោយយកដៃសង្កត់ចុះឡើងៗ លើដើមទ្រូងលោកតារងគ្រោះ លក្ខណៈជាការជួយសង្គ្រោះបឋម និងបន្ទាប់មក នាងក៏បានផ្លុំខ្យល់ចូលមាត់លោកតារងគ្រោះ (មាត់ទល់មាត់) ដោយរយៈពេល១០នាទីក្រោយមក បុរសចំណាស់ខាងលើនេះ ក៏បានដឹងខ្លួនវិញ។
Ding ត្រូវបានគេរាយការណ៍ថា នាងបន្តនៅជាមួយនឹងលោកតារងគ្រោះខាងលើនេះ រហូតទាល់តែខាងក្រុមគ្រូពេទ្យមកដល់ ដើម្បីជួយមើលថែគាត់ជាបន្ត ហើយក៏ជាហេតុធ្វើឲ្យ Ding បានខកខានជើងរថភ្លើងធ្វើដំណើររបស់នាងផងដែរ។
ថ្លែងប្រាប់កាសែតក្នុងស្រុក និស្សិតពេទ្យស្រីចិត្តធម៌រូបនេះ បាននិយាយថា៖ «វាគឺជាកាតព្វកិច្ចរបស់ពួកយើង ក្នុងនាមជានិស្សិតពេទ្យ ឬបុគ្គលិកពេទ្យម្នាក់ ដើម្បីជួយសង្គ្រោះដល់អ្នកដែលកំពុងតែស្ថិតក្នុងស្ថានភាពគ្រោះថ្នាក់» ។
តាមការចុះផ្សាយពីសារព័ត៌មានចិន CGTN បានឲ្យដឹងផងដែរថា ក្រោយកើតហេតុ ដើម្បីជាការអរគុណ កូនប្រុសរបស់លោកតារងគ្រោះ ក៏បានជូនសគុណដល់នាង ២ ,០០០យ័ន (ឬប្រហែលជា ២៩៥ដុល្លារអាមេរិក) ចំពោះភាពក្លាហាន និងទឹកចិត្តដ៏ល្អរបស់នាង។ ប៉ុន្តែទោះជាយ៉ាងណាក្តី Ding នាងក៏បានបដិសេធ ដោយមិនទទួលយកលុយនោះឡើយ។
កូនប្រុសលោកតារងគ្រោះបាននិយាយថា៖ «ប្រសិនបើគ្មាននាងទេ ឪពុករបស់ខ្ញុំអាចនឹងស្លាប់ជាមិនខាន..... នាងមិនព្រមទទួលយកលុយដែលជាសគុណខ្ញុំជូននាង ហើយនាងថែមទាំងមិនបានបញ្ចេញឈ្មោះនាងប្រាប់ខ្ញុំទៀត» ។
គួរឲ្យដឹងផងដែរថា ទាល់តែវីដេអូឃ្លីបក្នុងថ្ងៃកើតហេតុ ត្រូវបានបង្ហោះចែកចាយលើបណ្តាញសង្គមទេ ទើបនៅទីបំផុតគេក៏អាចដឹងពីអត្តសញ្ញាណរបស់និស្សិតស្រីខាងលើនេះ។
អ្វីដែលរឹតតែរំភើបចិត្តចំពោះ Ding ផងដែរនោះ ខាងស្ថានីយរថភ្លើង ក៏បានផ្ញើលិខិតមួយទៅដល់សាកលវិទ្យាល័យរបស់នាង ដើម្បីជាការថ្លែងអំណរគុណយ៉ាងជ្រាលជ្រៅ នូវទឹកចិត្តដ៏ថ្លៃថ្លា ក៏ដូចជាសកម្មភាពសប្បុរសរបស់ Ding ជួយដល់អ្នករងគ្រោះពេលស្ថិតក្នុងស្ថានភាពលំបាក ឬគ្រោះថ្នាក់ផងដែរ។
ពិសេសជាងនេះទៅទៀតនោះ Ding នាងក៏ទទួលបានការកោតស្ញប់ស្ញែងយ៉ាងខ្លាំង ពីសំណាក់អ្នកលេងបណ្តាញសង្គមថែមទៀតផង ៕
តើសម្រាប់ប្រិយមិត្តវិញយល់យ៉ាងណាដែរ?
ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]