Liverpool ត្រូវ UEFA ពិន័យ ដោយសាររឿងមួយ

អង់គ្លេស៖ ក្រុម Liverpool ត្រូវបានសហព័ន្ធ UEFA ពិន័យជាទឹកប្រាក់ជាង១០ម៉ឺនដុល្លារអាមេរិក ក្រោយពីពួកគេមិនអាចគ្រប់គ្រងអ្នកគាំទ្របានក្នុងប្រកួតជាមួយ Roma។

សហព័ន្ធ UEFA សម្រេចធ្វើការពិន័យទៅដល់ក្លិប Liverpool នៅពេលដែលអ្នកគាំទ្ររបស់ពួកគេបានបង្កភាពចល្លាចលនៅក្នុងទីក្រុង Rome ប្រទេសអ៊ីតាលី ខណៈដែលក្រុមរបស់គេកំពុងតែប្រកួតជាមួយ Roma ក្នុងជើងទីពីរនៃពានរង្វាន់ Champions League កាលពីដើមខែឧសភាកន្លងទៅ។ 

ក្នុងនោះដែរ ក្រុម Marseille ក៏ត្រូវបានសហព័ន្ធបាល់ទាត់អ៊ឺរ៉ុបពិន័យជាង១០ម៉ឺនដុល្លារអាមេរិកផងដែរ ក្រោយពីអ្នកគាំទ្ររបស់ពួកគេបានវាយប្រហារទៅកាន់អ្នកគាំទ្រក្រុមផ្សេងៗដែលពួកគេត្រូវប៉ះក្នុងពានរង្វាន់ Europa League កាលពីរដូវកាលមុន ដោយក្លិបរបស់បារាំងមួយនេះអាចប្រឈមមុខនឹងការដកសិទ្ធមិនឲ្យលេងក្នុងព្រឹត្តិការណ៍ផ្សេងៗក្នុងទ្វីបអ៊ឺរ៉ុបរហូតដល់ពេញមួយរដូវកាល បើគេរកឃើញថា ក្លិបមិនមានគោលការគ្រប់គ្រងអ្នកគាំទ្រឲ្យបានត្រឹមត្រូវទេ។

គួរឲ្យដឹងថា Liverpool ត្រូវបានសហព័ន្ធ UEFA ពិន័យជារឿយៗ ដោយសារតែសកម្មភាពរបស់អ្នកគាំទ្រពួកគេ ពោលគឺកាលពីឆ្នាំ១៩៨៥ អ្នកគាំទ្រក្លិបហង្សក្រហមមួយនេះបានបង្កភាពចល្លាចលរហូតដល់មានការបាត់បង់ជីវិតមនុស្ស៣៩នាក់ផងដែរ (Heysel Stadium disaster) ដោយជាលទ្ធផល UEFA បានពិន័យដកសិទ្ធិក្លិបនៅក្នុងប្រទេសអង់គ្លេសទាំងអស់ មិនឲ្យចូលប្រកួតក្នុងពានរង្វាន់ក្នុងទ្វីបអ៊ឺរ៉ុបរហូតដល់៥ឆ្នាំ ខណៈ Liverpool ត្រូវដកសិទ្ធដល់ទៅ៦ឆ្នាំ៕