រាជធានីភ្នំពេញ ៖ ចោរប្រដាប់អាវុធ២នាក់បានប្លន់បុរសជាងទង និងជាអាជីវករលក់មាស-ប្តូរប្រាក់ និងបាញ់ បណ្តាលឱ្យស្លាប់នៅនឹងកន្លែងម្នាក់បង្កឱ្យមានការភ្ញាក់ផ្អើល និងរន្ធត់កាលពីវេលាម៉ោង៥ល្ងាច ថ្ងៃទី១៤ មីនា ២០១២ នៅមុខឱសថស្ថានសុភមង្គល អគារលេខ៩៨Eo ផ្លូវលេខ១១៨ សង្កាត់ផ្សារចាស់ ខណ្ឌដូនពេញ ខណៈអាជីវកររូបនោះប្រមូលគ្រឿង អលង្ការមាន មាស ប្លាទីន ពីតូបលក់ដូរ ដាក់កាបូបមួយធ្វើដំណើរដោយថ្មើរជើងបត់ចូលតាមច្រកឌឿងហែមឆ្ពោះទៅកាន់លំនៅឋានដូចសព្វមួយដង ហើយចោរពីរនាក់ក៏ស្ទុះចេញភ្ជង់កាំភ្លើងប្លន់តែម្តង ។ បុរសជាងទង និងជាអាជីវករលក់មាស-ប្តូរប្រាក់ដែលស្លាប់ដោយសារគ្រាប់កាំភ្លើងចោរ ខណៈសមត្ថកិច្ចអសមត្ថភាពនេះឈ្មោះទិន នាថ អាយុ៣៥ឆ្នាំ ស្នាក់នៅផ្ទះតាមផ្លូវឌឿងហែមចម្ងាយប្រមាណជាង២០០ម៉ែត្រ ពីផ្សារចាស់ទីកន្លែងដែលអាជីវកររូបនេះលក់ដូរ ហើយនៅវេលាល្ងាចនោះ គាត់បានប្រមូលគ្រឿងអលង្ការដាក់កាបូបដើរដោយថ្មើរជើងចាកចេញពីតូបលក់ដូរឆ្ពោះទៅផ្ទះ ។ លុះដល់ផ្លូវបត់ចូលតាមច្រកឌឿងហែម ស្រាប់តែមានចោរ២នាក់ស្ទុះចេញមកភ្ជង់ប្លន់បុរសអាជីវកររូបនោះតែម្តង ។ ក្រុមចោរបានព្យាយាមដណ្តើមយកកាបូបប្រាក់ គ្រឿងអលង្ការពីបុរសអាជីវករ ប៉ុន្តែដោយសារតែបុរសអាជីវករមិនព្រមប្រគល់ឱ្យចោរ ក៏កើតការប្រវាយប្រតប់គ្នាមួយប្រាវ ហើយភ្លាមនោះចោរម្នាក់បានបាញ់ទៅលើបុរសអាជីវករឥតញញើតដៃប្រហែល៤ទៅ៥គ្រាប់គឺត្រូវ១គ្រាប់ចំបេះដូង បណ្តាលឱ្យដេកដួលក្នុងថ្លុកឈាមស្លាប់នៅនឹងកន្លែងគួរឱ្យរន្ធត់...ចំណែកក្រុមចោរបានហក់ឡើងជិះម៉ូតូគ្នារបស់គេរត់គេចខ្លួនបាត់ ហាក់សើចចំអកដាក់សមត្ថកិច្ចដែលអសមត្ថភាពគ្រប់គ្រងសន្តិសុខមូលដ្ឋាន។ អ្នកក្រុងភ្នំពេញ រិះគន់ថា ចុងឆ្នាំ២០១១ និងដើមឆ្នាំ២០១២ នេះ ចោរកម្មបានកំរើកឡើងគួរឱ្យភ័យខ្លាចណាស់ ហើយមានចរិតកាចសាហាវទៀតផង គឺឱ្យតែប្លន់ភាគច្រើនតែងតែបាញ់សម្លាប់ ។ ការកើតអំពើប្លន់ញឹកញាប់នេះដោយសារតែចោរសម្លឹងឃើញថា សមត្ថកិច្ចចាប់ផ្តើមអសមត្ថភាពហើយ ទើបពួកគេចេញប្លន់យ៉ាងសប្បាយបែបនេះ ។ អំពើប្លន់ទាំងនេះ បណ្តាលមកពីកត្តាច្រើនយ៉ាងដូចជា គ្រប់គ្រងសណ្តាប់ធ្នាប់មិនហ្មត់ចត់, ការពារសន្តិសុខមិនហ្មត់ចត់, សមត្ថកិច្ចខ្វះការទទួលខុសត្រូវ, គ្រប់គ្រងអាវុធជាតិផ្ទុះមិនច្បាស់លាស់, អនុវត្តច្បាប់ចាប់ចងខ្សោយ, បើថាខ្លាំងពូកែ គឺខ្លាំងខាងបិទហាងពេលមានជនអគតិបាញ់បោះសេរី ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
