ទុក្ខធំផ្ទួនៗ! ទឹកជំនន់មិនទាន់ផុតផង ឥឡូវជប៉ុនមកជួបបញ្ហាមួយនេះទៀត

ជប៉ុន៖ ប្រជាជនជប៉ុនទូទាំងប្រទេស ត្រូវបានដាស់តឿនឱ្យមានការប្រុងប្រយ័ត្នចំពោះរលកកម្តៅដ៏ក្តៅខ្លាំង ដែលបានសម្លាប់មនុស្សប្រមាណ ៣០ នាក់មកហើយ។

គួរឱ្យដឹងថា មនុស្សរាប់ពាន់នាក់ទៀតបានស្វែងរកការព្យាបាលនៅមន្ទីរពេទ្យ ចំពោះអាការដែលបណ្តាលមកពីកម្តៅ ក្នុងរយៈពេលពីរសប្តាហ៍កន្លងទៅនេះ។ 

សូមបញ្ជាក់ថា សីតុណ្ហភាពបានកើនដល់ ៤០.៧ អង្សារនៅភូមិភាគកណ្តាលនៃប្រទេស កាលពីដើមសប្តាហ៍ ខណៈនៅទីក្រុងក្យូតុ សីតុណ្ហភាពបាននៅទ្រឹង ៣៨ អង្សារក្នុងរយៈពេល ៧ ថ្ងៃជាប់ៗគ្នាជាលើកដំបូង តាំងពីកម្តៅដែលជាប់ក្នុងកំណត់ត្រានេះ បានចាប់ផ្តើមនៅសតវត្សរ៍ទី ១៩។ 

ដើម្បីទប់ទល់នឹងស្ថានភាពនេះ ក្រសួងអប់រំរបស់ជប៉ុនបានណែនាំសាលារៀននានា ឱ្យចាត់វិធានការម៉ត់ចត់ដើម្បីបង្ការការរងគ្រោះដោយសារកម្តៅ ក្រោយពីក្មេងប្រុសអាយុ ៦ ឆ្នាំម្នាក់បានស្លាប់ បន្ទាប់ពីចូលរួមសកម្មភាពក្រៅថ្នាក់មួយ នៅខេត្តអៃឈិ កាលពីថ្ងៃអង្គារ៍។ 

បន្ថែមពីនេះ ភ្នាក់ងារឧតុនិយមរបស់ជប៉ុន បានជម្រុញឱ្យប្រជាជនពិសាទឹកឱ្យបានគ្រប់គ្រាន់ ចៀសវាងការខ្សោះជាតិទឹក។ 

អ្វីដែលជាបញ្ហាកាន់តែធំទៀតនោះគឺ សីតុណ្ហភាពដ៏ក្តៅហួតហែងនេះ ក៏បង្កជាបញ្ហាស្មុគស្មាញដល់ការខិតខំជួយសង្គ្រោះ នៅប៉ែកខាងលិចប្រទេសផងដែរ ខណៈអ្នកស្ម័គ្រចិត្តជាច្រើននាក់ ពិបាកទ្រាំនឹងកម្រិតកម្តៅនេះណាស់៕ 

តើប្រិយមិត្តយល់យ៉ាងណាដែរ?