ខេត្តត្បូងឃ្មុំ ៖ គិតរហូតមកដល់ល្ងាចថ្ងៃទី២១ កក្កដា ២០១៨ គ្រោះធម្មជាតិកើតឡើងនៅក្នុងរដូវវស្សាដោយបាក់ច្រាំងទន្លេបង្កឲ្យលំនៅឋានរបស់ប្រជាពលដ្ឋនៅតាមជួរដងទន្លេមេគង្គត្រូវរុះរើចំនួន៥ខ្នង ដំណាំពោតជាង៥០០ហិកតាត្រូវទឹកជន់លិច។ តែមិនទាន់មានសេចក្តីរាយការណ៍ពីពលរដ្ឋណាម្នាក់រងគ្រោះថ្នាក់ដល់អាយុជីវិតនោះទេ ។
តាមស្ត្រីមេម៉ាយម្នាក់ឈ្មោះ កើត អឿន អាយុ៦១ឆ្នាំ នៅភូមិទួលគរ ឃុំទន្លេបិទ ស្រុកត្បូងឃ្មុំ ប្រាប់ថា ផ្ទះរបស់គាត់ជាផ្ទះឈើដោយសាងនៅជាប់ដងទន្លេមេគង្គជាច្រើនឆ្នាំមកហើយ ជាមួយគ្នានោះឲ្យតែដល់រដូវវស្សាម្តងៗតែងតែព្រួយបារម្ភបាក់ច្រាំងនៅក្រោយផ្ទះ កន្លងទៅផ្ទះគាត់ធ្លាប់ជួលគេរុញ២លើកហើយ ព្រោះតែច្រាំងបាក់មកជិតដល់ផ្ទះ ។
ស្ត្រីមេម៉ាយបន្តថា លុះមកដល់ខែកក្កដានេះច្រាំងបានយារយីបាក់បន្តចូលមកក្នុងទៀត ហើយទឹកទន្លេក៏ហូរកួចត្របាញ់ផងដែរ ។ ហេតុតែជីវភាពខ្វះខាតនោះគាត់ត្រូវបានអាជ្ញាធរឃុំទន្លេបិទ នគរបាល អាវុធហត្ថជាច្រើននាក់នាំគ្នាមកជួយរុញរំកិលផ្ទះរបស់គាត់ឲ្យនៅឆ្ងាយពីច្រាំងទន្លេ ដើម្បីការពារកុំឲ្យបាក់ធ្លាក់ចូលទឹក ។ ចាប់តាំងពីបាក់ច្រាំងបន្តបន្ទាប់មកដល់ពេលនេះ បាក់អស់ជាង២០០ម៉ែត្រហើយ សព្វថ្ងៃផ្ទះនៅតែពីរនាក់ម្តាយនិងកូនស្រីប៉ុណ្ណោះ ចំណែកកូនៗផ្សេងៗទៀតចំនួន៥នាក់ ទៅរស់នៅស្រុកឆ្ងាយៗ ។
លោក ហេង ពិសិដ្ឋ ប្រាប់ថា ចាប់តាំងពីទឹកទន្លេមេគង្គហក់ឡើងបានធ្វើឲ្យទឹកហូរចូលតាមបឹងបួរ និងព្រែក ក្នុងនោះស្រុកក្រូចឆ្មារ និងស្រុកត្បូងឃ្មុំបានធ្វើឲ្យដំណាំពោតត្រូវរងការលិចលង់អស់ប្រមាណ៥០០ហិកតា ចំណែកដំណាំរួមផ្សំផ្សេងទៀតកំពុងតែចាត់ឲ្យមន្ត្រីក្រោមឱវាទចុះស្រង់ទិន្នន័យផងដែរ។
រីឯលោកឧត្តមសេនីយ៍ទោ បែន រ័ត្ន វិញមានប្រសាសន៍ថា គិតរហូតមកដល់ល្ងាចថ្ងៃទី២១ កក្កដា មិនទាន់មានផ្ទះរបស់ពលរដ្ឋផ្សេងត្រូវរុះរើទៀតទេ ដោយសារការបាក់ច្រាំងទន្លេកំរិតទឹកទន្លេមិនទាន់ដល់កំរិតឲ្យប្រុងប្រយ័ត្ននូវឡើយទេ។ រូបលោកក៏ចាត់ឲ្យកម្លាំងអន្តរាគមន៍ចុះទៅកាន់ស្រុកជាប់ដងទន្លេរួចរាល់ហើយ ដើម្បីជួយពលរដ្ឋ និងត្រៀមកម្លាំងសម្រាប់ការពារនៅតាមការិយាល័យបោះឆ្នោតផងដែរ។
លោកឧត្តមសេនីយ៍ទោបន្តទៀតថា ហើយផ្លូវតាមដងទន្លេឃុំទន្លេបិទទៅជីហែ ស្រុកកោះសូទិន មិនអាចទៅបានទេព្រោះទឹកបានឡើងលិចអស់ហើយ ត្រង់ព្រែកតាខ្វាន់។ ប្រសិនបើចង់ទៅជីហែ ត្រូវធ្វើដំណើរវាងតាមផ្លូវសែនតស៊ូនឹងទៅដល់ហើយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
