អង់គ្លេស៖ បន្ទាប់ពីធ្វើការចរចាគ្នាអស់ជិតមួយម៉ោងរួចមក ខ្សែប្រយុទ្ធរបស់ក្លិបមាន់ខ្នាយមាស Tottenham Hotspur កីឡាករ Son Heung-min បានសម្រេចចិត្តបន្តចុះកុងត្រាថ្មី ជាមួយក្លិបដែលមានរយៈពេល ៤ឆ្នាំបន្តទៀត ដោយមិនខ្វាយខ្វល់អំំពីរឿងដែលរូបគេត្រូវបំពេញកាតព្វកិច្ចយោធា។
កុងត្រាថ្មីរបស់ប្រធានក្រុមជម្រើសជាតិកូរ៉េខាងត្បូងរូបនេះ គឺមានសុពលភាពរហូតដល់រដូវកាល ២០២២-២០២៣។ នៅក្នុងក្របខ័ណ្ឌ Premier League រដូវកាល ២០១៧-២០១៨ ខ្សែប្រយុទ្ធវ័យ ២៦ ឆ្នាំរូបនេះ អាចបង្ហាញខ្លួនឲ្យក្លិបបានចំនួន ៥២ ប្រកួត និងស៊ុតបញ្ចូលទីបាន ១៨ គ្រាប់ ដោយជួយឲ្យក្លិបមាន់ខ្នាយមាសរបស់អង់គ្លេសមួយនេះ រក្សាទីតាំងនៅក្នុងចំណាត់ថ្នាក់ទី ៣ នៃតារាងលីកកំពូលរបស់អង់គ្លេស រហូតដល់បញ្ចប់រដូវកាលផងដែរ។
គួរឲ្យដឹងដែរថា ក្រោយពីខ្សែប្រយុទ្ធរបស់ក្រុមកូរ៉េខាងត្បូងរូបនេះ បានបញ្ចប់ភារកិច្ចនៅក្នុងព្រឹត្តិការណ៍ពានរង្វាន់បាល់ទាត់ពិភពលោកឆ្នាំ ២០១៨ រួចមក រូបគេបានបង្ហាញទម្រង់លេងយ៉ាងល្អ ដោយអាចបំបាក់ក្រុមជម្រើសជាតិអាល្លឺម៉ង់ ក្នុងលទ្ធផល ២-០ នៅក្នុងវគ្គចែកពូលកន្លងទៅ។
មិនត្រឹមតែប៉ុណ្ណោះ បើក្រឡេកទៅមើលការប្រកួតរបស់គេ នៅក្នុងលីកកំពូលរបស់ប្រទេសអង់គ្លេសវិញ គឺគេក៏ធ្វើបានល្អដូចគ្នា ជាពិសេសនៅក្នុងការប្រកួតនីមួយៗ គេសង្កេតឃើញថា ខ្សែប្រយុទ្ធរូបនេះ បានសហការគ្នាដើម្បីស្វែងរកគ្រាប់បានយ៉ាងល្អ ជាហេតុដែលធ្វើឲ្យក្លិបសម្រេចចុះកុងត្រាបន្ត ជាកីឡាកររូបនេះតែម្តងទៅ។
គួរឲ្យដឹងបន្ថែមទៀតថា នៅក្នុងព្រឹត្តិការណ៍ FIFA World Cup ២០១៨ ខ្សែប្រយុទ្ធ Son អាចស៊ុតបញ្ចូលទីបាន ២ គ្រាប់ ដែលគ្រាប់ទី១ ពេលប៉ះជាមួយម៉ិកស៊ិក និងគ្រាប់ទី ២ គឺពេលគេប្រកួតជាមួយអាល្លឺម៉ង់នៅក្នុងវគ្គ Group Stage ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]