បរទេស៖ ក្លិប Ajax Amsterdamsche បានធ្វើការឆ្លើយតបទៅកាន់ក្លិបអ្នកមានបុណ្យ Barcelona កាលពីយប់មិញនេះថា ពួកគេនឹងមិនលក់ខ្សែការពារ Matthijs de Ligt និង ខ្សែបម្រើ Frenkie de Jong ឲ្យនោះឡើយទោះបីជាក្លិបយក្សនៅអេស្ប៉ាញមួយនោះឲ្យតម្លៃថ្លៃប៉ុណ្ណាក៏ដោយ។
គ្រូបង្វឹកលោក Erik ten Hag បាននិយាយថា៖ «យើងនឹងមិនលក់ Frenkie នៅក្នុងរដូវកាលដោះដូរកីឡាករលើកនេះនោះទេ ចំណែកឯ Matthijs ក៏ដូចគ្នាដែរ។ ទោះបីជាក្លិប Barcelona ចាប់អារម្មណ៍នឹងបានទាក់ទងមកយើងក្តី។ ពីព្រោះថាយើងកំពុងតែជួបបញ្ហាកីឡាករផងដែរ នៅក្នុងពេលនេះគឺយើងចង់រក្សាកីឡាករល្អរបស់យើងទុកសិនដើម្បីឲ្យពួកគេបាននៅជួយក្រុមមួយរយះទៀតសិន។ បើទោះជាគេចង់បានយ៉ាងណាក្តី ក៏កីឡាករទាំងពីរខាងលើ គឺជាកីឡាករដែលក្លិបចាំបាច់ត្រូវរក្សាពួកគេទុករហូតដល់បញ្ចប់រដូវកាលក្រោយនេះសិន»។
គ្រូបង្វឹកវ័យ ៤៨ ឆ្នាំរូបនោះបន្តថា៖ «Frenkie de Jong, Donny van de Beek និង Matthijs de Ligt គឺមិនត្រូវបានក្លិបលក់ពួកគេចេញនោះឡើយ នៅក្នុងរដូវកាលដោះដូរកីឡាករលើកនេះ ទោះជាមានក្លិបជាច្រើនឲ្យតម្លៃថ្លៃប៉ុនណាក៏។ ពួកគេនឹងត្រូវចូលរួមជាយើងយ៉ាងហោចណាស់ក៏ ៤០ ប្រកួតទៀតសម្រាប់រដូវកាល ២០១៨-១៩ នេះសិនទើបយើងនិងពិចារណាម្តងទៀត»។
សូមបញ្ជាក់ផងដែរថា ខ្សែបម្រើ Frenkie de Jong បានបង្ហាញទម្រង់លេងបានយ៉ាងល្អនៅក្នុងក្លិបហ៉ូឡង់មួួយនេះ។ កីឡាករវ័យ ២១ ឆ្នាំរូបនេះធ្លាប់បង្ហាញខ្លួនឲ្យក្លិបសរុប ២៦ ដងកាលពីរដូវកាលមុន។
ចំណែកខ្សែការពារ Matthijs de Ligt វិញក៏បានបង្ហាញទម្រង់លេងយ៉ាងល្អមិនធម្មតាដែរឲ្យក្លិប។ ទោះបីជាគេមានវ័យក្មេងទើប ១៨ ឆ្នាំក៏ពិតមែនហើយកាលពីរដូវកាលមុននេះកីឡាកររូបនេះបង្ហាញខ្លួនបាន ៣៧ ប្រកួតហើយស៊ុតបញ្ចូលទីបាន ៣ គ្រាប់ឲ្យក្លិបផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
