អង់គ្លេស៖ ក្លិបបាល់ទាត់ហ្សងក្រហម Liverpool បានដាក់សំណើជាថ្មីដើម្បីទិញយក អ្នកចាំទី Alisson Becker ពីក្លិប Roma ក្នុងតម្លៃមួយមិនគួរឲ្យជឿ គឺប្រមាណជា ៦២លានផោន (ជាង ៨២ លានដុល្លារអាមេរិក) ដែលជាតម្លៃមួយខ្ពស់បំផុតក្នុងប្រវត្តិសាស្រ្តមិនធ្លាប់មានសម្រាប់អ្នកចាំទី។
គួររម្លឹកថា កំណត់ត្រាចាស់ដែលថ្លៃបំផុតរបស់អ្នកចាំទី Gianluigi Buffon កាលពី១៧ ឆ្នាំមុនដែលរូបគេបានផ្ទេរពីក្លិប Parma ទៅកាន់ក្លិប Juventus ក្នុងតម្លៃ ៣២,៦លានផោន(ជាង ៤២ លានដុល្លារអាមេរិក) ហើយក្រោយមកត្រូវបំបែកដោយ Ederson ដែលផ្ទេរពីក្លិប Benfica ទៅ Manchester City ក្នុងតម្លៃ ៣៤,៩លានផោន(ជាង ៤៥ លានដុល្លារអាមេរិក)។
បើសិនជាក្លិបហង្សក្រហមពិតជាជោគជ័យក្នុងការនាំយកអ្នកទីក្រុមជម្រើសជាតិប្រេសុីលរូបនោះមកកាន់ទឹកដីអង់គ្លេសមែននោះ កីឡាករវ័យ ២៥ ឆ្នាំខាងលើនឹងក្លាយជាអ្នកចាំទីដែលមានតម្លៃថ្លៃបំផុតមិនធ្លាប់មាននៅលើលោក។
យ៉ាងណាមិញ ក្លិប Roma នៅមិនទាន់ព្រមព្រៀងលក់ក្នុងតម្លៃខាងលើនោះទេ ពោលគឺក្លិបដែលមានមូលដ្ឋាននៅទីក្រុងរ៉ូមមួយនេះ ទាមទាររហូតដល់ ៦៦ លានផោន (ជាង ៨៦ លានដុល្លារអាមេរិក) ទើបព្រមលក់អ្នកចាំទីដែលទើបនឹងបញ្ចប់ភារកិច្ចពី World Cup ២០១៨ ថ្មីៗនេះ។
គួរឲ្យដឹងថា ក្លិប ហ្សងក្រហម Liverpool កាលពីកន្លងទៅក៏ធ្លាប់បានចាយលុយទិញ ខ្សែការពារ Virgil Van Dijk ពីក្លិប Southampton ក្នុងតម្លៃបំបែកកំណត់ត្រាខ្សែការពារថ្លៃបំផុតលើលោកផងដែរ គឺរហូតដល់ ៧៥ លានផោន(ជាង ៩៨ លានដុល្លារអាមេរិក)៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
