គ្រូក្រូអាតថា ទម្លាក់អង់គ្លេសបាន គឺដោយសារពួកគេ និងប្រព័ន្ធផ្សព្វផ្សាយ មើលស្រាលក្រុមលោកពេក

រុស្ស៊ី៖ គ្រូបង្វឹកក្រុមជម្រើសជាតិក្រូអាត លោក Zlatko Dalic បានអះអាងថា ការឈ្នះទៅលើក្រុមជម្រើសជាតិអង់គ្លេស កាលពី២ថៃ្ងមុន គឺដោយសារក្រុមដែលដឹកនាំដោយលោក Gareth Southgate មើលស្រាលក្រុមលោកពេក គួបផ្សំនិងប្រព័ន្ធផ្សព្វផ្សាយដែរ។ 

ក្រូអាត នឹងត្រូវរៀបចំខ្លួនដើម្បីតទល់នឹងក្រុមជម្រើសជាតិបារាំង នៅថៃ្ងអាទិត្យខាងមុខនេះ ក្រោយពីយកឈ្នះក្រុមតោកំណាចក្នុងម៉ោងបន្ថែម។

គ្រូបង្វឹកវ័យ ៥១ឆ្នាំ ក៏បានសរសើរដល់កីឡាកររបស់លោកដូចជា Luka Modric និងខែ្សការពារ Dejan Lovren ថាអាចរារាំងអង់គ្លេស នៅពេលដែលពួកគេធើ្វការសម្រុកម្ដងអំឡុងការប្រកួតនោះ។  

«ខ្ញុំជឿថា យើងសាកសមនឹងឈ្នះការប្រកួត។ ពួកយើងជាក្រុមដែលល្អជាងពួកគេនៅតង់ទី២ និងម៉ោងបន្ថែម។ ពួកយើងតែងតែគោរពនូវដៃគូរបស់យើង ហើយយើងក៏រំពឹងថាពួកគេនឹងធើ្វការគោរពយើងវិញដែរ។ ប្រហែលជាក្រុមអង់គ្លេស និងប្រព័ន្ធផ្សព្វផ្សាយមួយចំនួន មិនបានបង្ហាញនូវការគោរពទៅដល់ក្រុមជម្រើសជាតិក្រូអាតនោះទេ» សម្ដីលោក Dalic៕