បារាំង៖ អ្នកចាំទីក្រុមជម្រើសជាតិបារាំងកីឡាករ Hugo Lloris បានរំលឹកថាការចាញ់របស់បារាំងក្នុងវគ្គផ្ដាច់ព្រ័ត្រ Euro កាលពីឆ្នាំ ២០១៦ កន្លងទៅ គឺជាមេរៀនមួយដែលអាចឲ្យមិត្តរួមក្រុមរបស់គេ បន្តយកចិត្តទុកដាក់បន្ថែមទៀតព្រោះពួកគេមិនចង់ឲ្យប្រវត្តិសាស្រ្តដ៏អាក្រក់នោះកើតឡើងម្តងទៀតនោះទេ។
ប្រធានក្រុមជម្រើសជាតិបារាំងរូបនេះ បានថ្លែងប្រាប់អ្នកសារព័ត៌មានថា៖ «ខ្ញុំមានអារម្មណ៍ដូចជាអស្ចារ្យខ្លាំងណាស់ ដែលយើងអាចឡើងមកដល់វគ្គផ្ដាច់ព្រ័ត្រ World Cup ២០១៨ បានប៉ុន្តែយើងធ្លាប់ចាញ់វគ្គផ្ដាច់ព្រ័ត្រម្ដងរួចមកហើយកាលពី ២ឆ្នាំមុន ដូច្នេះហើយមេរៀនទាំងនេះទើបយើងមានថ្ងៃនេះ តែពួកយើងក៏ត្រូវបន្តយកចិត្តទុកដាក់ឲ្យមែនទែនព្រោះក្រូអាតជាក្រុមខ្លាំងមួយ»។
អ្នកចាំទីក្លិប Tottenham Hotspur រូបនោះក៏បានបន្តថា៖ «ការជឿជាក់លើខ្លួនឯងគឺជារឿងមួយដ៏សំខាន់។ ក្នុងជម្រើសជាតិ កម្រិតនៃការជឿជាក់ គឺត្រូវតែមានភាពប្រកដប្រជាមួយ។ យើងនៅសល់ការប្រកួតមួយទៀតក្នុងកម្មវិធី ហើយប្រកួតនោះគឺសំខាន់ណាស់ ក្នុងអាជីពជាអ្នកចាំទីរបស់ខ្ញុំ»។
គួរឲ្យដឹងផងដែរថា Lloris ក៏ថាទោះបីជាពួកគេមានកីឡាករក្មេងៗជាច្រើនក្នុងក្រុមជម្រើសជាតិបារាំងក្នុងពេលបច្ចុប្បន្នមែន តែស្តាយដែលពួកគេមិនបានចូលរួមលេងក្នុង Euro ២០១៦ កុំគេមិនចាញ់នោះទេ។
អ្នកចាំទីរូបនេះថា គេនឹងអាចប្រើប្រាស់បទពិសោធន៍ក្នុងផ្លូវវិជ្ជមានរបស់គេដើម្បីធ្វើការណែនាំដល់កីឡាករក្មេងៗក្នុងក្រុមទាំងអស់ ដើម្បីលើកពានឲ្យបានក្នុងឆ្នាំ ២០១៨ នេះ។
សូមបញ្ជាក់ថា កាលពីព្រឹត្តិការណ៍បាល់ទាត់ Euro ២០១៦ ដែលធ្វើឡើងក្នុងទឹកដីរបស់ពួកគេនោះ បារាំងបានចាញ់ក្រុមជម្រើសជាតិព័រទុយហ្គាល់ក្នុងលទ្ធផល ១-០ ក្នុងវគ្គផ្ដាច់ព្រ័ត្រកាលពី ២ឆ្នាំមុន ហើយការប្រកួតវគ្គផ្តាច់ព្រ័ត្រក្នុងព្រឹត្តការណ៏បាល់ទាត់ពិភពលោកនេះវិញបារាំង នឹងត្រូវប៉ះក្រុមកំពុងឡើងជើងក្រូអាតនៅថ្ងៃទី ១៥ ខែកក្កដាខាងមុខនេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
