ប្រេសុីល៖ សហព័ន្ធបាល់ទាត់ប្រទេសប្រេស៊ីលដែលហៅកាត់ថា (CBF) បានថ្កោលទោសជុំវិញរឿងដែលមានអ្នកគំរាមសម្លាប់ និងរើសអើងពូជសាសន៍ដល់ខ្សែបម្រើការពារ Fernandinho និងគ្រួសាររបស់គេ ក្រោយពីចាញ់ប៊ែលហ្ស៊ិក ២-១ ក្នុងវគ្គ ៨ ក្រុមចុងក្រោយក្នុងព្រឹត្តិការណ៍បាល់ទាត់ពិភពលោកឆ្នាំ ២០១៨ នេះ។
ក្រុមម្ចាស់ជើងឯក ៥ សម័យកាលប្រេស៊ីលបានភ្លាត់ចាញ់ក្រុមប៊ែលហ្ស៊ិកក្នុងលទ្ធផល ២-១ នៅក្នុងទីក្រុង Kazan កាលពីថ្ងៃសុក្រកន្លងទៅ ហើយក្នុងចំណោម ២គ្រាប់ជ័យជម្នះរបស់ប៊ែលហ្ស៊ិកក៏មាន ១គ្រាប់របស់ Fernandinho ផងដែរ។ ហើយ ១ គ្រាប់នោះគឺកើតឡើងដោយសារតែរូបគេបានលោតទៅតែតបាល់ ធ្វើឲ្យចូលទីខ្លួនឯង ក្រោយមកកីឡាករ Kevin De Bruyne បានទាត់បាល់ទម្លុះសំណាញ់ទីយ៉ាងល្អ នឹងបានទម្លាក់ប្រេស៊ីលត្រឹមវគ្គ ៨ ក្រុមចុងក្រោយក្នុងព្រឹត្តិការណ៍ World Cup ឆ្នាំ ២០១៨។
ក្រោយពីការចាញ់នេះដែរ សហព័ន្ធបាល់ទាត់ប្រទេសប្រេស៊ីលបានបង្ហាញការរិះគន់ចំពោះការរើសអើងពូជសាសន៍ ដោយពួកគេបានសរសេរការពារខ្សែបម្រើការពាររបស់ក្លិប Manchester City រូបនេះថា៖ «CBF មិនអាចទទួលយកការវាយប្រហាររើសអើងពូជសាសន៍លើ Fernandinho និងគ្រួសារពួកគេបាននោះទេ។ បាល់ទាត់គឺតំណាងឲ្យការរួបរួមគ្នា មិនប្រកាន់ពណ៌សម្បុរ, ភេទ, វប្បធម៌, សាសនានិងមនុស្ស។ ពួកយើងនៅជាមួយអ្នក Fernandinho។ ការរើសអើងពូជសាសន៍នឹងមិនអាចទៅរួចនោះទេ»។
គួរឲ្យដឹងផងដែរថា មានអ្នកប្រើប្រាស់ប្រព័ន្ធផ្សព្វផ្សាយសង្គមមួយចំនួនបានផ្ញើរូបសត្វស្វាទៅកាន់់ Fernandinho ដោយបង្ហាញពីការរើសអើងពូជសាសន៍ទៅលើរូបគេ ខណៈពេលដែលអ្នកគាំទ្រខ្លះទៀតបានគំរាមថានឹងសម្លាប់រូបគេទៀតផង។ ក្រៅតែពីអំពើខាងលើ ស្រាប់តែបែកធ្លាយវីដេអូអ្នកគាំទ្រប្រេស៊ីលនាំគ្នាឈរនៅតាមដងផ្លូវកាន់ សុទ្ធតែដុំថ្ម ពងមាន់ និងវត្ថុផ្សេងៗដើម្បីចាំគប់ទៅលើឡានរបស់ក្រុមជម្រើសជាតិប្រេសុីល៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]