Paulinho សម្រេចចិត្តចេញពី Barcelona ទៅលេងនៅចិនវិញ

ចិន៖ កីឡាករ Paulinho បានសម្រេចចិត្តត្រឡប់ទៅក្រុម Guangzhou Evergrande វិញ ក្រោយពីមកលេងនៅ Barcelona បានត្រឹមមួយរដូវកាលប៉ុណ្ណោះ។

ខ្សែបម្រើសញ្ជាតិប្រេស៊ីលរូបនេះបានចូលរួមជាមួយក្លិបនៅក្របខណ្ឌកំពូលរបស់ចិនវិញ ក្នុងកុងត្រាជាកីឡាករខ្ចីជើង ដោយក្រុម Guangzhou Evergrande អាចទិញរូបគេជាផ្លូវការបាននៅខែមករាឆ្នាំក្រោយ។

កីឡាករវ័យ ២៩ឆ្នាំរូបនេះបានផ្លាស់ប្តូរក្លិបមកកាន់ទឹកដី Camp Nou កាលពីខែសីហាឆ្នាំ២០១៧ ដោយវត្តមានរបស់រូបគេបានធ្វើឲ្យអ្នកគាំទ្រក្លិប Barcelona មានការភ្ញាក់ផ្អើលយ៉ាងខ្លាំង។

ក្រោយពីព័ត៌មាននៃការចាកចេញរបស់អតីតខ្សែបម្រើរបស់ក្រុម Tottenham Hotspur រូបនេះបានត្រូវគេប្រកាសជាផ្លូវការ បណ្តាញសង្គម Twitter របស់ក្រុម Barcelona បានបង្ហោះរូបភាពភ្ជាប់នឹងសារអរគុណដល់រូបគេដែលបានជួយក្លិបរយៈពេលមួយរដូវកាលកន្លងមកនេះ។

គួរឲ្យដឹងថា ក្នុងរយៈពេល ១រដូវកាលនេះ Paulinho បានបង្ហាញខ្លួនឲ្យក្រុមអ្នកមានបុណ្យបានចំនួន ៤៩ប្រកួត ព្រមទាំងស៊ុតបញ្ចូលទីបាន ៩ដងផងដែរ៕