ភ្នំពេញៈ ទន្ទឹមគ្នានឹងកិត្តិយសកេរ្តិ៍ឈ្មោះនៅលើវិថីតារាកំពុងមានសន្ទុះ ស្ទុះឡើង និងបន្តរីកសុសសាយឥតឈប់ឈរនោះ ពិធីការិនីប្រចាំស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ នាង កែវ ផល្លីកា ក៏កាន់តែមានសម្រស់ស្រស់ស្អាតមិនធម្មតាដែរជាមួយនឹងមន្តស្នេហ៍ ថ្ពាល់ខួចទាំងសងខាង។ ស្របគ្នានឹងការងារកាន់រីកចម្រើន សម្រស់កាន់តែផូរផង់ កែវ ផល្លីកា ក៏បានបង្ហើបឲ្យដឹងពីអនាគតបុរសដែលនាងនឹងយកធ្វើជាគូអនាគតផង ដែរ។
ដោយគ្មានជាប់ខ្សែស្រឡាយជាអ្នកសិល្បៈ កែវ ផល្លីកា បានព្យាយាមសម្រេចនូវបំណងប្រាថ្នារបស់ខ្លួនហក់ចូលក្នុងវិស័យ សិល្បៈ តាមរយៈការប្រឡងហ្វ្រេស៊ីប៊យ-ហ្វ្រេស៊ីហ្គើលនៅក្នុងឆ្នាំ២០០៧ តែមិនបានជោគជ័យ។ ថ្វីដ្បិតតារាដែលមានស្រុកកំណើតនៅស្រុកក្រូចឆ្មារ ខេត្តកំពង់ចាម រូបនេះមិនទទួលបានជាប់ចំណាត់ថ្នាក់ក្តី ប៉ុន្តែជាសំណាងល្អ នាងក៏មានឱកាសបានថតស្ប៉តដ៏ធំប្រចាំឆ្នាំរបស់ក្រុមហ៊ុនបណ្តាញ ទូរស័ព្ទ អឹមហ្វូន(M-fone) នៅក្នុងឆ្នាំ២០០៧ ដែលនោះហើយជាការកាប់ឆ្ការផ្លូវឲ្យនាងមានទឹកមាត់លេបផ្សើមបំពង់ កដើម្បីបន្តអាជីពជាអ្នកសិល្បៈនេះរហូតដល់សព្វថ្ងៃ។
ពិធីការិនីប្រសូតចេញពីត្រកូលគ្រួសារអ្នកកាត់ដេររូបនេះបានឲ្យ ដឹងថា នៅក្នុងកម្មវិធីប្រឡង ហ្វ្រេស៊ីប៊យ-ហ្វ្រេស៊ីហ្គើលនៅ២០០៧ នាងមិនបានទទួលចំណាត់ថ្នាក់អ្វីនឹងគេនោះទេ ពោលគឺនាងធ្លាក់ពីការប្រកួតនៅវគ្គផ្តាច់ព្រ័ត្រដែលមានគ្នា១០ នាក់។ នាងបានបន្តថា ជាភ័ព្វសំណាងល្អ នាងក៏ទទួលបានឱកាសថតស្ប៉តពាណិជ្ជកម្ម និងខ្សែភាពយន្តផ្សេងៗជាបន្តបន្ទាប់ ដែលរហូតនៅពេលនេះនាងបានសម្រេចនូវបំណងដ៏ធំមួយក្នុងអាជីពជា ពិធីការិនីដែលនាងតែងស្រមៃចង់បានតាំងពីនៅក្មេងៗ។
តារាស្រីសម្តីផ្អែមថ្ពាល់ខួចទាំងសងខាងរូបនេះនិយាយថា៖«ពេល ប្រឡងហ្នឹង ខ្ញុំអត់បានទទួលចំណាត់ថ្នាក់ស្អីទេ ហើយខ្ញុំក៏មិនបានដឹងថា ហេតុអ្វីពេលដែលខ្ញុំធ្លាក់ហើយមានគេទាក់ទងហៅខ្ញុំថតនោះដែរ។ ប៉ុន្តែក្រោយពេលខ្ញុំថតស្ប៉តដំបូងចប់ ស្រាប់តែមានគេទាក់ទងខ្ញុំឲ្យថតរហូតតែម្តង»។
មុនចាប់អាជីពជាពិធីការិនីនៅស្ថានីយទូរទស្សន៍ប៉ុស្តិ៍លេខ៣នៅ ចុងឆ្នាំ២០០៩ កែវ ផល្លីកា ក៏បានឲ្យដឹងផងដែរថា នាងបានថតខ្សែភាពយន្តភាគចំនួន៥រឿងផងដែរ ហើយស្នាដៃចុងក្រោយរបស់នាងគឺរឿងភូមិខ្ញុំស្រស់ឆើតឆាយ របស់ស្ថានីយទូរទស្សន៍បាយ័ន។ ប៉ុន្តែក្រោយពេលដែលនាងត្រូវចូលបម្រើការងារពេញសិទ្ធិនៅប៉ុស្តិ៍៣ នាងក៏បានផ្អាកពីការថតផ្សេងៗដោយសារតែកន្លែងធ្វើការថ្មី តម្រូវឲ្យនាងធ្វើបែបនេះ។
ទន្ទឹមនឹងជោគជ័យក្នុងការងារសិល្បៈជាពិធីការិនីប្រចាំកម្មវិធី ស្ត្រីពីនេះពីនោះ កម្មវិធីសោភ័ណជីវិត និងកម្មវិធីថ្មីៗមួយចំនួនទៀត ស្រីស្រស់ក្មេងរូបនេះ ក៏កំពុងទាក់ទាញផ្នែកសម្រស់កាន់តែខ្លាំងឡើងៗផងដែរ ដែលនាំឲ្យមានការចោទសួរពីគ្រប់មជ្ឈដ្ឋានថា តើតារាថ្ពាល់ខួចរូបនេះមានម្ចាស់បេះដូងហើយឬនៅ?
ដោយគ្មានអាថ៌កំបាំងតារាស្រី កែវ ផល្លីកា ក៏បានឆ្លើយដោយគ្មានលាក់លៀមពីអនាគតបុរសម្ចាស់បេះដូងនាងនៅពេល នេះថា ឥឡូវថ្វីដ្បិតតែនាងនៅក្មេងខ្ចីអាយុទើបតែ២២ឆ្នាំក៏ពិតមែន តែនាងក៏ត្រូវតែគិតពីបញ្ហាអនាគតគូស្រករនេះផងដែរ។
តារាព្យួរការសិក្សាឆ្នាំទី២នៅសាកលវិទ្យាល័យជាតិគ្រប់គ្រងរូប នេះ បាននិយាយថា៖ «ខ្ញុំនិយាយដោយស្មោះត្រង់ទៅចុះ ម្ចាស់បេះដូងខ្ញុំនៅពេលនេះ កំពុងស្ថិតនៅក្នុងការគិត គឺខ្ញុំមិនទាន់មានទេ តែក៏ដល់ពេលដែលខ្ញុំត្រូវលើកយកមកគិតផងដែរ»។
និយាយដល់ជីវិតអាពាហ៍ពិពាហ៍ កែវ ផល្លីកា ក៏បានឲ្យដឹងផងដែរថា រូបនាងនឹងមិននៅដំអក់យូរពេកនោះទេ ដោយនាងបានបញ្ជាក់ថា ទោះបីជានៅពេលនេះនាងមានអាយុតិចក្តី តែបើមានគេចូលមកចែចូវនាងដល់ឪពុកម្តាយតាមតាមផ្លូវច្បាប់ និងប្រពៃណីនោះ នាងក៏ត្រូវគិតពីបញ្ហានេះដែរ។ នាងបានបន្តថា ធម្មតាសម្រាប់គូអនាគតយើងពិតជាចង់បានមនុស្សល្អម្នាក់ តែអ្វីៗពិតជាមិនអាចល្អទាំងអស់នោះទេ ហើយសម្រាប់រូបនាងគ្រាន់តែចង់បានបុរសម្នាក់ដែលចេះគោរព ស្រឡាញ់រូបនាង ឪពុកម្តាយ និងក្រុមគ្រួសារនោះជាការប្រសើរបំផុត។
នាងនិយាយថា៖ «សម្រាប់ខ្ញុំ បើមានគេចូលមកចែចូវតាមផ្លូវច្បាប់នោះ ខ្ញុំក៏ត្រូវគិតដែរ តែបើអាច ខ្ញុំគិតថា នៅអាយុ២៥-២៦ឆ្នាំ ពិតជារឿងដ៏ប្រសើរ ព្រោះយើងចង់ឲ្យចាស់ចិត្តគំនិតបន្តិច»។
គួរបញ្ជាក់ថា កែវ ផល្លីកា មានឈ្មោះដើម កែវ ពន្លឺ កើតនៅថ្ងៃទី១ ខែតុលា ឆ្នាំ១៩៩០ នៅស្រុកក្រូចឆ្មារ ខេត្តកំពង់ចាម។ នាងមានឪពុកឈ្មោះ កែវ សារិន អាយុ៦៤ឆ្នាំអតីតមេជាងកាត់ដេរ និងម្តាយឈ្មោះ អ៊ិត វ៉ាន់នី អាយុ៥៩ឆ្នាំជាស្ត្រីមេផ្ទះ។ តារារូបនេះជាកូនពៅក្នុងចំណោមបងប្អូន៦នាក់ដែលមានស្រី៥នាក់ ប្រុសម្នាក់។ នៅថ្ងៃអនាគត ផល្លីកា បានប្រាប់ថា នាងមានបំណងធ្វើជាម្ចាស់ហាងមួយកន្លែង៕
ដកស្រង់ពីគេហរទំព័រភ្នំពេញប៉ុស្ត៍
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]