Lewandowski ប្រើស្នៀតពិសេសមួយ នៅពេលចេញទៅក្រៅម្តងៗ

ប៉ូឡូញ៖ ខ្សែប្រយុទ្ធក្រុមជម្រើសជាតិប៉ូឡូញកីឡាករ Robert Lewandowski បានប្រាប់ពីវិធីមួយ ដែលពេលគេចេញទៅក្រៅជាមួយមិត្តភ័ក្ដិម្តងៗថា ពេលខ្លះរូបគេបានប្រើប្រាស់អត្តសញ្ញាណក្លែងក្លាយ ដើម្បីកុំឲ្យមហាជនចាប់អារម្មណ៍លើរូបគេ។

ខ្សែប្រយុទ្ធក្លិប Bayern Munich រូបនេះបាននិយាយថា «នៅពេលដែលខ្ញុំចេញក្រៅម្តងៗដូចជា ទៅភោជនីយដ្ឋានជាមួយមិត្តភក្តិ ពួកយើងតែងតែជជែកគ្នានិងសើចឮៗ ប៉ុន្តែខ្ញុំមិនប្រើឈ្មោះថា Robert ឬ Lewy ទេ » ។

ខ្សែប្រយុទ្ធដែលមានវ័យ ២៩ ឆ្នាំរូបនេះបានបន្ថែមថា «ខ្ញុំតែងប្រើឈ្មោះ Emil ហើយ​គ្មាននរណាម្នាក់ចាប់អារម្មណ៍ ឬមើលមកខ្ញុំទេ។ តែបើសិនជាមាននរណាម្នាក់ គិតថាគេចំណាំខ្ញុំបាន ហើយសួរខ្ញុំថាតើខ្ញុំជា Robert Lewandowski មែនឬទេ? ខ្ញុំតែងតែឆ្លើយតបទៅគេវិញថា  សូមទោស អ្នកច្រឡំមនុស្សហើយ។ ខ្ញុំគ្រាន់តែមានរូបរាងដូចគេប៉ុណ្ណោះ។  ខ្ញុំឈ្មោះថា Emil ទេមិនមែន Robert  ឡើយ»។

គួរបញ្ជាក់ថា Lewandowski កំពុងតែស្ថិតនៅក្នុងប្រទេសរុស្ស៊ី ក្នុងយុទ្ធនាការ World Cup ២០១៨ ដើម្បីជួយក្រុមជម្រើសជាតិប៉ូឡូញ។  រូបគេបង្ហាញខ្លួនឲ្យក្រុមជម្រើសជាតិចំនួន ៩៦ ដងដោយក្នុងនោះគេស៊ុតបញ្ចូលទីបានចំនួន ៥៥ គ្រាប់៕