តារាល្បីៗប៉ុន្មានដួង រៀនមិនចប់មែន តែជោគជ័យក្នុងសិល្បៈ និងក្នុងជីវិតបច្ចុប្បន្នខ្លាំងណាស់!

ថៃ៖ តារាថៃប្រុសស្រីល្បីៗ នៅសម័យទំនើបបច្ចុប្បន្ននេះ ត្រូវបានគេស្គាល់ថាភាគច្រើនបានបញ្ចប់ការសិក្សាថ្នាក់កម្រិតខ្ពស់ៗណាស់ និងអ្នកខ្លះទៀតក៏បានបញ្ចប់ការសិក្សាមកពីក្រៅប្រទេសផងដែរ។ ក៏ប៉ុន្តែការសិក្សាបានខ្ពង់ខ្ពស់ នៅតែមិនអាចកំណត់អនាគតបានថា អ្នកនឹងក្លាយទៅជា អ្នកមាន ឬអ្នកក្រ នោះទេ។

ជាក់ស្តែង ដូចជាតារាប្រុសស្រីទាំងនេះ ពួកគេមិនបានរៀនចប់ដូចគេឯងនោះទេ ប៉ុន្តែបើក្រឡេកមកមើល ពីជីវិតនាពេលបច្ចុប្បន្នវិញ គឺពិតជាមានភាពជោគជ័យខ្លាំងដោយមានទាំងកេរ្តិ៍ឈ្មោះល្បីល្បាញក្នុងសង្គមសិល្បៈ និងជាអ្នកមានទ្រព្យសម្បត្តិស្តុកស្តម្ភម្នាក់នៅក្នុងសង្គម មិនចាញ់តារាៗ ដែលមានការសិក្សាខ្ពង់ខ្ពស់ប៉ុន្មាននោះទេ។

ចង់ដឹងថាមានតារាប្រុសស្រីរូបណាខ្លះមកតាមដានទាំងអស់គ្នាដូចខាងក្រោម៖

១) តារាសម្តែងស្រី Tangmo៖ សព្វថ្ងៃជាតារាល្បីមួយរូប ដែលអ្នកគាំទ្រជាច្រើន ប៉ុន្តែនាងរៀនមិនចប់នោះទេ ពោលគឺនាងមានត្រឹមតែការប្តេជ្ញាចិត្តថានឹងធ្វើការនៅក្នុងឧស្សាហកម្មកម្សាន្តឱ្យបានល្អបំផុត។ ដោយក្នុងគំនិតនាងគិតថា សញ្ញាបត្រ គ្រាន់តែជាក្រដាសមួយសន្លឹកដែលគេឱ្យតម្លៃប៉ុណ្ណោះ តែការងារសិល្បៈអាចរកលុយបានច្រើនជាងនិស្សិត ដែលបានបញ្ចប់ការសិក្សាថ្នាក់បរិញ្ញាទៅទៀត ហេតុដូច្នេះទើបនាងព្យាយាមធ្វើការរហូតទទួលបានភាពជោគជ័យដូចពេលនេះ។ 

២) តារាសម្តែងប្រុស Shakrit៖ ចូលធ្វើការក្នុងសិល្បៈតាំងពីរៀនចប់វិទ្យាល័យ តែក៏មិនភ្លេចចូលរៀនបន្តថ្នាក់បរិញ្ញាផ្នែកប្រៃសនីយ៍ដែរ ដោយរៀនបណ្តើរធ្វើការបណ្តើរ។ តែពិបាកពេកលោកក៏បានសម្រេចិត្តបោះបង់ការសិក្សា ហើយធ្វើការក្នុងវិស័យសិល្បៈយ៉ាងពេញទំហឹង រហូតទទួលបាននូវភាពល្បីល្បាញក្នុងសិល្បៈដូចសព្វថ្ងៃ។

៣) តារាសម្តែងស្រី Bee Namthip៖ បច្ចុប្បន្នកំពុងតែមានប្រជាប្រិយភាពខ្លាំងតាមរយៈការសម្តែងរឿងជាតួកាច និងធ្វើជាគណៈកម្មការក្នុងកម្មវិធី The Face Thailand។ តែងាកទៅមើលការសិក្សាវិញ ពេលចប់មធ្យមភ្លាមជោគជតាក៏នាំនាងមកកាន់វិថីសិល្បៈ ហើយនាងក៏ស្រលាញ់ពេញចិត្តអាជីពនេះខ្លាំង ដោយមិនបានវិលទៅរៀនទៀតនោះទេ។ ដោយសិល្បៈនាងធ្លាប់ប្រឡូកស្ទើរតែទាំងអស់ មិនថាជាតារាចម្រៀង តារាសម្តែង តារាបង្ហាញម៉ូត ឬជាពិធីការិនីនោះទេ។ មកដល់ពេលនេះ Bee Namthip ក៏បានក្លាយជាតារាស្រីឆ្នើម ដែលទទួលបានភាពជោគជ័យខ្លាំងមែនទែន។ 

៤) តារាប្រុស Dome Pakorn៖ សម្រាប់កម្លោះសង្ហារូបនេះ ក្រោយរៀនចប់សាលាមធ្យមក្នុងវ័យជំទង់ ក៏បានចូលប្រឡូកក្នុងវិស័យសិល្បៈពេញទំហឹង ដោយធ្វើជាអ្នកចម្រៀងរ៉េបដ៏ល្បី។ ប៉ុន្តែលោកក៏បានទៅបន្តការសិក្សានៅអាមេរិកជិត១ឆ្នាំ ហើយមិនយូរប៉ុន្មានក៏វិលត្រលប់មកកាន់អាជីពសិល្បៈវិញដូចមុន ព្រោះលោកថាគ្រាន់តែមានចំណេះល្មមៗប៉ុណ្ណេះគឺគ្រប់គ្រាន់ហើយ គ្មានអ្វីសំខាន់ជាងការដែលបានធ្វើការដែលយើងស្រលាញ់ចូលចិត្តនោះទេ។

៥) តារាសម្តែងស្រី Gubgib៖ ធ្លាប់បានសិក្សានៅគណៈនិតិសាស្រ្តនៃសាកលវិទ្យល័យ Ram Khamhaeng តែរៀបមិនចប់ចុងចប់ដើមទេ ព្រោះមានការងារសិល្បៈរត់ចូលមករកច្រើនពេក។ ពេលនោះនាងក៏សម្រេចចិត្តបោះបង់ចោលការសិក្សា ដើម្បីកើបលុយក្នុងសិល្បៈជាមុនសិន ហើយបានកសាងអនាគតដ៏ភ្លឺស្វាងរហូតមកដល់បច្ចុប្បន្ននេះ។ 

៦) តារាសម្តែង Ananda៖ ជាកូនកាត់លាវ-អូស្ត្រាលី ល្បីថាជាក្មេងខូចណាស់ពេលនៅរៀននៅថ្នាក់វិទ្យាល័យដល់ថ្នាក់ត្រូវបណ្តេញចេញពីសាលារៀន និងត្រូវឪពុកបញ្ជូនឱ្យទៅពត់និស្ស័យផងដល់ប្រទេសឥណ្ឌាឯណោះ។ ប៉ុន្តែជាចៃដន្យក៏បានចូលមក​ប្រឡូកក្នុងវិស័យសិល្បៈជាមុន ដោយបានសាងស្នាដៃ និងភាពល្បីល្បាញជាបន្តបន្ទាប់គ្នាមកដល់បច្ចុប្បន្ននេះ។ 

៧) តារាចម្រៀង Bitoey Rsiam៖ ចប់វិទ្យាល័យភ្លាមក៏បន្តការសិក្សាផ្នែកធុរកិច្ចបាន ២ ឆ្នាំ តែដោយសារមានការងារសិល្បៈចូលមកច្រើនពេក ក៏ផ្អាករៀនសិនហើយងាកមករកលុយក្នុងវិស័យសិល្បៈបានមិនស្ទើរនោះទេ ព្រោះក្រៅពីច្រៀងនាងក៏ត្រូវប៉ាន់ខាងការដើរបង្ហាញម៉ូតនានាផងដែរ តាមរយៈសមត្ថភាព ព្រមទាំងសម្រស់របស់ខ្លួន៕ 

• តារាថៃ