រាជធានីភ្នំពេញ ៖ សន្តិសុខវ័យក្មេងខឹងសន្តិសុខវ័យចំណាស់ជេរម៉ែ ទើបវាយ២ដៃរយះសៀតផ្ការងរបួសធ្ងន់ត្រូវបានបញ្ជូនទៅសង្គ្រោះបន្ទាន់ ហើយសមត្ថកិច្ចបានឃាត់ខ្លួនសន្តិសុខវ័យក្មេងដាក់ខ្នោះ ។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៨និង១នាទីយប់ថ្ងៃទី១៨ ខែមិថុនា ឆ្នាំ២០១៨ នៅក្នុងរោងចក្រកាត់ដេរសំលៀកបំពាក់ តាមណ្តោយផ្លូវទំនប់កប់ស្រូវ ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
ជនបង្កឈ្មោះទេព វណ្ណរ័ត្ន ភេទប្រុស អាយុ២៤ឆ្នាំ មុខរបរសន្តិសុខ ស្នាក់នៅផ្ទះជួល ភូមិព្រៃស្វាយ សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅភូមិដីទំនាប ឃុំត្រពាំងរូង ស្រុកត្រពាំងរូង ខេត្តកោះកុង។ ចំណែកជនរងគ្រោះឈ្មោះ ចាន់ វ៉ា់ន់ជុក ភេទប្រុស អាយុ៦០ឆ្នាំ មុខរបរសន្តិសុខ ស្នាក់នៅក្នុងបុរីសែនមនោរម្យ ស្ថិតនៅសង្កាត់កន្ទោក ខណ្ឌពោធិ៍សែនជ័យ មានស្រុកកំណើតនៅខេត្តបាត់ដំបង។
តាមជនបង្កដែលជាសន្តិសុខវ័យក្មេងបានសារភាពថា នៅមុនពេលកើតហេតុ ជនរងគ្រោះដែលជាសន្តិសុខវ័យចំណាស់ទើបនឹងស្រវឹង ហើយសន្តិសុខវ័យក្មេងបានចេញទៅល្បាតនៅក្នុងរោងចក្រខាងលើ បន្ទាប់មកសន្តិសុខវ័យក្មេងបានបោះដៃតាមអាយកូមសួរជនរងគ្រោះដែលជាសន្តិសុខវ័យចំណាស់នៅឯណាពី៣ដង ហើយបន្ទាប់មកស្រាប់តែជនរងគ្រោះខាងលើ បានជេរម៉ែសន្តិសុខវ័យក្មេងថា «ក.ន.យ (ពាក្យអសុរស) ម៉ែអែងអស្ចារ្យប៉ុន្មានទៅអា» បន្ទាប់មកសន្តិសុខវ័យក្មេងបាននិយាយថា «ម៉េចបានជេរដល់ម៉ែ ម៉ែខ្ញុំមកលេងជាមួយមែន? តិចទ្រាំមិនបានមិនស្គាល់ចាស់»។
ប្រភពព័ត៌មានបានបន្តទៀតថា ខណៈពេលអ្នកទាំងពីរបានជួបគ្នា ដោយជនរងគ្រោះដែលជាសន្តិសុខវ័យចំណាស់បានយកខ្នោះមកវាយសន្តិសុខវ័យក្មេង ហើយសន្តិសុខវ័យក្មេងបានគ្រវាសដៃទៅខ្នោះនោះបោកចំសៀតផ្កាសន្តិសុខវ័យចំណាស់បណ្តាលអោយរយះយ៉ាងធ្ងន់ធ្ងរ ហើយបន្ទាប់មកសន្តិសុខវ័យចំណាស់បានស្ទុះហក់មកវាយម្តងទៀត ហើយសន្តិសុខវ័យក្មេងបានដាល់មួយដៃទៀត បណ្តាលអោយសន្តិសុខវ័យចំណាស់នោះដួលសន្លប់ស្តូកស្តឹង បន្ទាប់មកសន្តិសុខនៅក្នុងរោងចក្រខាងលើនាំជនរងគ្រោះទៅគ្លីនិកឯកជនភ្លាមៗផងដែរ តែដោយសារតែជនរងគ្រោះរបួសធ្ងន់ធ្ងរពេក ត្រូវបានក្រុមគ្រួសារបានដឹកតាមរថយន្ត ដើម្បីយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ។
ក្រោយពេលកើតហេតុ កំលាំងនគរបាលប៉ុស្តិ៍ចោមចៅបានចុះមកដល់កន្លែងកើតហេតុភ្លាមៗផងដែរ និងបានឃាត់ខ្លួនសន្តិសុខវ័យក្មេងនោះមកប៉ុស្តិ៍មួយយប់ ដើម្បីទទួលបណ្តឹងជនរងគ្រោះ តែជនរងគ្រោះខាងលើសន្លប់មិនដឹងខ្លួននៅឡើយ ហើយសមត្ថកិច្ចបានកសាងសំណុំរឿងបញ្ជូនទៅជំនាញខណ្ឌពោធិ៍សែនជ័យ ចាត់ការតាមនីតិវិធី ៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]