ដឹងអត់ថាពាន World Cup មានប្រវត្តិយ៉ាងណាខ្លះ?

រុស្ស៊ី៖ ពាន World Cup មិនត្រឹមតែមានជាវត្ថុដ៏មានតម្លៃសម្រាប់កីឡាករជម្រើសជាតិនោះទេ ហើយវាក៏មានប្រវត្តិយ៉ាងវែងឆ្ងាយផងដែរ។

បើយោងតាមរបាយការណ៍របស់សារព័ត៌មានរបស់សហរដ្ឋអាមេរិកមួយបានបង្ហាញថា ពាន World Cup មានតម្លៃជាង២០លានដុល្លារអាមេរិក ដែលពានមួយនេះបានរចនាឡើងដោយលោក Silvio Gazzaniga ដែលជាជនជាតិអ៊ីតាលី រស់នៅទីក្រុង Milan។ 

លោក Gazzaniga បានធ្វើពាននេះឡើងនៅឆ្នាំ១៩៧៤ ក្រោយពីពាន World Cup ដើមត្រូវបានចោរលួចបាត់ ហើយពានបាល់ទាត់ពិភពលោកសព្វថ្ងៃនេះគឺជាពានទី៣ហើយដែលត្រូវគេបង្កើតឡើង។

ពាននេះបានកម្ពស់៣៧សង់ទីម៉ែត្រ ដែលឆ្លាក់ឡើងអំពីមាសសុទ្ធ៦គីឡូក្រាម ដោយក្នុងនោះមានរូបកីឡាករពីររូបលើកដៃឡើងលើដើម្បីអបអរភាពជោគជ័យរបស់ពួកគេ។ 

នៅពេលដែលប្រទេសមួយបានឈ្នះពាន World Cup ឈ្មោះរបស់ប្រទេសនោះនឹងត្រូវបានឆ្លាក់ជាប់នៅខាងក្រោម (បាត) ដោយប្រទេសដែលទទួលជ័យជម្នះនឹងអាចកាន់ពាននៅពេលចប់ការប្រកួត ប៉ុន្តែពួកគេនឹងទទួលបានពានចម្លងយកទៅប្រទេសខ្លួនវិញ ដោយពានដើមនឹងត្រូវសហព័ន្ធ FIFA យកទៅកាន់ប្រទេសអ៊ីតាលីដើម្បីជួសជុលមុននឹងយកទៅដាក់នៅក្នុងទីស្នាក់ការធំនៅទីក្រុង Zurich ប្រទេសស្វីស៕