រាជធានីភ្នំពេញ ៖ បុរសម្នាក់រងរបួសធ្ងន់ត្រូវបានបញ្ជួនទៅសង្គ្រោះនៅមន្ទីរពេទ្យភ្លាមៗបន្ទាប់ពីផឹកស៊ីស្រវឹងត្រូវបុរស៣ទៅ៤នាក់ព្រួតវាយ លុះពេលសមត្ថកិច្ចចុះទៅដល់កន្លែងកើតហេតុ បែរជាស្ត្រីជាប្រពន្ធ បង្វែរមកថា ជារឿងគ្រោះថ្នាក់ចរាចរណ៍ទៅវិញ ហេតុការណ៍នេះដែរបានបង្កឲ្យមានការភ្ញាក់ផ្អើលឡើង កាលពីវេលាម៉ោង៨យប់ ថ្ងៃទី១៨ ខែមិថុនា ឆ្នាំ២០១៨ ទល់មុខនិងសិប្បកម្មផលិតទុយោជ័របូមទឹក ផ្ទះលេខ៩៨៦ ផ្លូលេខ៧០D ភូមិខ្វា សង្កាត់ដង្កោ ខណ្ឌដង្កោ ។
តាមប្រភពព័ត៌មានពីប្អូនប្រជាពលរដ្ឋដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញនៅទីតាំងខាងលើមានការផឹកហ៊ោសប្បាយយ៉ាងទ្រហឹងអឺងកងលុះដល់ពេលកើតហេតុមិនដឹងថា មានរឿងអ្វីនោះទេ ឃើញបុរស៣ទៅ៤នាក់បានព្រួតវាយទៅបុរសម្នាក់ បណ្តាលឲ្យបែកក្បាលសន្លប់ស្តូកស្តឹងដូចមនុស្សស្លាប់អញ្ចឹង ពេលនោះដែរបុរសម្នាក់នោះត្រូវបានគេដឹកយកទៅសង្គ្រោះនៅមន្ទីរពេទ្យបាត់ទៅ ដោយបន្សល់ទុកនូវថ្លុកឈាមនៅកន្លែងកើតហេតុ ។
ប្រភពដដែលបានបន្តទៀតថា លុះបន្តិចក្រោយមកដំណឹងនេះបានលឺទៅដល់សមត្ថកិច្ចនៃអធិការដ្ឋានខណ្ឌដង្កោថា មានករណីហិង្សាបណ្តាលឲ្យមានមនុស្សស្លាប់ មួយសន្ទុះក្រោយមកស្រាប់តែឃើញមានកម្លាំងសមត្ថកិច្ចខណ្ឌដង្កោព្រមទាំងមានវត្តមានលោកអធិការដ្ឋានខណ្ឌ និងអធិការរងបានចុះទៅកន្លែងកើតហេតុ រួចហើយក៏បានសាកសួរពីដំណើររឿងស្រាប់តែមានស្ត្រីម្នាក់ដែលអះអាងថា ជាប្រពន្ធរបស់ជនរងគ្រោះដែលត្រូវគេវាយបានមកប្រាប់សមត្ថកិច្ចថា ប្តីរបស់គាត់ គឺជួបគ្រោះថ្នាក់ចរាចរណ៍ដួលម៉ូតូខ្លួនឯង ហើយមិនមានអំពើហិង្សាណាមួយដូចគេគ្រប់គ្នាលើកឡើងនោះទេ ។
ក្រោយពេលកើតហេតុ បន្ទាប់ពីសាកសួរកម្លាំងសមត្ថកិច្ចខណ្ឌដង្កោក៏បានដកកម្លាំងចេញពីកន្លែងកើតហេតុនាំគ្នាធ្វើការបន្តរៀងៗខ្លួន ៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]