រាជធានីភ្នំពេញ ៖ កម្លាំងនគរបាលប៉ុស្តិ៍នគរបាលចោមចៅ២ បានធ្វើការចាប់ខ្លួនជនសង្ស័យម្នាក់ដែលជាមុខសញ្ញាលក់គ្រឿងញៀនជាអាជីពតែម្ដង ហើយធ្លាប់ជាប់គុក៣លើករួចមកហើយ ប៉ុន្តែជននេះហាក់មិនមានការរាងចាលបន្តិចឡើយ ក្រោយជាប់គុកមួយរយៈចេញមកវិញបានចាប់យកមុខរបរចាស់នេះវិញដដែល ទើបពេលនេះត្រូវនគរបាលចាប់ខ្លួនញាត់គុកជាលើកទី៤ម្ដងទៀត និងឆែករកឃើញថ្នាំញៀន៥កញ្ចប់ថែមទៀតផង។
ការចាប់ខ្លួននោះបានធ្វើឡើងកាលពីម៉ោង១១ព្រឹក ថ្ងៃទី១៨ ខែមិថុនា ឆ្នាំ២០១៨ នៅតាមផ្លូវលំ ស្ថិតក្នុងភូមិថ្មគោល៣ សង្កាត់ ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
នគរបាលបានប្រាប់ថា ជនសង្ស័យខាងលើនេះឈ្មោះ សុខ ចាន់ឌីណូ អាយុ៣០ឆ្នាំ មុខរបរ លក់គ្រឿងញៀនជាអាជីព មានស្រុកកំណើត ភូមិរំចេក ឃុំរតនៈ ស្រុកបាត់ដំបង ខេត្តបាត់ដំបង ហើយសព្វថ្ងៃស្នាក់នៅផ្ទះជួលក្នុងភូមិថ្មគោល៣ សង្កាត់ចោមចៅ២ ខណ្ឌពោធិ៍សែនជ័យ ។
នគរបាលបានប្រាប់បន្តទៀតថា កន្លងមកដោយសារតែមុខរបរមួយនេះធ្លាប់ត្រូវបានសមត្ថកិច្ចចាប់ខ្លួនដាក់ពន្ធនាគារ៣ដងរួចមកហើយ ដោយឡែកពេលនេះគឺជាលើកជាលើកទី៤ ហើយមុនពេលចាប់ខ្លួនកម្លាំងនគរបាលប៉ុស្តិ៍ចោមចៅ២ បានចេញល្បាតពួនស្ទាក់បទល្មើសនៅក្នុងមូលដ្ឋាន លុះពេលទៅដល់ត្រង់ចំណុចកើតហេតុស្រាប់តែប្រទះឃើញជនសង្ស័យកំពុងចេញធ្វើសកម្មភាពជួញដូរ និងចែកចាយគ្រឿងញៀន។ ដោយមានការសង្ស័យ ទើបចាប់ខ្លួនត្រួតពិនិត្យក៏រកឃើញគ្រឿងញៀនចំនួន៥កញ្ចប់ រួចបាននាំទៅសាកសួរ និងកសាងសំណុំរឿងចាត់ការតាមច្បាប់តែម្ដង៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]