ខេត្តកណ្តាល ៖ ក្នុងប្រតិបត្តិការដ៏ក្តៅគគុកអស់រយៈពេល១១ថ្ងៃគត់ កម្លាំងកងរាជអាវុធហត្ថខេត្ត ដឹកនាំដោយលោកវរសេនីយ៍ឯកទូច អីុណាន មេបញ្ជាការរងកងរាជអាវុធហត្ថខេត្ត ដោយមានការបញ្ជាផ្ទាល់ពីលោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្ត សហការជាមួយកងរាជអាវុធហត្ថខេត្តសៀមរាប បានបង្ក្រាបករណីប្រើប្រាស់អាវុធខុសច្បាប់ ក្លែងឯកសារសាធារណៈឆបោក និងក្លែងឯកសណ្ឋានអាវុធហត្ថ ដោយឃាត់ខ្លួនជនសង្ស័យម្នាក់ រួមនឹងវត្ថុតាងមួយចំនួនធំ ។
ការឃាត់ខ្លួននេះ បានធ្វើឡើងកាលពីថ្ងៃទី១៥ មិថុនា នៅបន្ទប់ជួលស្ថិតក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ។នៅថ្ងៃទី៤ ខែមិថុនា មានជនរងគ្រោះ៣នាក់បានប្តឹងមកកងរាជអាវុធហត្ថស្រុកស្អាង ពីឈ្មោះនឿន ណាត ភេទប្រុស អាយុ២៩ឆ្នាំ ស្នាក់នៅផ្ទះជួលក្នុងភូមិលេខ៣ ឃុំស្វាយរលំ ស្រុកស្អាង ថាបានខ្ចីម៉ូតូ និងទូរស័ព្ទរបស់ពួកគាត់រួចឆបោកយកទៅបាត់ ។
ជនរងគ្រោះទាំង៣នាក់នេះមាន ៖ ១-ឈ្មោះ មុឺន ភេទប្រុស អាយុ៣៨ឆ្នាំ ជាកម្មកររោងចក្រ បាត់បង់ម៉ូតូ១គ្រឿង, ២-ឈ្មោះ សុដានោ ភេទប្រុស អាយុ៣០ឆ្នាំ មានទីលំនៅក្នុងសង្កាត់តាខ្មៅ ក្រុងតាខ្មៅ បាត់បង់ទូរស័ព្ទ១គ្រឿង និង៣-ឈ្មោះ ភាព ភេទស្រី អាយុ៣៤ឆ្នាំ ជាកម្មការិនីរោងចក្រ និងជាសង្សាររបស់ជនសង្ស័យស្នាក់នៅផ្ទះជួលជាមួយគ្នា បាត់បង់ទូរស័ព្ទ២គ្រឿង ។ ក្រោយពីបាត់មុខជនសង្ស័យយូរពេក ហើយទាក់ទងតាមទូរស័ព្ទមិនចូល ជនរងគ្រោះទាំង៣នាក់ក៏មកប្តឹងកងរាជអាវុធហត្ថ និងបានបំភ្លឺថាជនឈ្មោះ នឿន ណាត តែងតែនិយាយប្រាប់ពួកគាត់ថា រូបគេគឺជាមន្ត្រីអាវុធហត្ថដែលទើបផ្លាស់មកពីខេត្តប៉ៃលិន ។ ក្រោយពីទទួលបានពាក្យបណ្តឹងនិងការបំភ្លឺដូចខាងលើរួចមក លោកឧត្តមសេនីយ៍ សំ តុលា មេបញ្ជាការកងអាវុធហត្ថខេត្ត បានបញ្ជាផ្ទាល់ដល់កម្លាំងជំនាញខេត្ត និងស្រុក ឲ្យចុះធ្វើការស្រាវជ្រាវស្វែងរកជនសង្ស័យ និងសម្ភារបាត់បង់តាមនីតិវិធី ។
តាមរយៈការសហការស្រាវជ្រាវយ៉ាងយកចិត្តទុកដាក់ទាំងថ្ងៃទាំងយប់អស់រយៈពេល១១ថ្ងៃ ដោយមិនខ្លាចនឿយហត់ ប្រកបដោយបទពិសោធន៍ ក្រោមការដឹកនាំផ្ទាល់របស់លោកវរសេនីយ៍ឯក ទូច អីុណាន និងការយកចិត្តទុកដាក់របស់ជំនាញអាវុធហត្ថខេត្តសៀមរាប និងខេត្តកណ្តាល ក៏បានកំណត់ទីតាំងលាក់ខ្លួនរបស់ជនសង្ស័យ ។ នៅថ្ងៃទី១៥ ខែមិថុនា កម្លាំងកងរាជអាវុធហត្ថខេត្តកណ្តាល បានសហការជាមួយកម្លាំងកងរាជអាវុធហត្ថលើផ្ទៃប្រទេស និងកងរាជអាវុធហត្ថខេត្តសៀមរាប បានឃាត់ខ្លួនជនសង្ស័យឈ្មោះ នឿន ណាត នៅបន្ទប់ជួលស្ថិតក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប តាមដីកាបញ្ជាឱ្យចូលខ្លួនលេខ០១១ ដកបចខ/១៨ ចេញដោយព្រះរាជអាជ្ញានៃអយ្យការអមសាលាដំបូងខេត្តកណ្តាល និងដោយមានការសម្របសម្រួលពីព្រះរាជអាជ្ញាអមសាលាដំបូងខេត្តសៀមរាប ពាក់ព័ន្ធនឹងករណីក្លែងឯកសណ្ឋានអាវុធហត្ថប្រើប្រាស់អាវុធខុសច្បាប់ ឆបោក និងក្លែងឯកសារសាធារណៈ ។
ជាមួយនឹងការចាប់ឃាត់ខ្លួននេះ សមត្ថកិច្ចបានដកហូតវត្ថុតាងរួមមាន កាំភ្លើងខ្លី១ដើមម៉ាកកា៥៩ លេខ០៨៧៤ បង់១ គ្រាប់៣គ្រាប់ សំបុត្របញ្ជាក់កំណើត១សន្លឹក អត្តសញ្ញាណប័ណ្ណជាតិខ្មែរថតចម្លង១សន្លឹក ពាក្យស្នើសុំស្នាក់នៅបណ្តោះអាសន្ន១សន្លឹក សេចក្តីចម្លងសំបុត្របញ្ជាក់កំណើត២សន្លឹក កាបូបស្ពាយពណ៌ខ្មៅ១ខោអាវឯកសណ្ឋានមួយចំនួន និងសម្ភារមួយចំនួនទៀត ។ ជនសង្ស័យ ត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្តកណ្តាល ដើម្បីបន្តចាត់ការតាមនីតិវិធី ៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
