គង់ ចាន់ស្រីមុំ ដាក់លក់សម្លៀកបំពាក់ឡៃឡុងក្នុងថ្ងៃនេះហើយ!

ភ្នំពេញ៖ ប៉ុន្មានថ្ងៃមុននេះ អ្នកម្ដាយហាសូ ដែលជាអតីតតារាសម្ដែងដ៏មានប្រជាប្រិយភាពអ្នកនាង គង់ ចាន់ស្រីមុំ បានប្រកាសក្ដែងៗថាខ្លួននឹងដាក់លក់សម្លៀកបំពាក់មួយទឹកក្នុងពេលឆាប់ៗខាងមុននេះ។  

ជាក់ស្ដែង នៅរសៀលថ្ងៃនេះ អ្នកនាង នឹងដាក់ដំណើរការលក់ជាផ្លូវការនៅក្នុងហាងនាងផ្ទាល់ ដែលមានរយៈពេលត្រឹមតែ ២ថ្ងៃប៉ុណ្ណោះ គឺថ្ងៃ១៦ ១៧ នេះតែម្ដង ។ ដំណឹងនេះបានធ្វើឲ្យប្រិយមិត្តអន្ទះសា រង់ចាំទិញទំនិញរបស់នាង​ ព្រោះតែសម្លៀកបំពាក់ទាំងនោះសុទ្ធសឹងតែនៅថ្មីស្អាត នឹងមានម៉ាកល្បីៗទៀតផង ។

ហើយជាពិសេសជាងនេះទៀតនោះ ការជួយទិញខោអាវឡៃឡុងរបស់អ្នកនាង គង់ ចាន់ស្រីមុំ ហាក់បីដូចជាបានចូលរួមចំណែក ជួយការងារសង្គមដូច្នេះដែរ ព្រោះថវិកាដែលបានពីការលក់ទាំងអស់នោះ អ្នកនាងនឹងយកជូនមន្ទីរពេទ្យគន្ធបុប្ផាទាំងអស់តែម្ដង។  

គួររម្លឹកដែរថា នេះជាលើកទី២ហើយ ដែលតារាស្រីរូបនេះបានដាក់លក់របស់ប្រើប្រាស់ឡៃឡុងដើម្បីុរកថរិកាជូនសង្គម ហើយទង្វើនេះត្រូវបានទស្សនិកជនលាន់មាត់សរសើរសឹងគ្រប់គ្នា ៕

• គង់ ចាន់ស្រីមុំ
• រូបភាព
• តារាខ្មែរ