រាជធានីភ្នំពេញ ៖ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាល រាជធានីភ្នំពេញ កាលពីថ្ងៃទី១៣ មិថុនា ២០១៨ បានធ្វើការស្រាវជ្រាវ និងឈានដល់ការឃាត់ខ្លួនជនសង្ស័យចំនួន០៣ នាក់ នៅចំណុចហាងកាហ្វេ៧៧៧ ផ្លូវលេខ២៧៨ សង្កាត់បឹងកេងកង២ ខណ្ឌចម្ការមន រាជធានីភ្នំពេញ ពាក់ព័ន្ធឆក់ទ្រព្យសម្បត្តិប្រជាពលរដ្ឋតាមផ្លូវសាធារណៈ និងរក្សារទុកដោយខុសច្បាប់នូវសារធាតុញៀន ព្រទាំងប្រើប្រាស់គ្រឿងញៀនផងដែរ។
ជនសង្ស័យមានទាំង៣នាក់នោះរួមមាន៖ ១.ឈ្មោះ ចាន់ ចំរើន ហៅវី ហៅសុខ ចំរើន ហៅ កួយ ភេទប្រុស អាយុ២៦ឆ្នាំ មុខរបរមិនពិតប្រាកដ ស្នាក់នៅផ្ទះលេខ៣៥៨ ផ្លូវលេខមិនចាំ សង្កាត់ទួលទំពូងទី២ ខណ្ឌចម្ការមន រាជធានីភ្នំពេញ។ ២.ឈ្មោះ ឃួន វត្ថានី ភេទប្រុស អាយុ២២ឆ្នាំ មុខរបរ មិនពិតប្រាកដ មានទីលំនៅផ្ទះលេខ១៩៨ឈ ផ្លូវលំ ភូមិបូរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ។ និង៣.ឈ្មោះ រស់ ច័ន្ទសុភា ភេទប្រុស អាយុ៣៥ឆ្នាំ មុខរបរលក់ដូរ មានទីលំនៅបូរីឈូកមាស ផ្លូវលេខ២០១១ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ក្រោយពីឃាត់ខ្លួនជនសង្ស័យបានសារភាពប្រាប់សមត្ថកិច្ចថា កន្លងមកពួកទើបបានធ្វើសកម្មភាព ឆក់ចំនួន២លើក លើកទី១.ឆក់កាបូបយួរដៃពណ៌ប្រផេះ មិនបានសម្រេចនៅចំណុចផ្លូវលេខ៣៩៤ កែងផ្លូវលេខ១៤៣ ជិតសណ្ឋាគារឡឺម៉ុង សង្កាត់បឹងកេងកងទី២ ខណ្ឌចម្ការមន រាជធានីភ្នំពេញ កាលពីវេលាម៉ោង១០ព្រឹក ថ្ងៃទី១២ មិថុនា ២០១៨។ ជនរងគ្រោះឈ្មោះ ធឺរីស៊ីតា លីអូប៉ូដូ ភេទស្រី អាយុ៧០ឆ្នាំ ជនជាតិអូស្ត្រាលី ជាភ្ញៀវទេសចរណ៍ កាន់លិខិតឆ្លងដែនលេខ N២១២១៥២៧ ស្នាក់នៅសណ្ឋាគារ ឡឺម៉ុង សង្កាត់បឹងកេងកងទី២ ខណ្ឌចម្ការមន រាជធានីភ្នំពេញ។ និងលើកទី២ អំពើលួចមានស្ថានទម្ងន់ទោស ឆក់ទូរស័ព្ទដៃនៅចំណុចភ្លើងស្តុបអតីតមន្ទីរពេទ្យចិន មហាវិថីព្រះមុន្នីវង្ស សង្កាត់បឹងកេងកង២ ខណ្ឌចម្ការមន រាជធានីភ្នំពេញ កាលពីវេលាម៉ោង៣រសៀល ថ្ងៃទី១២ មិថុនា ២០១៨ ជនរងគ្រោះជាជនជាតិចិន ភេទស្រី មិនបានដាក់ពាក្យបណ្តឹងដល់សមត្ថកិច្ចទេ។
វត្ថុតាងចាប់យកម៉ូតូមួយគ្រឿងម៉ាក SUZUKI NEX ពណ៌ស-ត្រួយចេក ឆ្នាំផលិត២០១៥ ពាក់ស្លាកលេខ ភ្នំពេញ ១CD-២៣៣៩ និងមួយគ្រឿងទៀតម៉ាក HONDA Scoppy ពណ៌ស ស៊េរីឆ្នាំ ២០១៨ ពាក់ស្លាកលេខភ្នំពេញ ១GX-៣៥៣២ ជាមធ្យោបាយជិះធ្វើសកម្មភាព។ ក្នុងនោះក៏មានជាប់ពាក់ព័ន្ធម្សៅក្រាមពណ៌សថ្លា ចំនួន០៣ថង់តូច ជាសារធាតុញៀន ប្រដាប់កែច្នៃសម្រាប់ប្រើប្រាស់គ្រឿងញៀនមួយចំនួន ទូរសព្ទ័ដៃ២គ្រឿង ម៉ាកIPone5s ១គ្រឿង និងម៉ាកNOKIA ១គ្រឿង ព្រមទាំងសម្ភារមួយចំនួនទៀត។ ជនសង្ស័យទាំង៣នាក់ រួមនឹង វត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]