តម្រងនោមជាសរីរាង្គមួយដ៏សំខាន់ខ្លាំងណាស់ ដែលមានតួនាទីជួយដល់ការច្រោះជាតិពុល តែមនុស្សមួយចំនួនមិនបានថែទាំវាឲ្យបានល្អនោះទេ។ បញ្ហាតម្រងនោម អាចបង្កឲ្យកើតមានជំងឺជាច្រើនដូចជា ជំងឺទឹកនោមផ្អែម ការឡើងសំពាធឈាម និងជំងឺបេះដូង ជាដើម។
ដូច្នេះអាហារខាងក្រោមទាំង៧នេះ នឹងជួយដល់សុខភាពតម្រងនោម បើអ្នកចង់ប្រើប្រាស់វាឲ្យបានយូរ។
១. ការបរិភោគទឹក
ទឹក ជាប្រភពដ៏សំខាន់ដែលសរីរាង្គកាយយើងទាំងមូលចាំបាច់ប្រើប្រាស់ខ្វះពុំបាន។ អ្នកត្រូវចាំថា ក្នុងខ្លួនប្រាណយើងគ្រប់កន្លែង សរុបទៅមានជាតិទឹករហូតដល់ ៧០ភាគរយ។ ដូច្នេះអ្នកគប្បីហូបទឹកយ៉ាងតិចណាស់ឲ្យបានពី ២ ទៅ៣លីត្រ (ឬ៦ ទៅ៨កែវ) ក្នុងមួយថ្ងៃ។ ការបរិភោគទៀងទាត់ជារៀងរាល់ថ្ងៃជួយដល់ការនាំនូវជាតិពុលចេញពីក្នុងខ្លួន ព្រោះបើទុកជាតិពុលទាំងនោះអាចបង្កបញ្ហាដល់តម្រងនោមដូចជារលាកតម្រងនោម គ្រួសក្នុងតម្រងនោម ជាដើម។
២. ការបរិភោគក្រូច
ផ្លែក្រូច ផ្តល់វីតាមីនសេ (C) យ៉ាងច្រើន ដែលខ្លួនប្រាណយើងត្រូវការជាចាំបាច់ ដើម្បីការពារការរលាក និងប្រឆាំងនឹងការឆ្លងមេរោគ ហើយធ្វើឲ្យអង់ទីគ័រយើងរឹងមាំនិងមានសុខភាពល្អ។ ដូច្នេះការហូបផ្លែក្រូចជារៀងរាល់ថ្ងៃក្រោយពេលបរិភោគអាហាររួច នឹងផ្តល់ជាជំនួយក្នុងការរក្សាសុខភាពតម្រងនោមរបស់លោកអ្នកឲ្យបានល្អ។
៣. ការបរិភោគម្ទេសប្លោក
ម្ទេសប្លោកមានផ្ទុកនូវសារធាតុប៉ូតាស្យូមតិចតួច ហើយសំបូរទៅដោយវីតាមីន A, C និងជាតិកាកសរសៃជាច្រើន។ វាជាប្រភពនៃថ្នាំធម្មជាតិដែលជួយដល់អ្នកជំងឺដែលមានបញ្ហាតម្រងនោម។ ប្រសិនបើអាច ការហូប ម្ទេសប្លោកឆៅអាចទទួលបាននូវសារជាតិដែលបានរៀបរាប់ខាងលើយ៉ាងច្រើន។
៤. ការបរិភោគផ្លែប៉ោម
ការបរិភោគផ្លែប៉ោមជារៀងរាល់ថ្ងៃ ជួយដល់សុខភាពតម្រងនោមរបស់អ្នកបានយ៉ាងងាយស្រួលហើយពុំចាំបាច់ត្រូវទៅបន្ទប់ទឹកញឹកញាប់ដូចការហូបទឹកឡើយ។ ផ្លែប៉ោម ប្រៀបបីដូចជាថ្នាំធម្មជាតិដែលវាជួយលាងសម្អាតតម្រងនោម ហើយពិសេសទៅទៀតនោះវាមានសារធាតុប្រឆាំងនឹងការខូចខាតកោសិកាហៅថា អង់ទីអុកស៊ីដង់ ដែលអាចជួយការពារអ្នកពីជំងឺមហារីកទៀតផង។
៥. ការបរិភោគផ្សិត
ផ្សិត ជាប្រភពដ៏សំខាន់នៃវីតាមីន D ដែលវាជាសារធាតុរ៉ែដ៏សំខាន់ ហើយមានការសិក្សាស្រាវជ្រាវជាច្រើន បញ្ជាក់ថាផ្សិតជួយរក្សានូវលំនឹងនៃតួនាទីរបស់តម្រងនោមនិងការពារតម្រងនោមពីជំងឺទាំងឡាយ។
៦. ការបរិភោគផ្កាស្ពៃ ស
បើសិនយើងនិយាយពីការហូបបន្លែវិញនោះ ផ្កាស្ពៃស ជារុក្ខជាតិដ៏សំខាន់ក្នុងការជួយសំអាតតម្រងនោម ព្រោះវាសំបូរនូវវីតាមីន C និង សារជាតិកាកសរសៃជាច្រើន។ សារធាតុចិញ្ចឹមទាំងពីរប្រភេទនេះ ជាប្រភពដ៏សំខាន់សំរាប់រាងកាយយើងក្នុងការប្រឆាំង និងជម្រុះចោលសារធាតុពុលចេញពីតម្រងនោម។ ដូច្នេះអ្នកគួររួមបញ្ចូលនូវបន្លែនេះក្នុងរបបអាហារប្រចាំថ្ងៃ។
៧. ការបរិភោគខ្ទឹម
បើទោះបីខ្ទឹម ពិបាកលេប និងមានរសជាតិមិនឆ្ងាញ់ក៏ដោយ ប៉ុន្តែវាមាននូវសារៈប្រយោជន៍ដល់សុខភាពជាច្រើន។ រសជាតិហឺររបស់ខ្ទឹម ជាភ្នាក់ងារដ៏សំខាន់ក្នុងការប្រឆាំងនឹងការរលាកទាំងឡាយ។ ពិសេសទៅទៀត វាអាចជួយដល់ការកាត់បន្ថយនូវបរិមាណកូលេស្តេរ៉ុលឲ្យនៅទាប រក្សាសំពាធឈាម និងដំណើរការតម្រងនោមឲ្យនៅធម្មតា៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]