ខេត្តកណ្តាល៖ បុរសអាណិកជនខ្មែរម្នាក់បានត្រូវក្រុមគ្រួសារបញ្ជូនមកមន្ទីរពេទ្យកាល់ម៉ែតដើម្បីសង្រ្គោះជីវិត បន្ទាប់ពីត្រូវជនមិនស្គាល់មុខយកកណ្តៀវអារ.កក្នុងបន្ទប់ទឹក កាលពីវេលាម៉ោង១០យប់ ថ្ងៃទី២៧ វិច្ឆិកា ឆ្នាំ២០១១ នៅភូមិតាពេជ ឃុំក្រាំងយ៉ូវ ស្រុកស្អាង ។បុរសរងគ្រោះក្នុងហេតុការណ៍នេះឈ្មោះប្រាក់ ថា អាយុ៦៤ឆ្នាំ ជាអាណិកជនខ្មែរនៅប្រទេសអូស្រ្តាលី មានប្រពន្ធឈ្មោះស្រស់ ស្រីនាង អាយុ៣១ឆ្នាំ មុខរបរសម្អាងការ ស្នាក់នៅភូមិតាពេជ ឃុំក្រាំងយ៉ូវ ស្រុកស្អាង ខេត្តកណ្តាល និងមានកូនស្រីម្នាក់អាយុ២ឆ្នាំ។
តាមសាច់ញាតិកូនក្មួយជនរងគ្រោះនិយាយថា នៅវេលាម៉ោងជាង៩យប់ថ្ងៃទី២៧ វិច្ឆិកា បុរសរងគ្រោះបានចូលបន្ទប់ទឹក បន្តិចក្រោយមកស្រាប់តែឮសំឡេងស្រែកឱ្យជួយហាក់ដូចជាមាននរណាចាប់វាយ។ ពេលនោះសាច់ញាតិនាំគ្នាទៅមើលក៏ឃើញបុរសរងគ្រោះដេកដួលលើឥដ្ឋយកដៃអោបបំពង់ក ព្រមទាំងមានឈាមហូរចេញដូចគេអារ.កមាន់។ ភ្លាមៗនោះ ក្រុមគ្រួសារក៏បានបញ្ជូនជនរងគ្រោះទៅមន្ទីរពេទ្យបង្អែកស្រុកស្អាង ប៉ុន្តែដោយសារមុខរបួសធ្ងន់ធ្ងរពេកក៏បានបញ្ជូនបន្តទៅមន្ទីរពេទ្យកាល់ម៉ែត ទាំងយប់។ នៅកន្លែងកើតហេតុគេរកឃើញកណ្តៀវមួយនិងមួកមួយ ដែលសង្ស័យថា ជារបស់ជនដៃដល់។
សាច់ញាតិជនរងគ្រោះបានបញ្ជាក់ថា កន្លងមកក្រុមគ្រួសារបុរសរងគ្រោះមិនដែលមានទំនាស់ជាមួយអ្នកណាទេ ហើយបុរសរងគ្រោះជាអាណិកជនខ្មែររស់នៅប្រទេសអូស្រ្តាលីតែបានមករស់នៅជាមួយប្រពន្ធឈ្មោះស្រស់ ស្រីនាង រហូតបានកូនស្រីស្រស់ស្អាតម្នាក់ ហើយប្រពន្ធមានមុខរបរជាអ្នកសម្អាងការ និងមានផ្ទះថ្មក្រោមឈើលើ។
បុរសអាណិកជនខ្មែរដែលត្រូវជនមិនស្គាល់មុខចាប់អារ.កនោះ ត្រូវបានលោកវេជ្ជបណ្ឌិតនៅមន្ទីរពេទ្យកាល់ម៉ែតជួយសង្រ្គោះជីវិតដោយធ្វើការវះកាត់និងដេរបំពង់កឡើងវិញ តែទោះជាយ៉ាងណានៅកំពុងតាមដានស្ថានភាពបន្តទៀត។សមត្ថកិច្ចបានសន្និដ្ឋានជាជំហានដំបូងថា ជាករណីគំនុំច្រើនជាងករណីប្លន់ ព្រោះជនរងគ្រោះគ្មានសម្ភារអ្វីជាប់ខ្លួនដែលធ្វើឱ្យចោរប្លន់នោះទេ ខណៈពេលចូលបន្ទប់ទឹកនោះ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]