បរទេស៖ ការដែលបញ្ជូនមនុស្សទៅរស់នៅលើភពអង្គារ មិនមែនត្រឹមតែជារឿងប្រឌិតទៀតនោះទេ ដោយអង្គការ NASA និងភ្នាក់ងារអវកាសផ្សេងៗទៀតជុំវិញពិភពលោក រួមជាមួយអ្នកវិទ្យាសាស្ត្រ និងអ្នកស្រាវជ្រាវឯករាជ្យផងដែរ កំពុងធ្វើការយ៉ាងសកម្ម ដើម្បីដឹងថាតើគេត្រូវធ្វើយ៉ាងដូចម្ដេចខ្លះ ដើម្បីបញ្ជូនមនុស្សទៅកាន់ភពអង្គារបាន។ ការដែលទៅដល់ភពអង្គារគឺជាបញ្ហាដ៏ធំមួយមែន ក៏ប៉ុន្តែបញ្ហាផ្សេងៗជាច្រើនទៀតក៏នៅតែមានផងដែរដូចជា ការសាងសង់ទីលំនៅ បង្កើតប្រភពនៃអាហារ និងសម្របខ្លួនទៅនឹងបរិយាកាសនៃភពនោះ ក៏ប៉ុន្តែបញ្ហាធំជាងគេនោះគឺការបន្តពូជនៅលើភពនោះ។
នៅក្នុងការស្រាវជ្រាវមួយ ដែលធ្វើឡើងដោយក្រុមអ្នកវិទ្យាសាស្ត្រអន្តរជាតិ គេបានពិនិត្យទៅលើបញ្ហាផ្សេងៗដែលគេនឹងជួបប្រទះនៅពេលគេធ្វើការបន្តពូជនៅលើភពអង្គារ។ វាគឺជារឿងដ៏គួរឲ្យប្រថុយមួយពិតមែន ក៏ប៉ុន្តែបើសិនជាគេអាចធ្វើវាបានសម្រេច គេនឹងអាចបង្កើតពូជមនុស្សថ្មីមួយបានជាមិនខាន។
អ្នកវិទ្យាសាស្ត្របានមើលទៅលើបញ្ហាប្រឈមជាច្រើន ហើយបញ្ហាធំមុនគេដែលគេបានមើលឃើញនោះគឺ ការមានផ្ទះពោះនៅលើបរិស្ថានមួយ ដែលមានទំនាញខ្សោយជាងផែនដីដល់ទៅ ៣ដង។ ដោយសារភាពអន់ខ្សោយនៃទំនាញនេះ អាចឲ្យការមានផ្ទះពោះក្លាយជារឿងដ៏ពិបាកមួយបាន។
ការរស់នៅក្នុងបរិស្ថានដែលមានទំនាញខ្សោយជាងផែនដី ៣ដងនេះ នឹងនាំឲ្យអ្នករស់នៅលើភពអង្គារជួបបញ្ហាសុខភាពជាច្រើន។ អ្នកវិទ្យាសាស្ត្រដឹងពីរឿងនេះ ដោយសារតែគេបានត្រួតពិនិត្យពីសុខភាពរបស់អវកាសយានិកទាំងឡាយ ដែលបានប្រើពេលជាច្រើនខែនៅលើទីអវកាស។ ការដែលនៅទីអវកាសយូរដោយអវកាសយានិកទាំងនោះ បាននាំឲ្យសាច់ដុំពួកគេរួមតូច និងឆ្អឹងពួកគេចុះទន់ខ្សោយ។ លើសពីនេះទៅទៀត អវកាសយានិកមួយចំនួនក៏បានជួបបញ្ហាចក្ខុ និងខ្លះទៀតថែមទាំងមានការផ្លាស់ប្ដូរទៅលើរូបរាងនៃខួរក្បាលទៀតផង។
នេះគ្រាន់តែជាបញ្ហាដែលមនុស្សវ័យជំទង់មានសុខភាពល្អជួបប៉ុណ្ណោះ។ គេនៅមិនទាន់ដឹងប្រាកដថាម្ដាយនៅលើភពអង្គារ អាចមានផ្ទៃពោះបានគ្រប់ខែ ដោយមិនជួបប្រទះនឹងបញ្ហា ឬអត់ផង។
នៅក្នុងការស្រាវជ្រាវនេះផងដែរ អ្នកវិទ្យាសាស្ត្របានលើកឡើងថា អ្នកដែលទៅរស់នៅលើភពអង្គារនឹងត្រូវបោះបង់ចោលអារម្មណ៍ស្នេហា ដើម្បីផ្ដោតទៅលើការបន្តពូជជាធំ។ ដៃគូនីមួយៗនឹងត្រូវបាន គេផ្គូផ្គងដោយមើលទៅលើរាងកាយរបស់ពួកគេជំនួសឲ្យការស្រលាញ់គ្នា។ បុគ្គលមួយចំនួននឹងត្រូវបានគេហាមឃាត់មិនឲ្យមានកូនឡើយ បើសិនជាគេមានលក្ខណៈមិនល្អ ដែលវាអាចនឹងនាំឲ្យមានបញ្ហាដល់មនុស្សនៅទីនោះបាន។
អ្នកវិទ្យាសាស្ត្រក៏បានលើកឡើងដែរថា ការកែប្រែហ្សែនរបស់កូនៗដែលកើតនៅលើភពអង្គារ នឹងអាចបង្កើនភាគរយនៃការរស់នៅបានយ៉ាងច្រើន។ ការកែប្រែហ្សែនដែលដកចេញនូវលក្ខណៈមិនល្អផ្សេងៗនៃមនុស្ស នឹងអាចជារឿងដ៏ល្អមួយពិតមែន ក៏ប៉ុន្តែពីមួយជំនាន់ទៅមួយជំនាន់ មនុស្សនៅលើភពអង្គារនឹងក្លាយទៅជាពូជមនុស្សថ្មីមួយទៀត ដែលអាចត្រឹមរស់នៅលើភពអង្គារ និងមិនអាចរស់នៅលើផែនដីបាននោះទេ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]