រាជធានីភ្នំពេញ ៖ ក្មេងប្រុសម្នាក់ពិតជាមានដំណើរជីវិតកម្សត់គួរឲ្យអាណិតអាសូរខ្លាំងណាស់ ដោយសារតែរូបគេជាក្មេងរស់នៅក្នុងស្ថានភាពតែលតោលគ្មានទីពឹងឡើយ។
ក្រោយយពីឪពុកម្ដាយលែងលះគ្នា បានចែកកូនគ្នាម្នាក់១ ដោយបុរសជាឪពុកបានយករូបគេ ទៅរស់នៅជាមួយ នៅឯខេត្តកំពង់ស្ពឺ។ ចំណែកស្ត្រីជាម្ដាយបានសម្រេចចិត្តយកបងស្រីរបស់គេម្នាក់ ទៅនៅជាមួយ និងបានចាកចេញពីខេត្តកំពង់ស្ពឺ ទៅរស់នៅផ្ញើប្រាណជាមួយបងស្រីនៅក្នុង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។ ហើយអ្វីដែលនឹកស្មានមិនដល់នោះគឺឪពុក ជាមនុស្សញៀនថ្នាំមិនអាចមើលថែដិតដល់ឡើយ មិនតែប៉ុណ្ណោះចុងក្រោយបានបណ្ដេញរូបគេ ចេញពីផ្ទះព្រោះគ្មានលទ្ធភាពចិញ្ចឹម។
បន្ទាប់មកបានជិះម៉ូតូ១គ្រឿងដឹកកូនប្រុសរូបនេះទៅទម្លាក់ចោល នៅក្នុងភូមិសាស្ត្រ សង្កាត់ចោមចៅ៣ រួចជិះម៉ូតូគេចខ្លួនទៅបាត់តែម្ដង។ តាមប្រភពព័ត៌មានបានឲ្យ ដឹងថា ក្មេងប្រុសខាងលើបានត្រូវអ្នករត់ម៉ូតូឌុបប្រទះឃើញដើរកាលវេលាម៉ោង៥ និង៣០នាទីល្ងាច ថ្ងៃទី២៥ ខែឧសភា ឆ្នាំ២០១៨ នៅតាមផ្លូវអូរដឹមកប់ស្រូវ ស្ថិតនៅក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ដោយមានការសង្ស័យព្រោះឃើញរូបគេដើរ មានទឹកមុខ ស្លេកស្លាំង និងភិតភ័យ ទើបអ្នករត់ម៉ូតូឌុបហៅសួរនាំហើយបានដឹងថារូបគេវង្វេងផ្លូវរកផ្ទះម្ដាយមិនឃើញ ក៏បានហៅនគរបាលឲ្យជួយនាំយកទៅកាន់សាលាសង្កាត់ចោមចៅ៣ ដើម្បីនាំទៅរកម្ដាយ។ ប្រភពដដែលបានបន្តទៀតថា ក្មេងប្រុសអភ័ព្វរូបនេះឈ្មោះ ប្រុស រតនា ហៅ ហេង រស្មី អាយុ១២ឆ្នាំ មានឪពុកឈ្មោះ ហ៊ុន ប្រុស អាយុប្រហែល៣៩ឆ្នាំ មុខរបរកម្មករសំណង់។ បើតាមការអះអាងរបស់ ក្មេងប្រុសនេះថា បុរសជាឪពុកគឺជាមនុស្សម្នាក់ញៀនថ្នាំ រស់នៅម្ដុំផ្សារក្រាំងចេក ស្រុកឧដុង្គ ខេត្តកំពង់ស្ពឺ។ ចំណែកម្ដាយឈ្មោះ អៀង សុខថន ហៅនាង អាយុ៣១ឆ្នាំ មុខរបរលក់ផ្លែឈើ នៅផ្ទះមានកូនស្រីច្បង អៀង ស្រីណុច អាយុ១៤ឆ្នាំ កំពុងរស់នៅជាមួយម្ដាយ ដែលស្នាក់អាស្រ័យនៅជាមួយបងស្រី និងត្រូវអ៊ុំក្មេងប្រុសនេះ ស្ថិតនៅក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ប្រភពខាងលើបានបន្តថា ប៉ុន្តែអ្វីដែលរឹតតែមានការហួសចិត្ត ថែមមួយតង់ទៀតនោះ គឺក្រោយពេលសួរនាំដឹងពីកន្លែដែលម្ដាយស្នាក់នៅហើយ មន្ត្រីសាលាសង្កាត់ចោមចៅ៣ រួមជាមួយភ្នាក់ងារកាសែត Fresh news ម្នាក់គឺលោក ក្រូច វណ្ណា បានជូនក្មេងប្រុសកម្សត់រូបនេះទៅរកម្ដាយទាំង យប់ ហើយក៏បានរកឃើញតាមបំណងមែន។ ប៉ុន្តែពេលនោះបែរជាម្ដាយមិនអាចទទួលឲ្យកូនប្រុសរូបនេះឲ្យរស់នៅជាមួយ និងផ្ដល់ភាពកក់ក្ដៅ បានឡើយ ព្រោះតែមានរនាំងមួយបិទបាំងសេរីភាព និងសិទ្ធិជិតឈឹងតែម្ដងនោះ គឺភាពទីទ័លក្រ ដោយស្ត្រីជាម្ដាយគ្មានផ្ទះសម្បែងដើម្បីរស់នៅខ្លួនឯងឡើយ។
សព្វថ្ងៃគឺបានរស់នៅអាស្រ័យជាមួយ បងស្រីបង្កើតដែលត្រូវជាអ៊ុំក្មេងប្រុសរូបនេះ ហើយស្ត្រីជាអ៊ុំនោះបានបដិសេធដាច់អហង្ការ មិនឲ្យក្មេងប្រុសរូបនេះនៅជាមួយទេ ដែលសង្ស័យមិនចង់បន្ថែមបន្ទុកមួយទៀតហើយមើលទៅ។ មិនតែប៉ុណ្ណោះ បាននិយាយទៅកាន់មន្ត្រីសង្កាត់ចោមចៅ៣ និងអ្នកសារព័ត៌មានម្នាក់ដែលខំជូនទៅ នោះថា «ចង់យកក្មេងប្រុសនេះទៅណាក៏យកទៅពួកគាត់មិនទទួលស្គាល់ឡើយ»។
បន្ទាប់ពីបានឮបែបនេះមន្ត្រីទាំងនោះមានការហួសចិត្តខ្លាំងណាស់ ក៏បាននាំក្មេងប្រុសរូបនេះត្រឡប់ទៅផ្ញើនៅស្ថានីយវិទ្យុABC ជាបណ្ដោះអាសន្នសិន។ ចំណែកស្ត្រីជាម្ដាយខណៈនោះចង់ឲ្យកូនរស់នៅក្បែរខ្លាំងណាស់ ប៉ុន្តែដោយសារតែបញ្ហានេះហើយទើបមិនអាចទៅរួចដូច្នេះមានតែបណ្ដោយតាមយថាកម្មទៅចុះ៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
