គ្រាន់តែលេងនៅក្នុងផ្តាច់ព្រ័ត្រ UCL កីឡាករ Mane ធ្វើរឿងមួយសម្រាប់អ្នកស្រុកកំណើតគេ

សេណាហ្គាល់៖ កីឡាករ Sadio Mane បានបញ្ជូនអាវក្រុម Liverpool រាប់រយកំប្លេរទៅឲ្យអ្នកស្រុកកំណើតខ្លួនសម្រាប់ទុកពេលមើលការប្រកួតវគ្គផ្តាច់ព្រ័ត្រនៃ Champions League។

នៅក្នុងបទសម្ភាសមួយ ខ្សែប្រយុទ្ធរបស់ក្រុម Liverpool រូបនេះបាននិយាយថា ខ្លួនបានបញ្ជូនអាវជាង៣០០កំប្លេរហើយទៅកាន់ស្រុកកំណើតខ្លួន ដោយសារតែលោកចង់ឲ្យភូមិលោកទាំងអស់ក្លាយជាអ្នកគាំទ្រក្រុម Liverpool។ 

អតីតកីឡាកររបស់ក្រុម Southampton រូបនេះបានបន្តថា ភូមិរបស់លោកមានចំនួនមនុស្សនៅជាង២០០០នាក់ ហើយពួកគេបានប្រាប់លោកថា ថ្ងៃដែល Liverpool ប្រកួតនឹង Real Madrid គឺពួកគេទាំងអស់គ្នានឹងមិនទៅធ្វើការទេ ដោយសារត្រូវរៀបចំផ្ទះ នឹងទុកកម្លាំងសម្រាប់អបអរនៅពេលមើលការផ្សាយផ្ទាល់ការប្រកួតនោះ ដូច្នេះលោកក៏សម្រេចចិត្តចំណាយប្រាក់ទិញអាវសម្រាប់ឲ្យពួកគេតែម្តងទៅ។

គួរឲ្យដឹងថា Sadio Mane បានកើតនៅតំបន់ Sedhiou ប្រទេសសេណេហ្គាល់ក្នុងទ្វីបអាហ្វ្រិក ដោយរូបគេផ្ទាល់បានបង្ហាញខ្លួនឲ្យជម្រើសជាតិបាន៤៩ប្រកួត ព្រមទាំងបានស៊ុតបញ្ចូលទី១៤ដងផងដែរ៕