អូស្ត្រាលី៖ ការជួយសង្គ្រោះជីវិតទារក ២.៤លាននាក់ តាមរយៈការបរិច្ចាគឈាមក្នុងរយៈពេល៦ទសវត្សកន្លងមក បានធ្វើឲ្យលោកតាជនជាតិអូស្ត្រាលី ដែលត្រូវបានគេឲ្យឈ្មោះថា «បុរសដៃមាស» ទទួលបានកោតសរសើរពីអ្នកលេងបណ្តាញសង្គមក្នុងប្រទេសចិនរាប់ម៉ឺននាក់ កាលពីថ្ងៃអាទិត្យកន្លងទៅនេះ។
ជាក់ស្តែង ឈាមរបស់លោកតា James Harriso មានផ្ទុកអង់ទីករកម្រិតខ្ពស់ដ៏កម្រម្យ៉ាង ដែលអាចយកមកផលិតជាឱសថប្រឆាំងជំងឺឈាមកកដែលកើតឡើងលើទារកទើបនឹងកើត។ ជំងឺដែលអាចបណ្តាលឲ្យមានគ្រោះថ្នាក់ដល់ជីវិតនេះ កើតឡើងនៅពេលដែលម្តាយ និងទារកមិនទាន់កើត មានប្រភេទឈាមមិនស៊ីគ្នា ឬប្រឆាំងនឹងគ្នា។
ទោះជាយ៉ាងណា កាលពីថ្ងៃសុក្រកន្លងទៅនេះ គេបានប្រកាសថា លោកតាមិនអាចបរិច្ចាគឈាមបានទៀតទេ ព្រោះបើតាមច្បាប់ប្រទេសអូស្ត្រាលី ប្រជាពលរដ្ឋអាចបរិច្ចាគឈាមបានយ៉ាងច្រើនត្រឹមអាយុ ៨១ឆ្នាំតែប៉ុណ្ណោះ។
លោកតា Harrison បានប្រាប់ទៅកាន់សារព័ត៌មាន Sydney Morning Herald ថា៖
«វាគឺជាថ្ងៃដ៏សោកសៅមួយសម្រាប់ខ្ញុំ។ វាជាថ្ងៃបញ្ចប់នៃរឿងដែលខ្ញុំបានធ្វើជាយូរមកហើយ។»
លោកតាជនជាតិអូស្ត្រាលី ដែលបានបរិច្ចាគឈាមស្ទើរតែរាល់សប្តាហ៍ និងសរុបច្រើនជាង ១,១៧៣ ដងនេះ ត្រូវបានខាងមន្ទីរផ្តល់សេវាឈាមកាកបាទក្រហម ប៉ាន់ប្រមាណពីចំនួនជីវិតមនុស្សដែលលោកបានជួយសង្គ្រោះផងដែរ។
លោកតាបាននិយាយទៀតថា៖
«ខ្ញុំនឹងនៅតែបន្តបរិច្ចាគឈាមរបស់ខ្ញុំ បើសិនជាពួកគេនៅតែអនុញ្ញាតឲ្យខ្ញុំធ្វើ។ »
គួរបញ្ជាក់ថា កាលពីលោក Harrison មានអាយុ១៤ឆ្នាំ លោកធ្លាប់បានធ្វើការវះកាត់សួត ហើយពេលនោះលោកបានបញ្ជូលឈាមដែលបរិច្ចាគពីមនុស្ស១៣នាក់ផ្សេងគ្នា។ ចាប់ពីពេលនោះមក គ្រូពេទ្យក៏បានរកឃើញថា ឈាមរបស់លោកមានផ្ទុកសារធាតុដែលកម្រនេះតែម្តង។
ចាប់តាំងពីឆ្នាំ ១៩៦៧ មក ថ្នាំប្រឆាំងជំងឺដែលកើតលើទារកឈ្មោះថា Anti-D នោះចំនួន៣លានដប ត្រូវបានផលិតចេញពីឈាមរបស់លោកតា Harrison ដែលវាបានផ្តល់ជាប្រយោជន៍យ៉ាងសំខាន់ទៅកាន់មនុស្សទូទាំងប្រទេស រួមទាំងកូនស្រី និងចៅប្រុសរបស់លោកតាផងដែរ។
គួរបញ្ជាក់ថា នៅក្នុងប្រទេសអូស្ត្រាលី មានមនុស្សតែ៥០នាក់តែប៉ុណ្ណោះ ដែលតែងតែទៅបរិច្ចាកឈាមជាប្រចាំដូចលោកតា Harrison ហើយសង្ឃឹមថានៅពេលឆាប់ៗខាងមុខ នឹងមានអ្នកដែលអាចបំបែកកំណត់ត្រារបស់លោកតាបាន។
រឿងរ៉ាវរបស់លោក Harrison ត្រូវបានផ្សព្វផ្សាយពាសពេញក្នុងប្រទេសចិន ហើយក៏ទទួលបានការកោតសរសើរ និងស្ញប់ស្ញែង ពីពួកគេជាច្រើនផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]