រាជធានីភ្នំពេញ ៖ មនុស្សមួយក្រុមមានគ្នា៥ទៅ៦នាក់ក្រោយពីចេញពីផឹកស៊ី នៅផ្ទះមេប៉ុស្តិ៍ប៉ូលិសប៉ុស្តិ៍រដ្ឋបាលទឹកថ្លា ខណ្ឌសែនសុខ ហើយម្នាក់ៗសុទ្ធតែស្រវឹងជោកជាំរៀងៗខ្លួនបានជិះរថយន្ត សុទ្ធតែស៊េរីទំនើបៗឆ្លងកាត់បញ្ជរបង់ប្រាក់មួយកន្លែងតាម បណ្តោយផ្លូវ២០០៤ ប៉ុន្តែមិនបង់ប្រាក់ថ្លៃផ្លូវនោះទេ ថែមទាំងបើករថយន្តប៉ះបារ៉ាសបញ្ជរបង់ប្រាក់ទៀតផង ធ្វើឱ្យបុគ្គលិកនៅកន្លែងបញ្ជរបង់ប្រាក់ដេញតាមកាក់ រថយន្តទាំងអស់នោះឱ្យឈប់ដើម្បីសួរនាំ និងឱ្យបង់ប្រាក់ ប៉ុន្តែបែរជាមនុស្សមួយក្រុមនោះបង្កជម្លោះវាយតប់គ្នាទៅវិញ ទៅមក ជាមួយបគ្គលិកបញ្ជរបង់ប្រាក់ ធ្វើឱ្យភាគីទាំង២រងរបួសបែកមុខមាត់ទាំងសងខាង និងភ្លាមនោះមានអ្នកកាសែតទៅថតរូប ស្រាប់តែបុរសម្នាក់ ជាក្រុមកោងកាចចេះធ្វើភ្លើ និងត្រូវជាកូនប្រសារបស់ឧកញ៉ាម្នាក់ក្របួច.កអាវអ្នកកាសែត និងដកហូតម៉ាស៊ីនថត។
ហេតុការណ៍ខាងលើបានកើតឡើងកាលពីវេលាម៉ោង១០និង៥ នាទីយប់ថ្ងៃទី៩ មីនា ២០១២ នៅចំណុចបញ្ជរបង់ប្រាក់ផ្លូវលេខ២០០៤ ក្នុងសង្កាត់ទឹកថ្លា ខណ្ឌសែនសុខ ។ ប្រភពព័ត៌មានពីកងរាជអាវុធហត្ថខណ្ឌសែនសុខ ដែលបានចុះធ្វើអន្តរាគមន៍បង្ហើបឱ្យដឹងថា មនុស្សមួយក្រុមមានគ្នា៥ទៅ៦នាក់ បានចេញពីពិធីជប់លៀងនៅផ្ទះលោកប៉ែន ថុល មេប៉ុស្តិ៍ប៉ូលិសរដ្ឋបាលទឹកថ្លា ស្រវឹងជោកជាំជិះរថយន្តសុទ្ធតែស៊េរីទំនើបៗធ្វើដំណើរតាមបណ្តោយ ផ្លូវ២០០៤ ពីលិចទៅកើត ស្រាប់តែមកដល់កន្លែងបញ្ជរបង់លុយ ពួកគេឈប់បង់លុយថ្លៃផ្លូវតម្លៃជាង១ពាន់រៀលនោះទេ មានន័យថា រថយន្តថ្លៃ តែចរិតអត់ថ្លៃ ហើយថែមទាំងបើកប៉ះបារ៉ាស់ថែមទៀត ។ ឃើញបែបនេះបុគ្គលិកបញ្ជរបង់ប្រាក់ក៏ជិះម៉ូតូដេញតាមពីក្រោយ រួចកាក់រថយន្ដនេះឱ្យឈប់ ហើយសួរនាំពីមូលហេតុដែលមិនបង់លុយថ្លៃផ្លូវ ។
សួរនាំមិនទាន់ចប់ស្រួលបួលផង ស្រាប់តែមនុស្សជិះក្នុងរថយន្ដដែលមានចរិតអន់បានចេញវាយតប់ មកលើបុគ្គលិកបញ្ជរបង់ប្រាក់ប្រាវៗតែម្ដង ធ្វើឱ្យឆាកប្រយុទ្ធរវាងមនុស្សមួយក្រុមដែលអន់ចរិត និងបុគ្គលិកបញ្ជរបង់ប្រាក់ដែលមានគ្នាច្រើនដែរកើតឡើងភ្លាមៗ។ ពេលនោះអ្នកកាសែតម្នាក់បានចុះទៅយកព័ត៌មាន ដោយគ្រាន់តែថតយកសកម្មភាពបានចំនួន១ប៉ុស្ដិ៍ប៉ុណ្ណោះ ស្រាប់តែស្ដ្រីម្នាក់នៅក្នុងចំណោមមនុស្ស មួយក្រុមដែល អន់ចរិតខាងលើ បានស្ទុះមកដកយកម៉ាស៊ីនថតពីអ្នកកាសែតដោយនិយាយគំរាមថា អ្នកឯងគ្មានសិទ្ធិថតរូបពួកគេទេ។ ត្រង់នេះ យើងសូមបញ្ជាក់ថា រដ្ឋមន្ត្រី ឧបនាយករដ្ឋមន្ត្រី និងនាយករដ្ឋមន្ត្រី អ្នកកាសែតថតបានទាំងអស់ទៅតាមវិជ្ជាជីវៈ...ចុះពួកហ្នឹងជាអ្វី? បានស្រែកថា អ្នកកាសែតគ្មានសិទ្ធិថតរូបពួកគេទេ? ឬមួយក៏ពួកហ្នឹងមិនយល់មិនចេះអីសោះ? ពេលនោះដែរ មានមនុស្សប្រុស៣នាក់ដោយម្នាក់បានស្ទុះមកក្របួច.កអាវអ្នកកាសែត ទាញយកម៉ាស៊ីនថតបម្រុងនឹងបោកចោល ឯ២នាក់ទៀតឈរនៅអមសងខាងអ្នកកាសែត។ ទោះបីបែបណា ដោយសារតែកងរាជអាវុធហត្ថខណ្ឌសែនសុខ បានចុះទៅអន្ដរាគមន៍ទាន់ពេលវេលា ហើយបានទាមទារយកម៉ាស៊ីនថតពីជនចរិតអន់ មោឃសុទ្ធនោះ ឱ្យអ្នកកាសែតវិញ។
ក្រោយពីកើតហេតុនិងសមត្ថកិច្ចចុះធ្វើអន្ដរាគមន៍ទើបដឹងថា មនុស្សមួយក្រុមបង្កជម្លោះវាយតប់ខាងលើ មានមនុស្សខ្លះធ្វើការនៅក្រុមហ៊ុនមួយដែលម្ចាស់ក្រុមហ៊ុនជាពិធី ករនៅស្ថានីយទូរទស្សស៊ី-ធី-អិន។ តែទោះបីជាយ៉ាងណា ម្ចាស់ក្រុមហ៊ុននេះបានឆ្លើយបដិសេធថា មិនពាក់ព័ន្ធជាមួយការវាយតប់រវាងមនុស្សអន់ចរិតខាងលើនោះទេ បើទោះបីមនុស្សមួយក្រុមនោះបានបង្កជម្លោះនៅមុខទីតាំងនិងរត់ចូលទៅ ក្នុងក្រុមហ៊ុននោះក៏ដោយ។
ដោយឡែកប្រភពព័ត៌មានពីកងរាជអាវុធហត្ថខណ្ឌសែន សុខបានឱ្យដឹងថា ក្រោយពីកើតរឿង១យប់ ព្រឹកឡើងកងរាជអាវុធហត្ថខណ្ឌបានកោះហៅភាគីបង្កជម្លោះ ឱ្យទៅធ្វើការដោះស្រាយ ព្រោះម្ចាស់បញ្ជរបង់ប្រាក់បានប្ដឹង ដោយសារបុគ្គលិករបស់គេបានរងរបួសបែកមុខមាត់ចំនួន២នាក់។ ទោះបីបែបណាការ ដោះស្រាយបានត្រឹមភាគីបង្កជម្លោះសុំទោសម្ចាស់ និងបុគ្គលិកបញ្ជរបង់ប្រាក់ប៉ុណ្ណោះ។ចំពោះរឿងនេះ បានបញ្ចប់ទៅដោយមានការជ្រោមជ្រែងពីលោកមេប៉ុស្ដិ៍ទឹកថ្លា ជាអ្នកចេញមុខសុំទោសជំនួសក្រុមជនអន់ចរិត ហើយបើតាមដឹងបុរសដែលក្របួច.កអាវអ្នកកាសែត និងដកម៉ាស៊ីនថតបម្រុងបោកចោលនោះ គឺជាកូនប្រសារបស់លោកឧកញ៉ាម្នាក់ដែលទើបតែភ្ជាប់ពាក្យរួច និងត្រៀមរៀបការឆាប់ៗនៅថ្ងៃខាងមុខនេះ។ ឆ្ងល់ដែរ រស់នៅក្នុងត្រកូលគ្រួសារខ្ពង់ខ្ពស់ប្រើប្រាស់របស់ថ្លៃៗ ហេតុម៉េចមិនប្រើអត្តចរិតខ្ពង់ខ្ពស់ ថ្លៃថ្នូរផងទៅ? បែរជាចូលចិត្តប្រើចរិតទាប និងថោកទៅវិញ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
