ស៊ុយអែតគ្រោងនឹងធ្វើផ្លូវល្បឿនលឿនដំបូងគេបង្អស់ ដែលអាចឲ្យរថយន្តដឹកទំនិញប្រភេទអគ្គិសនី បើកបណ្តើរសាកថ្មបណ្តើរ (មានវីដេអូ)

ស៊ុយអែត៖  ប្រទេសស៊ុយអែតនឹងគ្រោងបើកផ្លូវអគ្គិសនីដំបូងគេបង្អស់ដែលអនុញ្ញាតឱ្យឡានដឹកទំនិញបើកបរដោយខ្លួនឯង  ហើយអាចសាកថ្មបណ្តើរបើកបណ្តើរ ឲ្យបាននៅត្រឹមឆ្នាំ ២០៣០។

ផ្លូវអគ្គិសនីនោះគឺផ្លូវរត់រវាងអាកាសយានដ្ឋានស្តុកហូម (Stockholm) និងទីតាំងស្តុកទំនិញ ដែលនឹងដាក់ឲ្យធ្វើចរាចរណ៍ដែលមានប្រវែង ២គីឡូម៉ែត្រ ហើយនឹងគ្រោងបង្កើតផ្លូវល្បឿនលឿន ឬហាយវ៉េ ប្រវែង ២០ ០០០ គីឡូម៉ែត្រនៅក្នុងប្រទេសរបស់ខ្លួនទៀតផង។

ផ្លូវអគ្គិសនីនេះត្រូវបានដំឡើងតាមបណ្តោយផ្លូវមួយ រវាងស្ថានីយទំនិញ Arlanda Cargo Terminal និងតំបន់ Rosersberg នៅខាងក្រៅ Stockholm ។

ថាមពលអគ្គិសនី ត្រូវបានផ្ទេរពីផ្លូវ ដែលមានដែកពីរដាក់បណ្តោយតាមផ្លូវទៅ ភ្ជាប់ទៅនឹងបាតរបស់រថយន្តស្រដៀងទៅនឹងរថភ្លើងអគ្គិសនី ឬរថភ្លើងយ៉ាងអីចឹងដែរ។ 

ដូចនេះ រថយន្តដឹកទំនិញទាំងនោះ អាចធ្វើការសាកថ្មរថយន្តរបស់ខ្លួននៅពេលវាធ្វើដំណើរ ដោយនឹងមិនចាំបាច់ព្រួយបារម្ភធ្វើដំណើរឆ្ងាយទៅកាន់កន្លែងសាកថ្មទៀតទេ។

ពួកគេក៏បានបញ្ជាក់ទៀតថា បច្ចុប្បន្នវាត្រូវបានរចនាឡើងសម្រាប់រថយន្តដឹកទំនិញ ប៉ុន្តែនៅពេលអនាគតវាក៏អាចសាកជាមួយរថយន្ត និងឡានក្រុងផងដែរ។

លោក Hans Säll ប្រធានក្រុមហ៊ុន eRoadArlanda និងនាយកអភិវឌ្ឍន៍ពាណិជ្ជកម្មនៅ NCC បានមានប្រសាសន៍ថា៖ "បញ្ហាសំខាន់បំផុតនៃការធ្វើផ្លូវអគ្គិសនីនេះ គឺយើងត្រូវធ្វើយ៉ាងណាឲ្យក្លាយជាការពិត ដើម្បីឲ្យការដឹកជញ្ជូនទំនិញប្រើប្រាស់តែអគ្គិសនីបានហើយ និងមិនឲ្យរថយន្តប្រើប្រេងឥន្ធនៈដឹកទំនិញទៀតទេ"៕

សូមទស្សនាវីដេអូនៅខាងក្រោម៖

• ឡាន
• អនាគត