រឿងខ្នាតធំ ដែលយក់ ថិតរដ្ឋា និងស្វាមី ថតរួមគ្នា ជិតចាក់បញ្ចាំងហើយ ក្រោយបាត់មុខក្នុងវិស័យសម្តែង យូរឆ្នាំ

ភ្នំពេញ៖ កាលពីប៉ុន្មានម៉ោងមុននេះ តារាចម្រៀងស្រីប្រចាំផលិតកម្មថោន អ្នកនាង យក់ ថិតរដ្ឋា បានបង្ហោះផ្ទាំងរូបភាព ខ្សែភាពយន្តមួយ ដែលមាន វត្តមានស្វាមីរបស់អ្នកនាងគឺ លោក ឃុំ ប៉ុណ្ណាដែត ចូលរួមសម្ដែង ដែលធ្វើឲ្យមហាជន ក៏ដូចជាអ្នកគាំទ្រមានការភ្ញាក់ផ្អើលយ៉ាងខ្លាំង។

ជាក់ស្ដែង កន្លងមកតារាចម្រៀងគូស្វាមីភរិយាមួយគូនេះ ធ្លាប់បានទទួលការគាំទ្រជាខ្លាំង មិនថានៅក្នុងវិស័យចម្រៀង ឫក៏សម្ដែងនោះទេ ជាពិសេសការសម្ដែងនៅក្នុងខ្សែភាពយន្តរឿង ‹‹ ខ្មោចនាងភូមរី ›› ដែលជាខ្សែភាពយន្តទទួលបានការចាប់អារម្មណ៍ខ្លាំងបំផុត។

ជាមួយគ្នានេះដែរ បន្ទាប់ពីអ្នកទាំងពីរបាន សម្រេចចិត្ត​រៀបអាពាហ៍ពិពាហ៍មក ក៏បានផ្អាកពីសិល្បៈសម្ដែងមួយនេះ ប៉ុន្តែថ្មីៗនេះ ស្រាប់តែគូស្វាមីភរិយាគំរូមួយគូនេះ បានមករួមដៃគ្នា សម្ដែងក្នុងខ្សែភាពយន្តថ្មី រឿង ‹‹ចិញ្ចៀនខ្មោច›› ដែលជាខ្សែភាពយន្តបែបភ័យរន្ធត់ ដូចរឿងមុនដែរ ហើយរឿងនេះនឹងត្រៀមបញ្ចាំងតាមរោងភាពយន្តនានា នៅថ្ងៃទី៣១ ខែឧសភា ២០១៨ ខាងមុខនេះ។

ទោះជាយ៉ាងណាក្ដី គេរំពឹងថាការវិលមកវិស័យសម្ដែងរបស់ តារាចម្រៀង អ្នកនាង យក់ ថិតរដ្ឋា និង លោក ឃុំ ប៉ុណ្ណាដែត នឹងទទួលបានការគាំទ្រជាថ្មី ដូចខ្សែភាពយន្តដែលអ្នកទាំងពីរធ្លាប់បានសម្ដែងរួមគ្នាកន្លងមក៕ 

• យក់ ថិតរដ្ឋា
• ឃុំ ប៉ុណ្ណាដែត
• តារាខ្មែរ