រាជធានីភ្នំពេញ ៖ ម៉ូតូចំនួន៤គ្រឿង និងរថយន្តចំនួន២គ្រឿង រួមជាមួយមនុស្ស៣នាក់ ត្រូវរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍បុរសម្នាក់ស្រវឹងបើករថយន្តមួយគ្រឿង RX300 បើកបុករះ រួចព្យាយាមបើករត់គេចតាំងពីចំណុចមុខបុរីប៉េង ហួត តាមបណ្តោយផ្លូវជាតិលេខ១ ខណ្ឌច្បារអំពៅ ដល់ចំណុចផ្លូវ៦០ម៉ែត្រ ខណ្ឌមានជ័យ កាលពីវេលាម៉ោង១៤និង៣០នាទី ថ្ងៃទី២១ ខែមេសា ឆ្នាំ២០១៨ ។
ម៉ូតូដែលរងការខូចខាតមានម៉ូតូរ៉ឺម៉កដឹកទុយោមួយគ្រឿង ម៉ូតូគុបជ្រុងមួយគ្រឿង , ម៉ូតូស្គុបពីមួយគ្រឿង , ម៉ូតូស្មាសវីមួយគ្រឿង , រថយន្តដឹកខ្សាច់ធុនធំមួយគ្រឿង រួមជាមួយរថយន្ត២គ្រឿងទៀត ។
អ្នកឃើញហេតុការបានឲ្យដឹងថា មុនពេលកើតហេតុគេឃើញរថយន្តបង្កម៉ាកRX300 ពណ៌ខ្មៅពាក់ ស្លាកលេខភ្នំពេញ 2L-3636 បើកបរដោយបុរសម្នាក់ ក្នុងស្ថានភាពស្រវឹងជោគ តាមបណ្ដោយផ្លូវជាតិលេខ១ ក៏បានរេចង្កូតទៅប៉ះរ៉ឺម៉កដឹកទុយយោមួយគ្រឿង បណ្តាលឲ្យរងការខូចខាត តែមិនមានអ្នករបួស ហើយរថយន្តមិនបានឈប់ទេ ក៏បន្ថែមល្បឿនបន្តទៅមុខក៏បុកនឹងម៉ូតូគុបជ្រុងមួយគ្រឿងដែលជិះធ្វើដំណើរដោយក្មេងស្រីម្នាក់ បណ្តាលឲ្យរបួសស្រាល ។
ភ្លាមនោះរថយន្តមិនបានឈប់ឡើយក៏បន្តបើករត់ទៅបុកនឹងម៉ូតូស្គុបពីមួយគ្រឿងទៀត បណ្ដាលឲ្យអ្នកជិះរងរបួសស្រាល ហើយរថយន្តបន្តទៅមុខបុកនឹងរថយន្តដឹកដីធំធុនមួយគ្រឿងទៀត នៅចំណុចគល់ស្ពានព្រះមុន្នីវង្សចាស់ ។
ក្រោយបុករួច រថយន្តបន្តល្បឿនបើកឆ្លងស្ពាន រហូតដល់ចំណុចផ្លូវ៦០ម៉ែត្រ ស្ថិតក្នុងភូមិសាស្ត្រខណ្ឌមានជ័យ ក៏ទៅបុកនឹងរថយន្តម៉ាសស្តា នគរបាលមួយគ្រឿងផ្សេងទៀត បណ្តាលឲ្យបុរសម្នាក់រងរបួសបាក់ភ្លៅស្តាំ ។ ដោយឡែករថយន្តបង្កត្រូវរងការខូចខាតផ្នែកខាងមុខយ៉ាងដំណំ ទើបមិនអាចបន្តដំណើរទៅមុខរួចទៀត ។ បន្ទាប់ពីកើតហេតុភ្លាមៗ កម្លាំងនគរបាលខណ្ឌច្បារអំពៅ សហការជាមួយនគរបាលខណ្ឌច្បារអំពៅចុះទៅអន្តរាគមន៍ឃាត់បុរសខាងលើ ដល់ចំណុចផ្លូវ៦០ម៉ែត្រភ្លាម ខណៈមានប្រជាពលរដ្ឋជាច្រើនមានការខឹងសម្បាជាមួយបុរសរូបនោះជាខ្លាំង នឹងអាចឈានដល់កើតមានហិង្សាក៏ថា បាន ប្រសិនបើកម្លាំងសមត្ថកិច្ចទៅអន្តរាគមន៍មិនទាន់ ។
យ៉ាងណាមិញ បច្ចុប្បន្នទាំងរថយន្តបង្ក និងយានយន្តក៏ដូចជា យានជំនិះជនរងគ្រោះត្រូវបានកម្លាំងសមត្ថកិច្ចមូលដ្ឋានទាំង២ខណ្ឌ សហការជាមួយជំនាញ អូសយកទៅរក្សាទុកនៅការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមនីតិវិធីច្បាប់នៅពេលក្រោយ ។
សូមបញ្ជាក់ថា ក្នុងហេតុការណ៍គ្រោះថ្នាក់ចរាចរណ៍ខាងលើនេះជនរងគ្រោះមួយចំនួនដែលរងរបួសពីដំបូង ពិសេសរងរបួសស្រាល មិនបានមកដាក់ពាក្យបណ្តឹងនៅអធិការខណ្ឌនោះទេ ពោលពួកគាត់រងរបួសគួរសម ទើបសម្រេចមិនប្តឹងផ្តល់ ហើយត្រឡប់ទៅវិញដោយខ្លួនឯង ខណៈមិនទាន់ដឹងថា រថយន្តបង្កត្រូវសមត្ថកិច្ចឃាត់បាន ។
យ៉ាងណាមិញ បច្ចុប្បន្នរថយន្តបង្ករួមទាំងអ្នកបើកត្រូវបានចាប់ខ្លួន ដូច្នេះប្រសិនបើបងប្អូនដែលត្រូវរងគ្រោះក្នុងគ្រោះថ្នាក់ខាងលើនេះ អាចទៅដាក់ពាក្យបណ្តឹងនៅការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញបាន ព្រោះរឿងនេះបានបញ្ចូនឲ្យនគរបាលការិយាល័យខាងលើ ជាអ្នកទទួលបន្ទុកបន្តនីតិវិធី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]