ពិតជាមិននឹកស្មានដល់ថា រ៉ូបូតទាំង២នេះ អាចបង្កើតកៅអីឈើមួយបានយ៉ាងល្អ ប្រើពេលត្រឹម ២០នាទីប៉ុណ្ណោះ (មានវីដេអូ)

សិង្ហបុរី៖ នៅសាកលវិទ្យាល័យបច្ចេកវិទ្យា Nanyang (NTU) នៃប្រទេសសិង្ហបុរី បានរកឃើញបច្ចេកវិទ្យាមួយដែលអាចឲ្យរ៉ូបូត (Robot) ចំនួន២ធ្វើការរួមគ្នា ដើម្បីបង្កើតជាកៅអីឈើមួយ ដែលចំណាយពេលត្រឹម ២០នាទីប៉ុណ្ណោះ ដែលវាអាចធ្វើបានដូចទៅនឹងមនុស្សយើងដែរ។

ការតំឡើងកៅអីឈើមួយដែលចំណាយពេលត្រឹមតែរយៈពេល ២០នាទី គឺពិតជាមិនគួរឲ្យជឿ តែរ៉ូបូតរបស់ NTU អាចធ្វើវាចេញឡើងបានដែលយើងមិនសរសើរមិនបាន ដោយវាធ្វើឡើងដោយប្រើសមាសធាតុឈើដ៏ល្អ ដែលជាកៅអីឈើម៉ាក Stefan ដ៏រឹងមាំរបស់ក្រុមហ៊ុនលក់គ្រឿងសង្ហារិម IKEA។

NTU បាននិយាយថា៖ "សម្រាប់មនុស្សយន្តផលិតកៅអីរបស់ IKEA ជាមួយភាពជាក់លាក់នេះ គឺមានភាពស្មុគស្មាញជាងអ្វីដែលយើងមើលឃើញទៅទៀត។ រ៉ូបូតត្រូវដឹងពីកន្លែងផ្គុំ និងរើសបំណែកឈើឲ្យបានត្រឹមត្រូវ​ ដោយប្រើចលនាដៃម្ខាងៗ ដើម្បីប្រមូលបំណែក និងរៀបបំណែកឈើផ្គុំគ្នាដើម្បីបង្កើតជាកៅអីមួយឲ្យបានល្អបំផុតតាមដែលអាចធ្វើបានដោយខ្លួនឯង"។

ខាងក្រោមនេះជារូបភាព និងសកម្មភាពវីដេអូនៃការផលិតកៅអីរបស់រ៉ូបូត៖​

ឥឡូវនេះ សាកលវិទ្យាល័យបច្ចេកវិទ្យា Nanyang (NTU) បាននិងកំពុងធ្វើការលើការបង្កើតមនុស្សយន្តមួយប្រភេទទៀត ដែលមានសមត្ថភាពកម្រិតខ្ពស់ ដែលអាចប្រមូលផ្តុំកៅអី ដោយគ្រាន់តែសម្លឹងមើលសៀវភៅណែនាំ  ឬគំរូរួចជាស្រេច។ វាក៏កំពុងគ្រោងធ្វើការជាមួយក្រុមហ៊ុន ឧស្សាហកម្មរថយន្ត និងយន្តហោះផងដែរ៕

• វិទ្យាសាស្រ្ត