អាជ្ញាធរវៀតណាមបានចុះឃាត់កន្លែងផលិតកាហ្វេមួយ ដែលយកថ្មពិលលាយជាមួយកាហ្វេ

វៀតណាម៖ អាជ្ញាធរវៀតណាមបានចុះឃាត់កន្លែងផលិតកាហ្វេលក្ខណៈគ្រួសារមួយ ដែលបានផលិតកាហ្វេគុណភាពទាប និងប្រើសារធាតុផ្សំដែលអាចនាំឲ្យមានគ្រោះថ្នាក់ដូចជា ថ្មពិល ដី និងធូលីថ្ម។

កាលពីល្ងាចថ្ងៃចន្ទសប្ដាហ៍នេះ ប៉ូលិសខេត្ត Dak Nong បានឆ្មក់ចូលឆែកឆេរកន្លែងទីតាំងផលិត ក្រោយមានការផ្ដល់ដំណឹងពីប្រជាពលរដ្ឋរស់នៅក្នុងតំបន់ថា គេបានឃើញមានសកម្មភាពគួរឲ្យសង្ស័យកំពុងកើតមានឡើង។

នៅក្នុងចំណោមសារធាតុផ្សំដែលគេបានរកឃើញនោះគឺ ធូលីខ្មៅដែលគេយកចេញពីថ្មពិល ៣៥គីឡូក្រាម ទឹកខ្មៅ ១ធុង និងថ្មពិល ២ធុង។

ម្ចាស់កន្លែងផលិតកាហ្វេនេះដែលមានឈ្មោះ Nguyen Thi Loan បាននិយាយថា គាត់បានទិញគ្រាប់កាហ្វេ និងសម្បកកាហ្វេគុណភាពអន់ដែលកន្លែងផ្សេងៗមិនទទួលទិញ។ បន្ទាប់មកគាត់បានយកគ្រាប់កាហ្វេ និងសម្បកទាំងនោះ យកមកលាយជាមួយដី ធូលីថ្ម ហើយជាចុងក្រោយយកមកជ្រលក់ពណ៌ជាមួយធូលីខ្មៅៗដែលគេដកចេញពីថ្មពិល។

គាត់បានសារភាពថា គាត់បានធ្វើរឿងនេះអស់រយៈពេលជាច្រើនឆ្នាំមកហើយ ហើយនៅឆ្នាំនេះគាត់បានលក់កាហ្វេនេះបាន៣តោនរួចមកហើយ។

ប្រទេសវៀតណាមគឺជាប្រទេសដែលនាំចេញកាហ្វេដ៏ធំមួយ។ នៅឆ្នាំ ២០១៤ មានជនជាតិវៀតណាមយ៉ាងតិចណាស់ ២,៦លាននាក់ដែលធ្វើការនៅកន្លែងផលិតកាហ្វេ។ ការកើនឡើងនៃឧស្សាហកម្មកាហ្វេនេះ បានដើរតួយ៉ាងសំខាន់មួយក្នុងការផ្លាស់ប្ដូរសេដ្ឋកិច្ចរបស់ប្រទេសនេះ៕

ខាងក្រោមជាវីដេអូនៃការចុះឃាត់កន្លែងផលិតកាហ្វេនេះ៖

• អាហារ
• វីដេអូ