ចិន៖ មុនពេលក្លាយខ្លួនជាបុរសសាច់ដុំដូចជាសព្វថ្ងៃនេះ លោក Zhang Shuai ដែលជានិស្សិតនៃវិទ្យាស្ថានបច្ចេកវិទ្យា Heilongjiang ក្នុងទីក្រុង Harbin ខេត្ត Heilongjiang ប្រទេសចិន ធ្លាប់ជាបុរសធាត់ម្នាក់ ដែលមានក្បាលពុះញ៉ុកខ្លាញ់តែម្តង។
យោងទៅតាមសារព័ត៌មាន China Daily បានឲ្យដឹងថា និស្សិតវ័យ២២ឆ្នាំ ដែលមានការងារក្រៅម៉ោងជាគ្រូបង្វឹកកាយសម្បទានរូបនេះ បានជួបគ្រោះថ្នាក់ចរាចរណ៍មួយកាលពី២ឆ្នាំមុន ដែលបានធ្វើឲ្យលោកឡើងទម្ងន់រហូតដល់ទៅ ៤០គីឡូក្រាម នៅក្នុងរយៈពេលតែ៦ខែប៉ុណ្ណោះ។
ការឡើងគីឡូយ៉ាងសន្ធឹកនេះ បានជះឥទ្ធិពលយ៉ាងខ្លាំងនៅលើលោក Zhang ព្រោះកាលពីមុន លោកគឺជាកីឡាករបាល់បោះដ៏ល្បីល្បាញប្រចាំសាលារបស់លោកតែម្តង។
ចុងក្រោយ លោកក៏បានសម្រេចចិត្ត ជាមួយការតាំងចិត្តខ្ពស់ ក្នុងការធ្វើលំហាត់ប្រាណ និងតមអាហារ ដើម្បីឲ្យរូបរាងរបស់លោកប្រសើរឡើងវិញ។
ត្រឹមតែកន្លះឆ្នាំបន្ទាប់ពីលោកបានចាប់ផ្តើមហាត់ប្រាណនោះ លោកក៏បានសម្រេចក្តីស្រម៉ៃ ជាមួយរូបរាងដ៏ល្អឥតខ្ចោះ ព្រោះលោកបានស្រករហូតដល់ទៅ៣០គីឡូក្រាមឯណោះ។
លើសពីនេះទៅទៀត លោកក៏បានក្លាយជាកីឡាករកាយសម្ព័ន្ធ រហូតបានឈ្នះក្នុងការប្រកួតថ្នាក់ខេត្តផងដែរ។
លោក Zhang ផ្ទាល់បាននិយាយថា៖
«ជាក់ស្តែង ការប្រឹងប្រែងមួយនេះ ធ្វើឲ្យខ្ញុំឈានដល់គោលដៅមួយ ដែលមិនត្រឹមតែស្រកទម្ងន់តែប៉ុណ្ណឹងទេ។ ខ្ញុំបានផ្លាស់ប្តូររបបអាហារដែលមិនល្អសម្រាប់សុខភាព ហើយរូបរាងខាងក្រៅរបស់ខ្ញុំក៏កាន់តែប្រសើរឡើងថែមទៀតផងដែរ។»
ការតស៊ូប្រឹងប្រែងរហូតឈានដល់ក្តីស្រមៃរបស់លោក Zhang បានចូលរួមជម្រុញទឹកចិត្តគ្រប់គ្នាឲ្យតស៊ូ ប្រឹងប្រែង ដើម្បីសម្រេចក្តីស្រមៃរបស់ខ្លួន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]