ប្រធានក្លិប Juventus ចោទអាជ្ញាកណ្តាលថាលំអៀងទៅខាង Real Madrid

អេស្ប៉ាញ៖ អ្នកគ្រប់គ្រងក្លិប Juventus មានការខឹងសម្បារជាខ្លាំងក្រោយក្រុមរបស់លោកបានធ្លាក់ពី Champions League កាលពីយប់មិញ។

លោក Andrea Agnelli បាននិយាយប្រាប់អ្នកសារព័ត៌មានក្រោយចប់ការប្រកួតថា លោកមានការអាក់អន់ចិត្តជាខ្លាំងដែលលោកអាជ្ញាកណ្តាលផ្តល់បាល់១១ម៉ែត្រទៅកាន់ក្រុម Real Madrid ខណៈដែលការប្រកួតបានជិតបញ្ចប់ទៅហើយ។

អ្នកគ្រប់គ្រងក្លិបសញ្ជាតិអ៊ីតាលីរូបនេះបានបន្តថា ក្រុម Juventus បានខិតខំហ្វឹកហាត់ រៀបចំកីឡាករតាំងពីដើមរដូវកាល ដើម្បីក្របខ័ណ្ឌ Champions League មួយនេះ ប៉ុន្តែចុងក្រោយសុបិននេះត្រូវរលាយខ្ចាត់ខ្ចាយដោយសារតែការសម្រេចចិត្តរបស់លោកអាជ្ញាកណ្តាលមួយរូបនោះទៅវិញ។

អ្នកគ្រប់គ្រងក្លិបវ័យ៤២ឆ្នាំរូបនេះបានបន្តទៀតថា នេះមិនមែនជាលើកទីមួយទេដែលក្រុមអាជ្ញាកណ្តាលបានលំអៀងទៅកាន់ Real Madrid។

កាលពីជើងទីមួយ កីឡាករ Paulo Dybala ត្រូវបានលោកអាជ្ញាកណ្តាលផ្តល់កាតក្រហមបណ្តេញចេញពីប្រកួតសម្រាប់កំហុសតូចតាចមួយសោះ ហើយក្នុងការប្រកួតកាលពីយប់មិញវិញ អាជ្ញាកណ្តាលផ្តល់កាតក្រហមដល់អ្នកចាំទីឆ្នើម Gianluigi Buffon ដោយគ្រាន់តែការតវ៉ាបន្តិចបន្តួចប៉ុណ្ណោះ។

លោក Agnelli បានហៅការសម្រេចចិត្តរបស់អាជ្ញាកណ្តាលកាលពីយប់មិញថា មិនសមហេតុផលទាល់តែសោះ ហើយលោកបានជម្រុញឲ្យសហព័ន្ធ UEFA មានការទទួលខុសត្រូវលើការហ្វឹកហាត់អាជ្ញាកណ្តាលឲ្យមានការកាត់សេចក្ដីល្អជាងមុន៕