Andre Gomes សុំ Barcelona ចាកចេញពីក្លិប ខណៈ Man Utd កំពុងតាមចែចូវ

អេស្ប៉ាញ៖ ខ្សែបម្រើរបស់ក្រុម Barcelona កីឡាករ Andre Gomes បានប្រកាសជាសាធារណៈថារូបគេចង់ចាកចេញពីក្លិប ក្រោយពីទម្រង់លេងរបស់គេបានធ្លាក់ចុះយ៉ាងខ្លាំងក្រោយពីផ្លាស់ប្តូរមកកាន់ទឹកដី Camp Nou។

កីឡាករវ័យ២៤ឆ្នាំរូបនេះបានផ្លាស់ប្តូរក្លិបមកកាន់ក្រុម Barcelona តាំងពីឆ្នាំ២០១៦ មកម្ល៉េះ ដោយបានបង្ហាញខ្លួនបាន៤៤ប្រកួត ប៉ុន្តែក្នុងរដូវកាលនេះ ទម្រង់លេងរបស់គេបានធ្លាក់ចុះគួរឲ្យកត់សម្គាល់ ធ្វើឲ្យរូបគេបង្ហាញខ្លួនបានត្រឹមតែ២២ប្រកួតប៉ុណ្ណោះ(គ្រប់ក្របខ័ណ្ឌ)។

កីឡាករ Andre Gomes បានប្រាប់អ្នកសារព័ត៌មានថា ជីវិតរបស់គេនៅក្នុងក្លិប Barcelona គឺវាកាន់តែអាក្រក់ពីមួយថ្ងៃទៅមួយថ្ងៃ ហើយរូបគេមិនអាចទ្រាំទ្រនូវអារម្មណ៍បែបនេះបន្តទៀតបានទេ។

កីឡាករសញ្ជាតិព័រទុយហ្គាល់រូបនេះបានបន្តថា ជារឿយៗ រូបគេតែងតែលាក់ខ្លួនក្នុងផ្ទះ មិនហ៊ានចេញទៅក្រៅ ព្រោះតែរូបគេមានភាពអៀនខ្មាស់នឹងអ្នកគាំទ្ររបស់ Barcelona ដោយសារតែទម្រង់លេងមិនល្អរបស់ខ្លួននៅលើទីលាន។

ខ្សែបម្រើវ័យ២៤ឆ្នាំរូបនេះបានបន្តទៀតថា នៅពេលដែលរូបគេមានទម្រង់លេងមិនល្អក្នុងការប្រកួតម្តងៗ រូបគេមានអារម្មណ៍ឈឺចាប់ ដោយសារតែសម្ពាធពីខាងក្រៅផង ព្រមទាំងសម្ពាធពីខ្លួនឯងផងដែរ។ 

គួរឲ្យដឹងថា កីឡាករ Andre Gomes បានប្រាប់ទៅកាន់អ្នកដឹកនាំក្រុម Barcelona ថារូបគេចង់ចាកចេញពីក្លិបរួចរាល់ហើយ តែមកដល់ពេលនេះ គេមិនទាន់ឃើញខាងក្លិបប្រកាសអ្វីជាសាធារណៈនៅឡើយទេ។ 

បើតាមប្រភពព័ត៌មានខ្លះបានឲ្យដឹងថា ក្រុម Manchester United និង Juventus កំពុងតែខ្នះខ្នែងចូលចែចូវកីឡាករវ័យ២៤ឆ្នាំនេះដើម្បីឲ្យទៅលេងនៅក្លិបខ្លួន៕ 

ប្រភព៖ បរទេស