ទូច ស្រីល័ក្ខ៖ «ចូលរួម​​ឈប់​និយាយ​ពាក្យ​ថា បទ Original ទៅ ត្រូវ​និយាយ​ថា ចម្រៀង​ស្នាដៃ​កូនខ្មែរ»

(ភ្នំពេញ)៖ តារាចម្រៀង និងសម្តែងមានប្រជាប្រិយភាពអ្នកនាង ទូច ស្រីល័ក្ខ បានស្នើឲ្យមហាជនរួមទាំងយុវវ័យ ដែលគាំទ្រចម្រៀង ដែលជាស្នាដៃនិពន្ធដោយខ្មែរ បញ្ឈប់និយាយពាក្យថា «បទ Original Song» និងងាកមកប្រើពាក្យថា «បទចម្រៀងស្នាដៃកូនខ្មែរដែរនិពន្ធភ្លេងថ្មី»។

អ្នកនាង ទូច ស្រីល័ក្ខ លើកឡើងថា «អាចទេបើបងប្អូនយើងទាំងអស់គ្នា ចូលរួមឈប់និយាយពាក្យថាបទ original? ហើយយើងងាយនិយាយ ជាភាសារខ្មែររបស់ជាតិយើងវិញថា បទចម្រៀងស្នាដៃកូនខ្មែរដែរ និពន្ធភ្លេងថ្មីដោយខ្លួនឯង ព្រោះបើយើងមានបទចម្រៀងផ្ទាល់ខ្លួន ហើយបងប្អូនយើងទាំងអស់គ្នា ចូលរួមឈប់ប្រើពាក្យថា Original ជាភាសារជាតិគេទៀតបានទេ?» ។

តារាសម្តែងអ្នកនាង ទូច ស្រីល័ក្ខ បានបន្ថែមថា «ផ្តើមចេញពីបងប្អូនយើងទាំងអស់គ្នា ដើម្បីជួយលើកស្ទួយវិស័យសិល្បៈ ដើម្បីឲ្យកាន់តែមានភាពរីកចម្រើន និងទាន់សម័យទំនើបបែបខ្មែររបស់យើង បើយើងទាំងអស់គ្នា ជួយថែរក្សាអត្តញ្ញាណខ្មែររបស់យើង និងវប្បធម៌សិល្បៈរបស់យើងទាំងអស់គ្នា ពិតជាល្អណាស់សម្រាប់ក្មេងៗជំនាន់ក្រោយ ឲ្យបានយល់ដឹងឲ្យកាន់តែច្បាស់ថា វប្បធម៌ខ្មែររបស់យើងពិតជាល្អផូរផង់ណាស់» ។

ជាការពិតបច្ចុប្បន្ននេះ គេកត់សម្គាល់ឃើញមានអ្នកចម្រៀងប្រុស-ស្រី និងអ្នកនិពន្ធមួយចំនួនធំ កំពុងតែកែប្រែទម្លាប់ពីការចំឡងបទបរទេស មកចម្រៀងដោយការជ្រើសយកការផលិត និងនិពន្ធបទខ្លួនឯងវិញ ខណៈទីផ្សារចម្រៀងសព្វថ្ងៃ ក៏ទទួលបានការគាំទ្រ តាមរយៈបទ Original Song ផងនោះ។

ដោយឡែកអ្នកនាង ទូច ស្រីល័ក្ខ ក៏ជាតារាស្រីមួយដួង ដែលកំពុងចាប់យកការនិពន្ធចម្រៀង ដែលជាស្នាដៃខ្លួនផ្ទាល់ជាបន្តបន្ទាប់ផងដែរ៕

ប្រភព៖ Khmertalking

• ទូច ស្រីល័ក្ខ
• តារាខ្មែរ