មនុស្សដែលមានឈ្មោះល្បីល្បាញក្នុងប្រវត្តិសាស្ត្រ ទាំងនៅវ័យក្មេង កាលពីបុរាណ

បរទេស៖ នៅពេលឮពាក្យថា មនុស្សជោគជ័យបំផុតនៅអាយុវ័យក្មេង  មនុស្សជាច្រើនប្រាកដជាគិតពី Mark Zuckerberg, Evan Spiegel, Steve Jobs និង Bill Gates ជាដើម។ ក៏ប៉ុន្តែមានមនុស្សនៅក្នុងសម័យបុរាណជាច្រើនក៏បានទទួលជោគជ័យទាំងវ័យក្មេងដែរ។

មនុស្សខាងក្រោមនេះជាអ្នកដែលបានផ្លាស់ប្ដូរពិភពលោកនៅក្នុងសម័យរបស់គេទាំងវ័យក្មេង៖

Alexander the Great បានសម្រេចរឿងធំៗជាច្រើនបើទោះជា ទ្រង់មិនបានរស់នៅដល់អាយុចាស់ក៏ដោយ។ បន្ទាប់ពីឃាតកម្មនៃបិតារបស់ព្រះអង្គ ទ្រង់បានឡើងគ្រងរាជ្យនៅអាយុ ១៦ឆ្នាំ។ ២ឆ្នាំក្រោយមក ទ្រង់បានចាប់ផ្ដើមធ្វើសង្គ្រាមពង្រីកទឹកដី។ ទ្រង់បានកាន់កាប់ទឹកដីយ៉ាងធំក្រៃលែង គឺមានចាប់ពីប្រទេសឥណ្ឌាសព្វថ្ងៃ ទៅកាន់ប្រទេសក្រិកសព្វថ្ងៃ។ ទ្រង់មិនដែលចាញ់សមរភូមិមួយណានោះទេ ក៏ប៉ុន្តែចុងក្រោយទ្រង់បានសុគតទៅដោយសារជំងឺ នៅអាយុ ៣២ឆ្នាំ។

Augustus Caesar គឺជាអធិរាជនៃចក្រភពរ៉ូម មុនដំបូងគេបង្អស់។ ទោះជាយ៉ាងណាក៏ដោយ ការផ្សងព្រេងរបស់ទ្រង់បានចាប់ផ្ដើមមុនពេលឡើងសោយរាជ្យទៅទៀត។ ទ្រង់ត្រូវជាចៅ កូនចញ្ចឹម និងជាអ្នកស្នងរាជ្យពីអ្នកដឹកនាំ Julius Caesar។ នៅពេលដែល Julius Caesar ត្រូវបានគេធ្វើឃាត Augustus បាននិងកំពុងហ្វឹកហាត់ធ្វើជាកងទ័ព ហើយពេលឮដំណឹងភ្លាម Augustus មិនបានរត់ទៅណាទេ ផ្ទុយទៅវិញទ្រង់បានត្រឡប់ទៅដើរតួនយោបាយធម្មតានៅក្នុងព្រឹទ្ធសភា។ ១០ឆ្នាំក្រោយមកទ្រង់បានក្លាយជាអធិរាជដំបូងនៃចក្រភពរ៉ូម។

សង្គ្រាម Hundred Year បានបំផ្លិចបំផ្លាញចក្រភពបារាំងយ៉ាងខ្លាំង។ ក៏ប៉ុន្តែនៅឆ្នាំ ១៤២៩ មានក្មេងស្រីវ័យក្មេងមកពីជនបទម្នាក់បានកែប្រែរឿងនេះទាំងស្រុង។ ដោយមានការគាំទ្រពីក្រុមតូចមួយ Joan of Arc នាងបានបញ្ចុះបញ្ចូលឲ្យអ្នកគ្រប់គ្រងប្រទេសនាពេលនោះ ឲ្យផ្ដល់នាងនូវអំណាចក្នុងការគ្រប់គ្រងទាហានទាំងមូល។ នាពេលនោះនាងមានអាយុ ១៧ឆ្នាំ នាងបានកាត់សក់ឲ្យខ្លី ពាក្យអាវក្រោះ រួចជិះសេះទៅកាន់សមរភូមិយ៉ាងក្លាហាន។ ក្រោយពេល៩ថ្ងៃដែលនាងបានទៅដល់ទីក្រុង Orléans នាងបានវាយបំបែកកងទ័ពអង់គ្លេសដែលកំពុងវាយលុកទីក្រុងនាពេលនោះឲ្យដកថយ។ ជាអកុសល ២ឆ្នាំក្រោយមក នាងត្រូវបានកងទ័ពអង់គ្លេសចាប់បាន រួចធ្វើការប្រហាជីវិតដោយដុតទាំងរស់។

Mozart គឺជាក្មេងប្រុសដែលមានឈ្មោះល្បីល្បាញម្នាក់នៅសតវត្សទី ១៨។ គាត់ចាប់ដឹងក្ដីធំឡើងដោយស្ដាប់ឪពុករបស់គាត់បង្រៀនបងស្រីគាត់ពីការលេងព្យាណូ។ នៅអាយុ៥ឆ្នាំ Mozart អាចចេះតែងបទភ្លេងបានរួចទៅហើយ ដោយពេលនោះគាត់គ្រាន់តែលេងបទភ្លេង ហើយឪពុកគាត់ជាអ្នកកត់បទភ្លេងនោះទុក។ ដោយមានការជួយពីឪពុកគាត់ នៅអាយុ៨ឆ្នាំ គាត់បានបង្កើតបទភ្លេងសម្រាប់វង់តន្ត្រីមួយរួចមកហើយ។ ហើយគាត់បានដើរលេងភ្លេងសម្រាប់នៅក្នុងវាំងនាៗ ពាសពេញទ្វីបអឺរ៉ុប។នៅពេញមួយជីវិតគាត់ គាត់បានសរសេរបទភ្លេងបានជាង ៦០០ ក៏ប៉ុន្តែមិនបានចំណូលច្រើននោះទេ។ គាត់បានស្លាប់ទៅនៅអាយុ ៣៥ ឆ្នាំ។ 

នៅសតវត្សទី ១៧ អ្នកគណិតវិទូ Blaise Pascal ជាមនុស្សដែលដើរមុនជំនាន់របស់គាត់។ នៅអាយុ ១២ឆ្នាំ គាត់បានចាប់ផ្ដើមសិក្សាពីធរណីមាត្រ។ ៧ឆ្នាំក្រោយមក គាត់បានចាប់ផ្ដើមបង្កើតប្រដាប់គិតលេខដែលអាចយកតាមខ្លួនបាន។ ទោះជាយ៉ាងណាក៏ដោយ ដោយសារគាត់ដើរមុនជំនាន់គាត់លឿនពេក ប្រដាប់គិតលេខរបស់គាត់ ដែលមានឈ្មោះថា Pascaline មិនដែលរកប្រាក់បាន ១សេននោះទេ។ ក៏ប៉ុន្តែគាត់នៅតែទទួលបានជោគជ័យជាអ្នកគណិតវិទូ ទស្សនវិទូ និងរូបវិទូមួយរូបដដែល៕