ដំណឹងអាក្រក់សម្រាប់ក្រុម Man City ក្នុងពេលប៉ះក្រុម Liverpool

អង់គ្លេស៖ មហាជនជាច្រើន កំពុងតែរង់ចាំយ៉ាងអន្ទះសា សម្រាប់ការប្រកួតដ៏ធំមួយរវាងក្រុមជើងខ្លាំង Manchester City និងក្រុមហង្សក្រហម Liverpool ក្នុងព្រឹត្តិការណ៍ Champions League ដែលនឹងធ្វើឡើងនៅរាត្រីនេះ នាវេលាម៉ោង ១និង៤៥នាទីរំលងអធ្រាត្រ។

យ៉ាងណាមិញ គ្រូបង្វឹកក្រុម Manchester City លោក Pep Guardiola បានបង្ហើបពីដំណឹងអាក្រក់មួយ កាលពីប៉ុន្មានថ្ងៃមុននេះថា កីឡាករ Sergio Aguero នឹងខកខានសម្រាប់ការប្រកួតជើងទី១ នៃវគ្គ ១/៤ ផ្តាច់ព្រ័ត្រជាមួយក្រុម Liverpool ដោយសារតែ បញ្ហារបួស។

កីឡាករអន្តរជាតិអាហ្សង់ទីន បានរងរបួសជង្គង់ ក្នុងពេលធ្វើការហ្វឹកហាត់កាលពីដើមខែមុន ពេលដែលក្រុមជម្រើសជាតិរបស់ខ្លួន ធ្វើការប្រកួតមិត្តភាពកម្ដៅសាច់ដុំ។

លោក Guardiola បានបង្ហើបថា Sergio Aguero នៅសម្រាកព្យាបាលរបួស ក្នុងទីក្រុង Manchester បន្ទាប់ពីរងរបួសហើយ។

ដោយឡែក គ្រូបង្វឹកអេស្ប៉ាញរូបនេះ ក៏បានប្រាប់ដំណឹងល្អមួយដែរថា Aguero អាចវិលត្រលប់មកលេងវិញ ក្នុងពេលប្រកួតជាមួយក្រុម Manchester United នាថ្ងៃសៅរ៍សប្តាហ៍នេះផងដែរ ៕