រថយន្ត Subaru Forester ស៊េរីថ្មីនឹងអាចមើលដឹងថាអ្នកបើកបរវា កំពុងតែងងុយគេង ឬមិនមើលផ្លូវបាន

ជប៉ុន៖ ក្រុមហ៊ុន Subaru មិនសូវមានឈ្មោះល្បីខាងការបង្កើតបចេ្ចកវិទ្យាថ្មីៗសម្រាប់រថយន្តរបស់គេនោះទេ ដូចនេះហើយមានមនុស្សជាច្រើនបានភ្ញាក់ផ្អើលពេលដែលក្រុមហ៊ុននេះបានប្រកាសថា គេនឹងបំពាក់បច្ចេកវិទ្យាសម្គាល់មុខមនុស្សទៅលើរថយន្ត Forester ២០១៩ របស់គេ។ ហើយគេបានប្រកាសថាបច្ចេកវិទ្យានេះ នឹងអាចឲ្យរថយន្តនេះមើលដឹងថាអ្នកបើកវាកំពុងងងុយគេង  នឿយហត់  ឬក៏មិនចាប់អារម្មណ៍ក្នុងការបើកបរទៀតផង។

បចេ្ចកវិទ្យាថ្មីរបស់ Subaru នេះមានឈ្មោះថា EyeSight ដែលមានន័យថា ក្រសែភ្នែក។  វាមិនមែនជាបច្ចេកវិទ្យាដែលបើកបរដោយស្វ័យប្រវត្តិនោះទេ វាគ្រាន់តែជាបច្ចេកវិទ្យាដែលជួយដល់ការបើកបរ  និងបញ្ចៀសគ្រោះថ្នាក់តែប៉ុណ្ណោះ។ វាអាចគ្រប់គ្រងល្បឿនរថយន្ត និងចាប់ហ្វ្រាំងការពារការទង្គិចជាមួយរថយន្តដ៏ទៃបាន។ ហើយវាអាចដាស់តឿនអ្នកបើកបរពេលដែលងងុយ ឬមិនចាប់អារម្មណ៍ក្នុងការបើកបរ ដោយបញ្ចេញសំឡេងបានទៀតផង។

លើសពីនេះទៀតនោះ វាអាចចំណាំមុខអ្នកបើកបររបស់វាបាន ៥នាក់ ហើយអាចចាំបានថាអ្នកបើកបរនោះចង់បានទីតាំងកៅអី និងសីតុណ្ហភាពបែបណា។ ដូចនេះហើយវានៅតែអាចដំណើរការបានល្អ បើទោះបីជាអ្នកចង់ទិញប្រើជាលក្ខណៈគ្រួសារក៏ដោយ៕

• វិទ្យាសាស្រ្ត
• ឡាន