ស្ងប់ស្ងាត់ពីសិល្បៈច្រើនឆ្នាំ តែពេលនេះ ហេង ប៊ុនលាភ បង្ហាញខ្លួនជាថ្មីក្នុងរឿង «កូនពស់កេងកង» របស់ហង្សមាស!

ភ្នំពេញ៖ តារាចម្រៀង និងសម្តែងប្រុស ដែលធ្លាប់មានកេរ្តិ៍ឈ្មោះល្បីល្បាញយ៉ាងខ្លាំងលោក ហេង ប៊ុនលាភ បានស្ងប់ស្ងាត់ពីវិស័យសិល្បៈ អស់រយៈពេលជាច្រើនឆ្នាំកន្លងណាស់មកហើយ ព្រោះតែជាប់រវល់ជាមួយនឹងមុខជំនួញរបស់ខ្លួន។

ប៉ុន្តែទោះបីជា មិនបានប្រឡូកនៅក្នុងវិស័យសិល្បៈពេញទំហឹង ដូចកាលពីមុនក៏ដោយ ក៏លោកនៅតែមានអ្នកគាំទ្រជាច្រើន ទៅលើទឹកដមសំឡេង និងថ្វីដៃនៃការសម្តែងរបស់លោក ហេង ប៊ុនលាភ នៅក្នុងខ្សែភាពយន្តខ្មែរ។

ជាក់ស្តែង នៅពេលនេះលោក ហេង ប៊ុនលាភ ក៏បានបង្ហាញខ្លួនសាជាថ្មីម្តងទៀត នៅក្នុងខ្សែភាពយន្តភាគបុរាណខ្មែរគឺរឿង «កូនពស់កេងកង» របស់ស្ថានីយទូរទស្សន៍ហង្សមាស ដោយបានដើរតួ ជាតួអង្គលោក ឧកញ៉ាវិភក្ត័ ។

ឃើញបែបនេះហើយ ពិតជាធ្វើឱ្យអ្នកគាំទ្រ សប្បាយរីករាយនៅក្នុងចិត្តយ៉ាងខ្លាំង ព្រោះជិតបានទស្សនាការសម្តែងរបស់លោក ហេង ប៊ុនលាភ ក្នុងរឿងបុរាណខ្មែរទៀតហើយ នៅលើកញ្ចក់ទូរទស្សន៍ហង្សមាស ក្នុងពេលឆាប់ៗខាងមុខនេះ។

គួរឱ្យដឹងផងដែរថា តារាចម្រៀង និងតារាសម្តែងលោក ហេង ប៊ុនលាភ ធ្លាប់មានឈ្មោះបោះសំឡេងយ៉ាងខ្លាំង នៅក្នុងបទចម្រៀង «ទឹកភ្នែកស្វាមីស្រីឡង់សេ» «ជីដូនកាកី» និងនៅក្នុងរឿងភាគខ្មែរ «ពិសស្នេហ៍» ជាដើម ៕  

• ហេង ប៊ុនលាភ
• ភាពយន្ត
• តារាខ្មែរ