Aguero ប្រកាសក្ដែងៗ ពីគម្រោងចាកចេញពី Man City ដើម្បីចូលរួមជាមួយក្លិបមួយនេះ

អង់គ្លេស៖ Sergio Aguero គឺជាខ្សែប្រយុទ្ធជួរមុខរបស់ក្រុមមេឃខៀវ ក្នុងរយៈពេលប៉ុន្មានឆ្នាំចុងក្រោយ ហើយកីឡាកររូបនេះ'ក៏កំពុងតែកាន់កាប់កំណត់ត្រា រកគ្រាបបាល់ច្រើនបំផុតនៅក្នុងក្លិប Manchester City ផងដែរ។

យ៉ាងណាមិញ កាលពីថ្មីៗនេះ កីឡាកររូបនេះ បានប្រកាសក្តែងៗ អំពីគម្រោងក្នុងការចាកចេញពីកីឡាបាល់ទាត់យក្ស នៅក្នុងប្រទេសអង់គ្លេស នៅពេលដែលកិច្ចសន្យារបស់ខ្លួនជាមួយក្លិប Man City បានបញ្ចប់ទៅក្នុងឆ្នាំ ២០២០។

នៅពេលដែលកិច្ចសន្យារបស់កីឡាករវ័យ ២៩ឆ្នាំរូបនេះ នៅក្លិបមេឃខៀវផុតកំណត់ រូបគេមានបំណងចង់ចូលរួម ជាមួយអតីតក្លិបនៅក្នុងស្រុកកំណើត ពោលគឺ ក្លិប Independiente ។

គួរឲ្យដឹងថា Independiente គឺជាក្រុមដំបូងគេ ដែលកីឡាករ Aguero បានចាប់ផ្តើមអាជីពរបស់ខ្លួន មុនពេលចូលរួមជាមួយក្លិប Atletico Madrid ក្នុងឆ្នាំ ២០០៦។

Aguero បានថ្លែងប្រាប់សារព័ត៌មាន Fox Sports ថា៖

«កិច្ចសន្យារបស់ខ្ញុំជាមួយក្រុម Manchester City នឹងផុតកំណត់នៅឆ្នាំ ២០២០ បន្ទាប់មកខ្ញុំនឹងត្រលប់ទៅក្លិប Independiente ដែលជាផ្ទះរបស់ខ្ញុំវិញ» ៕