រាជធានីភ្នំពេញ ៖ រថយន្តដឹកឥដ្ឋពេញចំណុះ២តោនកន្លះមួយគ្រឿង បើកបរដោយបុរសម្នាក់ឈ្ងោកយកដែកកេសអុជបារីជក់ បានរេចង្កូតជ្រុលទៅបុករះក្បាលនាគថ្មពុះចែកទ្រូងផ្លូវយ៉ាងពេញទំហឹង បណ្ដាលឲ្យរងការខូចខាត៤កង់ ។ ហេតុការណ៍នេះកើតឡើងកាលពីវេលាម៉ោង១០និង១៥នាទីព្រឹក ថ្ងៃទី២៤ ខែមីនា ឆ្នាំ២០១៨ ស្ថិតតាមបណ្ដោយផ្លូវលេខ៥ ក្រុម១៤ ភូមិផ្សារតូច សង្កាត់១ ខណ្ឌឫស្សិកែវ ។
រថយន្តបង្កម៉ាកគារ ចំណុះ២តោនកន្លះ ពណ៌ស ពាក់ផ្លាកលេខ ភ្នំពេញ ៣D-១២៤៨ រងការខូចខាតមួយកំណាត់មុខ ។ ឬឯអ្នកបើក និងកម្មករលើកឥដ្ឋ២នាក់ទៀតដែលជិះក្នុងកាប៊ិនរថយន្តជាមួយនោះ មិនត្រូវបានគេស្គាល់អត្តសញ្ញាណនោះទេ (រងរបួសស្រាល) ក្រោយកើតហេតុរត់គេចខ្លួនបាត់អស់ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេឃើញបុរសម្នាក់ និងកម្មករ២នាក់ទៀត អង្គុយក្នុងកាប៊ិនបើករថយន្តបង្កមួយគ្រឿង ចំណុះ២តោនកន្លះដឹកឥដ្ឋពេញចេញឃុំព្រែកតាម៉ាស្រុកខ្សាច់កណ្ដាល ខេត្តកណ្តាល ដើម្បីដឹកយកឥដ្ឋទៅដាក់ឲ្យម៉ូយនៅក្នុងរាជធានីភ្នំពេញ ធ្វើដំណើរតាមផ្លូវលេខ៥ ក្នុងទិសដៅពីជើងទៅត្បូងក្នុងល្បឿនលឿនគួរសំលុះមកដល់ចំណុចកើតហេតុខាងលើ ជាកន្លែងចំហផ្លូវឆ្លងកាត់អ្នកបើកបរបានឈ្ងោកឲ្យយកដែកកេះដើម្បីអុជបារីជក់ហើយក៏បានបានរេចង្កូតជ្រុលទៅបុករះក្បាលនាគថ្មពុះចែកទ្រូងផ្លូវ បណ្ដាលឲ្យវៀច២កង់ហើយរថយន្តបង្កនៅល្បឿនទៅមុខទៀតជ្រុលទៅបុកក្បាលនាគថ្មពុះចែកទ្រូងផ្លូវម្ខាងទៀតយ៉ាងពេញទំហឹង បណ្តាលឲ្យបាក់២កង់ទៀតទៅមុខលែងរួច តែសំណាងល្អអ្នកបើក និងកម្មករ២នាក់រងរបួសស្រាលក្រោយកើតហេតុ នាំបាត់អស់បន្សល់រថយន្តនៅកន្លែងកើតហេតុ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុបានទំនាក់ទំនងទៅសមត្ថកិច្ចជំនាញចុះមកវាស់វែងមកស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាទៅតាមផ្លូវច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
