រាជធានីភ្នំពេញ ៖ នគរបាលការិយាល័យចរាចរណ៍ផ្លូវគោករាជធានីភ្នំពេញ កាលពីរសៀលថ្ងៃទី២១ មីនា បានបញ្ជូននារីម្នាក់ដែលបើករថយន្តម៉ាកព្រូសបុករ៉ឺម៉កកង់បីឥណ្ឌា (ឡាំប្រឺតា) បណ្តាលឱ្យស្ត្រីជាតារា ចម្រៀងចង្វាក់រ៉ុកម្នាក់ស្លាប់ ទៅកាន់សាលាដំបូងរាជធានីភ្នំពេញ ។ សមត្ថកិច្ចឲ្យដឹងថា ការបញ្ជូនអ្នកបើកបរ ដែលបង្កឱ្យតារាចម្រៀងស្លាប់នេះ គ្រាន់តែជាការបំពេញនីតិវិធីប៉ុណ្ណោះ ដើម្បីកំុឲ្យលើសពេលវេលានៃការឃាត់ខ្លួន ។ ក្រោយពេលបញ្ជូនទៅដល់សាលាដំបូង បានត្រឹមថតរូបទុកជាឯកសារ និងប្រគល់សំណុំរឿងដាក់ឲ្យរដ្ឋបាល តែមិនទាន់បានចាត់ទៅព្រះរាជអាជ្ញារងរូបណាសាកសួរនៅឡើយទេ ។ លុះបន្ទាប់ពីមន្ត្រីតុលាការថតរូបហើយ នារីជាជនបង្កត្រូវបានសមត្ថកិច្ចនាំទៅវិញ ។
នៅព្រឹកថ្ងៃទី២២ ខែមីនា សំណុំរឿងនេះ ត្រូវបានចាត់បញ្ជូនទៅលោក ខាំ សុផារី ព្រះអាជ្ញារងនៃអយ្យការអមសាលាដំបូងរាជធានីភ្នំពេញ ដើម្បីសាកសួួរ ហើយរហូតដល់រសៀលថ្ងៃដដែលនោះ នៅមិនទាន់ចប់ទេ និងអាចផ្ញើទៅសមត្ថកិច្ចម្តងទៀត ដោយទុកពេលឲ្យជួបចរចាជាមួយភាគីជនរងគ្រោះរឿងសំណងរដ្ឋប្បវេណីសិន មុនចោទប្រកាន់លើបណ្តឹងអាជ្ញា ។ សមត្ថកិច្ចឲ្យដឹងថា តំណាងអយ្យការបានពន្យារពេលសួរចម្លើយ ដើម្បីរង់ចាំការដោះស្រាយជាមួយជនរងគ្រោះ ដែលកំពុងជាប់រវល់ធ្វើបុណ្យបូជាសព នៅមិនទាន់អាចនិយាយគ្នាបាន ។
នារីដែលបើករថយន្តបង្កឲ្យមានមនុស្សស្លាប់នេះឈ្មោះ ងួន ស្រីនិច អាយុ១៩ឆ្នាំ សព្វថ្ងៃនៅជួយលក់ដូរឪពុកម្តាយ ស្នាក់នៅក្នុងសង្កាត់ព្រៃស ខណ្ឌដង្កោ ។ ចំណែកស្ត្រីរងគ្រោះឈ្មោះ កាក់ ចន្ធី អាយុ៣៨ឆ្នាំ ជាអ្នកចម្រៀងរ៉ុកខេនរ៉ូល នៅហាងបារាំងមួយ ស្នាក់នៅម្ដុំផ្សារទួលទំពូង ខណ្ឌចំការមន ។ ករណីគ្រោះថ្នាក់ចរាចរណ៍នេះ ក៏មានជនរងគ្រោះជាជនជាតិបារាំងម្នាក់ដែរ និងកំពុងសង្គ្រោះនៅមន្ទីរពេទ្យកាល់ម៉ែត ។
គួររំឭកថា កាលពីវេលាម៉ោង១និង៤០នាទីរំលងអធ្រាត្រ ឈានចូលថ្ងៃទី២០ ខែមីនា មានហេតុការណ៍គ្រោះថ្នាក់មួយបានកើតឡើងដោយរថយន្តម៉ាកតូយ៉ូតាព្រូស ពណ៌កណ្ដុរល្មែះ មួយគ្រឿង គ្មានផ្លាកលេខ បុកជាមួយរ៉ឺម៉កកង់៣ឥណ្ឌា នៅស្តុបទន្លេបាសាក់ ដែលជាចំណុចប្រសព្វរវាងមហាវិថីម៉ៅសេទុងនិងផ្លូវលេខ១៦៣សង្កាត់ទួលទំពូងទី១ ខណ្ឌចំការមន ។ គ្រោះថ្នាក់នេះ បណ្តាលឱ្យស្ត្រីជាអ្នកចម្រៀងរូបនេះស្លាប់ក្នុងរ៉ឺម៉កម៉ូតូកង់បីនៅនឹងកន្លែងកើតហេតុ និងជនបរទេសម្នាក់ក៏រងរបួសធ្ងន់ដែរ និងបានដឹកទៅសង្គ្រោះបន្ទាន់នៅមន្ទីរពេទ្យកាល់ម៉ែត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
