រាជធានីភ្នំពេញ ៖ បុរសម្នាក់ឈ្លោះប្រកែកជាមួយប្រពន្ធបានរត់ទៅនៅផ្ទះម្តាយ ហើយចង.កនឹងបង្កាន់ដៃដែកលោតសម្លាប់ខ្លួនបង្កឲ្យមានការភ្ញាក់ផ្អើលកាលពីវេលាម៉ោង១២និង៥០នាទីរំលងអាធ្រាត្រឈានចូលថ្ងៃទី២០ ខែមីនា ឆ្នាំ២០១៨ ត្រង់ចំណុចខាងមុខផ្ទះ លេខ៣២៨ ជាប់ និងផ្ទះសំណាក់យីហោហ្គ្រីនផាក តាមបណ្តោយផ្លូវ២៧១ ក្រុមទី២ ភូមិទី៥ សង្កាត់ស្ទឹងមានជ័យទី២ ខណ្ឌមានជ័យ ។
បុរសខាងលើឈ្មោះ ម៉ម សុខសំណាង អាយុ៣៣ឆ្នាំ ជាសន្តិសុខនៅក្លឹបកម្សាន្ត
អេប៉ិច ស្នាក់នៅសង្កាត់ជើងឯក ខណ្ឌដង្កោ មានប្រពន្ធឈ្មោះ ប៉ាជាតិត្រា អាយុ២៨ឆ្នាំ ជាបុគ្គលិកក្រុមហ៊ុន ស្នាក់នៅជាមួយគ្នា និងមានកូនប្រុសចំនួនពីរនាក់ ។
បើតាមប្រភពព័ត៌មានពីសន្តិសុខដែលនៅយាមផ្ទះសំណាក់ខាងលើបានរៀបរាប់ប្រាប់ឲ្យដឹងថា កាលពីវេលាម៉ោង៩យប់ថ្ងៃកើតហេតុ គេឃើញបុរសរងគ្រោះខាងលើអង្គុយលេងតែម្នាក់ឯង នៅខាងមុខផ្ទះកើតហេតុក្បែរបង្កាន់ដៃផ្លូវចូលក្រោមផ្ទះ ។
បុរសម្នាក់ដែលត្រូវជាបងប្រុសបុរសចង.កសម្លាប់ខ្លួនបានរៀបរាប់ប្រាប់ឲ្យដឹងថា នៅមុនពេលកើតហេតុបុរសរងគ្រោះបានឈ្លោះប្រកែកជាមួយប្រពន្ធ តែមិនដឹងថា ឈ្លោះរឿងអ្វីនោះទេ ។ លុះដល់ព្រឹកថ្ងៃកើតហេតុបុរសរងគ្រោះចេញពីផ្ទះរបស់ខ្លួន ដែលនៅម្តុំជើងឯក មកផ្ទះកើតហេតុដែលជាផ្ទះម្តាយរបស់ខ្លួន ហើយបានទូរស័ព្ទទៅប្រាប់ប្រពន្ធរបស់ខ្លួនថា«អញលេបថ្នាំសម្លាប់ខ្លួនហើយ មើលថែកូនផង» ។ លុះដល់ល្ងាចថ្ងៃកើតហេតុប្រពន្ធរបស់បុរសរងគ្រោះបានជិះម៉ូតូមកផ្ទះកើតហេតុដែលជាផ្ទះម្តាយក្មេក ដើម្បីហៅប្តីត្រឡប់ទៅផ្ទះវិញ តែប្តីប្រកែកមិនព្រមត្រឡប់ទៅផ្ទះនៅឯជើងឯកជាមួយ នឹងប្រពន្ធនោះទេ ទោះជាប្រពន្ធអង្វរយ៉ាងណាក៏ដោយ ក្រោយមកនារីជាប្រពន្ធក៏បានត្រឡប់ទៅផ្ទះ ។
រហូតមកដល់ម៉ោង៩យប់ថ្ងៃកើតហេតុបុរសរងគ្រោះបានយកកៅអីទៅអង្គុយនៅកន្លែងកើតហេតុតែម្នាក់ឯង ពេលនោះម្តាយរបស់បុរសរងគ្រោះបានហៅចូលមកក្នុងផ្ទះ ដើម្បីបិទទ្វារដេក តែបុរសរងគ្រោះមិនព្រមចូលនោះទេដោយនិយាយថា « នៅអង្គុយលេងមួយភ្លែតសិន» ហើយពួកគាត់ក៏បាននាំគ្នាចូលទៅសម្រាកនៅខាងមុខផ្ទះអស់ទៅ ។ លុះដល់វេលាកើតហេតុក៏មានគេទៅប្រាប់ពួកគាត់ថា បុរសរងគ្រោះបានយកទុយោទឹកចង.កជាប់នឹងបង្កាន់ដៃផ្លូវចូល ទៅខាងក្រោមផ្ទះ ស្លាប់បាត់ទៅហើយ ។
ប្រពភដដែលបានបន្តថា កន្លងមកបុរសខាងលើតែងតែឈ្លោះប្រកែកជាមួយ និងប្រពន្ធជាញឹកញាប់ និងតែតែងមកសុំលុយម្តាយរបស់ខ្លួនរហូត ថែមទាំងធ្លាប់យកម៉ូតូរបស់បងប្អូនទៅបញ្ចាំអស់ចំនួន៥គ្រឿងមកហើយ ។
ក្រោយពេលកើតហេតុសមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញឲ្យចុះមកធ្វើកោសល្យវិច្ច័យទៅលើសពជនរងគ្រោះឃើញថា ពិតជាស្លាប់ដោយសារ តែការចង.កពិតប្រាកដមែន ។ បន្ទាប់មកសពបុរសរងគ្រោះត្រូវបានសមត្ថកិច្ចប្រគល់ទៅឲ្យសាច់ញាតិដឹកយកទៅតម្កល់នៅវត្តសន្សំកុសល ដើម្បីធ្វើបុណ្យទៅតាមប្រពៃណី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]