ម៉ាឡេស៊ី៖ Melaka គឺជាទីក្រុងទេសចរណ៍ដ៏ពេញនិយមមួយ ដែលស្ថិតនៅក្នុងរដ្ឋ Melaka ផ្ទាល់តែម្តង ហើយទីក្រុងនេះក៏ជាទីក្រុងប្រវត្តិសាស្ត្រដ៏ទាក់ទាញបំផុត ប្រចាំប្រទេសម៉ាឡេស៊ីផងដែរ។
ទីក្រុងដែលស្ថិតនៅភាគអាគ្នេយ៍ និងមានរយៈចម្ងាយ១៤៨គីឡូម៉ែត្រ ពីទីក្រុងកូឡាឡាំពួរនេះមានភាពទាក់ទាញខ្លាំង ដែលអ្នកមកកម្សាន្តទាំងអស់ អាចទស្សនាព្រះវិហារសាសនាគ្រីស្ទ រូបសំណាកនាវា សារមន្ទីរ ហើយក៏អាចឡើងទៅលើកំពូលភ្នំ ដើម្បីទស្សនាទេសភាពដ៏ស្រស់ស្អាតនៃទីក្រុងប្រវត្តិសាស្ត្រនេះផងដែរ។
លើសពីនេះ នៅពេលរាត្រី ទេសចរក៏អាចរីករាយកម្សាន្តតាមរយៈការជិះទូក មើលទេសភាព និងស្រូបខ្យល់អាកាសបរិសុទ្ធថែមទៀតផង។
កាន់តែពិសេស និងទាក់ទាញទេសចរខ្លាំងមិនធម្មតានោះ គឺរ៉ឺម៉កកង់បីម្យ៉ាង ដែលជាភាសាម៉ាឡេស៊ីហៅថា Beca។ ជាក់ស្តែង យានជំនិះនេះមានរូបរាង និងស្ថានភាពស្រដៀងនឹងស៊ីក្លូរបស់កម្ពុជាដែរ គ្រាន់តែ ស៊ីក្លូ មានអ្នកបើកបរនៅខាងក្រោយ ចំនែកឯ Beca របស់ម៉ាឡេស៊ី មានអ្នកបើកបរនៅចំហៀង។
មិនតែប៉ុណ្ណោះ Beca នេះ ត្រូវបានគេតុបតែងជាមួយរូបតុក្កតា ផ្កាភ្ញី ផ្សេងៗ និងប្លែកៗពីគ្នា ដែលទទួលបានការចាប់អារម្មណ៍ពីអ្នកដំណើរខ្លាំងមែនទែនតែម្តង។ លើសពីនេះ អ្នកជិះ Beca ក៏អាចស្តាប់ភ្លេងកន្ត្រាក់អារម្មណ៍ដែលចាក់ដោយម្ចាស់យានជំនិះនេះបណ្តើរ ហើយក៏អាចមើលទេសភាព និងទិដ្ឋភាពទីក្រុងនេះជាមួយគ្នាយ៉ាងរីករាយផងដែរ។
អ្នករកស៊ីបើក Beca មួយរូប បានប្រាប់មកកាន់ក្រុមការងារ ខ្មែរឡូត ថា៖
«សព្វថ្ងៃនៅទីក្រុងប្រវត្តិសាស្ត្រនេះ មានទេសចរមកទស្សនាច្រើនគួរសមដែរ ហើយពួកគេចាប់អារម្មណ៍ជាមួយ Beca នេះខ្លាំងមែនទែន។ សម្រាប់តម្លៃនៃការធ្វើដំណើរជាមួយ Beca នេះវិញ គឺ ២៥RM (ប្រហែល ៦.៣៩ ដុល្លារអាមេរិក) សម្រាប់ការធ្វើដំណើរមួយជុំទីក្រុង ឬ ៥០RM (ប្រហែល ១៤.៧៨ ដុល្លារអាមេរិក) សម្រាប់រយៈពេលមួយម៉ោង។»
គួរបញ្ជាក់ថា ទីក្រុង Melaka ត្រូវបានដាក់បញ្ជូលជាតំបន់បេតិកភណ្ឌពិភពលោក ដោយអង្គការយូនីស្កូ តាំងពីឆ្នាំ ២០០៨មកម្ល៉េះ ហើយទីក្រុងប្រវត្តិសាស្ត្រនេះ ក៏កំពុងតែទទួលបានការគាំទ្រខ្លាំងពីសំណាក់ទេសចរជាតិ និងអន្តរជាតិផងដែរ។
សម្រាប់ជម្រើសនៃការហោះហើរទៅកាន់ប្រទេសម៉ាឡេស៊ីវិញ លោកអ្នកអាចធ្វើដំណើរក្នុងតម្លៃសមរម្យ តាមរយៈក្រុមហ៊ុនអាកាសរណ៍ AirAsia។ ព័ត៌មានបន្ថែមពី AirAsia សូមចូលទៅកាន់គេហទំព័រ www.airasia.com៕
សូមទស្សនារូបភាពខ្លះៗនៅក្នុងទីក្រុងMelaka និង រ៉ឺម៉ក Beca តាមរយៈរូបភាពខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]