តារាចម្រៀងធ្លាប់សាងកេរ្តិ៍ឈ្មោះល្បីតាមរយៈបទ “ទូរស័ព្ទប្រាប់ផង” លោក សាន ផានិត ពេលនេះបានចូលគ្រប់គ្រងផលិតកម្មKHហើយ ក្រោយពីបាត់មុខមួយរយៈធំនៅក្នុងសង្វៀនសិល្បៈ។
លោក សាន ផានិត បានប្រាប់ថា “ខ្ញុំបានចូលមកគ្រប់គ្រងផលិតកម្មKH ជាងពីរសប្ដាហ៍កន្លងមកហើយ ដោយខាងម្ចាស់ផលិតកម្ម បានទាក់ទងខ្ញុំឲ្យចូលគ្រប់គ្រង ដើម្បីធ្វើយ៉ាងណាពង្រឹងផលិតកម្មឲ្យល្បីដូចមុនវិញ”។ លោកធ្លាប់បានបង្កើតស្នាដៃមុនគេឲ្យផលិតកម្មKH មានឈ្មោះបោះសំឡេងនៅក្នុងសិល្បៈ ហើយក៏ជាតារាចម្រៀងបានបង្កើតចម្រៀងPopមុនគេនៅក្នុងប្រទេស កម្ពុជា ក្នុងផលិតកម្មនេះ នាឆ្នាំ ១៩៩៨ ហើយការបង្កើតនេះទទួលបានការគាំទ្រច្រើនពីទស្សនិកជន។
តារាដែលចូលចិត្តលេងស្ទិលម៉ូដសក់រូបនេះបានបន្តទៀតថា លោក ចូលមកគ្រប់គ្រងផលិតកម្មKH ក្នុងគោលបំណងពង្រឹងគុណភាពផលិតកម្មទាំងមូលឲ្យមានជំហរឡើងវិញ ទាំងអ្នកចម្រៀង និង គុណភាពបទចម្រៀង។
ទោះជាយ៉ាងណាក៏ដោយ អ្នកចម្រៀងមានដើមកំណើតមកពីខេត្តបាត់ដំបងរូបនេះបញ្ជាក់ថា ការចូលមកគ្រប់គ្រងនេះ មិនមានបំណងចង់ប្រកួតប្រជែងជាមួយផលិតកម្មណាមួយឡើង គឺគ្រាន់មកជួយពង្រឹងផលិតកម្មឡើងវិញ ដោយសារតែបច្ចុប្បន្នផលិតកម្មមិនសូវមានការគាំទ្រពីទស្សនិកជន ម្យ៉ាងទៀតបទចម្រៀងក៏មិនអាចប្រកួតប្រជែងនៅលើទីផ្សារបាន។
លោក សាន ផានិត មានជំនឿថា ការមកគ្រប់គ្រងផលិតកម្មនេះនឹងទទួលបានការគាំទ្រច្រើនពីទស្សនិកជនឡើងវិញ ដោយលោកមានគោលការណ៍ថ្មីផ្ដោតទៅលើអ្នកចម្រៀង និងគុណភាពបទច្រៀង។
តារាចម្រៀងមានវ័យ៣៩ឆ្នាំរូបនេះ បានប្រាប់ទៀតថា ពេលនេះលោកកំពុងជ្រើសរើសតារាចម្រៀងថ្មី៦រូបថែមតទៀត ដើម្បីមកពង្រឹងផលិតកម្ម។ ម្យ៉ាងទៀតពេលនេះលោក កំពុងនិពន្ធបទចម្រៀងបានខ្លះៗ ដើម្បីដាក់ឲ្យតារាចម្រៀងថ្មីច្រៀង។
បើទោះជាក្លាយទៅជាអ្នកគ្រប់គ្រងនៅក្នុងផលិតកម្មKH យ៉ាងណាក៏ដោយ សាន ផានិត បញ្ជាក់ថាលោកនៅតែច្រៀងដដែលមិនបានបោះបង់អាជីពជាអ្នកចម្រៀងចោលឡើយ។ លោកថា “ប្រសិនណាបើមានពេល ខ្ញុំអាចចេញមួយទៅពីរបទជាមួយតារាចម្រៀងឯទៀតក្នុងផលិតកម្ម ដើម្បីធ្វើឲ្យផលិតកម្មកាន់តែទទួលបានការគាំទ្របន្ថែមទៀត។ ខ្ញុំគិតថាបទចម្រៀងដែលខ្ញុំបាននិពន្ធរួចរាល់ និងត្រៀមចេញនេះនឹងអាចទាក់ទាញការគាំទ្របានច្រើន”។
លោក គីម ហេង ចាងហ្វាងផលិតកម្មKH បានឲ្យដឹងថា លោកពិតជាបានប្រគល់សិទ្ធិឲ្យ សាន ផានិត ធ្វើជាអ្នកគ្រប់គ្រងទូទៅនៅក្នុងផលិតកម្មKH ពិតប្រាកដមែន។
ចាងហ្វាងផលិតកម្មរូបនេះបន្តថា “មូលហេតុដែលខ្ញុំសម្រេចចិត្តជ្រើសរើសយក សាន ផានិត មកគ្រប់គ្រងផលិតកម្ម ដោយសារខ្ញុំមានកិច្ចការរវល់ច្រើន។ ម្យ៉ាងទៀតខ្ញុំគិតថា គេជាតារាចម្រៀងម្នាក់ធ្លាប់ទទួលបានជោគជ័យខ្លាំងកាលពីអតីតកាល ហើយក៏ធ្លាប់មានបទពិសោធន៍ខាងគ្រប់គ្រងផលិតកម្មទៀត”។ លោកបានបន្ថែមថា ផលិតកម្មរបស់លោកនឹងសាងកេរ្តិ៍ឈ្មោះនៅក្នុងពិភពសិល្បៈបានឡើងវិញ ពេលមានអ្នកគ្រប់គ្រងថ្មី ដែលមានសមត្ថភាព និងបទពិសោធន៍ច្រើននៅក្នុងសិល្បៈ។
សាន ផានិត បានចុះកុងត្រាមួយឆ្នាំ ជាមួយផលិតកម្មKH ក្នុងការដឹងនាំផលិតកម្ម ទាំងការគ្រប់គ្រងតារាថ្មីៗ និងការនិពន្ធបទចម្រៀង ដើម្បីធ្វើយ៉ាងណាឲ្យផលិតកម្មទាំងមូលរលូនទៅមុខ។
ទោះជាយ៉ាងណាក៏ដោយ ចាងហ្វាងរូបនេះបញ្ជាក់ថា ចំពោះការចូលមកគ្រប់គ្រងរបស់ សាន ផានិត លោកមិនបានបិទសិទ្ធិមិនឲ្យច្រៀងនោះទេ គឺនៅតែឲ្យបន្តច្រៀងដដែលគ្រាន់តែមិនច្រើន។ “សាន ផានិត ចូលមកKH នេះ គឺ៩០ភាគរយធ្វើជាអ្នកគ្រប់គ្រងទៅលើតួថ្មី ទាំងការដឹកនាំសម្ដែង ការនិពន្ធ និងសកម្មភាពផ្សេងទៀត ហើយ១០ភាគរយគឺអាចច្រៀងជាមួយនឹងតារាថ្មីនានាបាន”។
សាន ផានិត ធ្លាប់ចាប់ដៃជាមួយផលិតកម្មKH រយៈពេល៣ឆ្នាំ ពោលគឺកំឡុងឆ្នាំ ១៩៩៨-២០០១ ដោយបានបង្កើតស្នាដៃជាច្រើនធ្វើឲ្យផលិតកម្មទទួលបានការគាំទ្រពីទស្សនិកជន ក៏ដូចជាមិត្តយុវវ័យ។ ក្រៅពីចូលមកគ្រប់គ្រងនៅKH លោកក៏មានការងារគ្រប់គ្រងមួយទៀតនៅក្នុងក្លិប ៣៣៣ នៅខេត្តព្រះសីហនុ។ លោក សាន ផានិត ក៏ត្រៀមចេញអាល់ប៊ុមពិសេសរបស់ខ្លួនមួយទៀតគឺ អាល់ប៊ុមជាភាសាអង់គ្លេស ក្នុងពេលឆាប់ៗខាងមុខនេះ៕
ដកស្រង់ពីគេហរទំព័រ សប្បាយ
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]