ក្រុងប៉ោយប៉ែត ៖ នារីបម្រើការនៅកាស៊ីណូរូបស្រស់ដូចទេពអប្សរតែចិត្តមិនល្អដូចរូប ព្រោះតែស្រែកឃ្លានប្រាក់សុខចិត្តយកកេរ្តិ៍ ឈ្មោះកិត្តិយសគ្រួសារទៅជាន់ឈ្លីលេងជាល្បែង ហើយរត់ចោលកន្លែងធ្វើការ បន្ទាប់ពីបោកប្រាស់លុយពីជនជាតិចិនម្នាក់ចំនួន៨.០០០ ពាន់ដុល្លារអាមេរិក ។
បុរសរងគ្រោះដោយសារចាញ់បោកនាងស្រីល្អឈ្មោះ ZHONG CHENG អាយុ៤៨ឆ្នាំ ជាភ្ញៀវទេសចរ ជនជាតិចិន កាន់លិខិតឆ្លងដែនលេខG50089843 បានរៀបរាប់តាមរយៈអ្នកបកប្រែថា គាត់ជាភ្ញៀវទេសចរចូលទស្សនាក្នុងស្រុកខ្មែរ និងបានចាប់ចិត្តប្រតិព័ទ្ធនារីធ្វើការនៅកាស៊ីណូម្នាក់ នៅប៉ោយប៉ែត ឈ្មោះហៃ ចន្ទ្រា អាយុ២៤ឆ្នាំ មានស្រុកកំណើតនៅក្នុងភូមិពង្រ ឃុំពង្រ ស្រុកឆ្លូង ខេត្តក្រចេះ។ បុរសដដែលបន្តទៀតថា គាត់ជាបុរសពោះម៉ាយមានប្រពន្ធម្តងហើយ ប៉ុន្តែគ្មានកូនហើយចង់បានកូនបន្តពូជពង្សវង្សត្រកូល។ ស្របពេលដែលឃើញនាងហៃ ចន្ទ្រា មានរូបសម្រស់ស្រស់ស្អាតផងនោះ គាត់ក៏នាំចៅមហាឲ្យចូលស្តីដណ្តឹងនាងតាមប្រពៃណី។ ខណៈនោះភាគីខាងស្រីបានបង្គាប់ថ្លៃទឹកដោះចំនួន៨.០០០ពាន់ដុល្លារ លោកក៏បានព្រមព្រៀងភ្ជាប់ពាក្យដោយកក់ប្រាក់មុនចំនួន២.៥០០ដុល្លារ នៅឯស្រុកកំណើតរបស់នាងខេត្តក្រចេះ។ ក្រោយពីភ្ជាប់ពាក្យរួចហើយលោកគេងគិតមមៃក្នុងចិត្តឥតឧបមាសប្បាយ ពេកក្រៃស្រមៃថា បានថ្នាក់ថ្នមបីបមប្រលែងនារីខ្មែរដ៏ស្រស់ក្មេងខ្ចីវ័យ២៤ឆ្នាំម្នាក់ នេះ ប៉ុន្តែក្តីស្រម៉ៃបែរក្លាយជាខកបំណងទៅវិញ ព្រោះតែនាងរូបល្អចិត្តដូចកាកីបោកប្រាស់លុយរបស់លោកអស់៨.០០០ ពាន់ដុល្លារ ហើយរត់តាមប្រុសសហាយបាត់ស្រមោល។
អ្នកបកប្រែភាសារចិនឈ្មោះសុភាបានឲ្យដឹងថា ដោយសារតែបុរសជនជាតិចិននោះបាក់ចិត្តស្រឡាញ់នាងហៃ ចន្ទ្រា ងប់ពេក ហើយចង់បបួលនាងទៅដើរលេងនៅខេត្តព្រះសីហនុ តែនាងមិនព្រមលុះត្រាតែឲ្យលុយនាងគ្រប់ចំនួន៨.០០០ពាន់ដុល្លារ ទើបនាងព្រមទៅដើរលេងជាមួយ។ ដោយហេតុតែជឿជាក់លើនាងពេកគាត់ក៏ប្រគល់លុយជូននាង៥.៥០០ ដុល្លារ ថែមទៀត។
ក្រោយពីបានលុយហើយស្រ្តីរូបនោះបាន គេចខ្លួនបាត់ស្រមោលទៅជាមួយប្រុសក្មេងទុកឱ្យបុរសចិនអភ័ព្វអង្គុយយំទឹក ភ្នែកជូតក្បាលជង្គង់ ហើយរត់ទៅប្តឹងសមត្ថកិច្ចកងរាជអាវុធហត្ថក្រុងប៉ោយប៉ែតឲ្យជួយរកយុត្តិ ធម៌ផង៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]