អេស្ប៉ាញ: បន្ទាប់ពីសាងសង់ទឹកដីថ្មីរបស់ខ្លួនរួច ក្លិប Athletico Madrid បានចាប់ផ្តើមលក់កីឡាករខ្លះដើម្បីពង្រឹងផ្នែកសេដ្ឋកិច្ចក្លិប។ ប៉ុន្តែព័ត៌មាននៃការលក់កីឡាករឈុតធំពីរនាក់កាលពីយប់មិញបានធ្វើឲ្យអ្នកតាមដានបាល់ទាត់ខ្លះភ្ញាក់ផ្អើលមែនទែន។
កីឡាករសញ្ជាតិប៊ែលស្ស៊ិក Yannick Carrasco និងកីឡាករសញ្ជាតិអាហ្សង់ទីន Nicolas Gaitan បានត្រូវក្រុម Athletico Madrid លក់ទៅឲ្យក្លិបក្របខណ្ឌកំពូលនៅចិន Dalian Yifang បាត់ហើយ។ តាមប្រភពមួយចំនួនបានឲ្យដឹងថា Athletico Madrid បានចំណូលពីការលក់កីឡាករពីរនាក់នេះប្រហែលជា ៤៨ លានអ៊ឺរ៉ូ (ស្មើនឹងជាង ៥៩លានដុល្លារអាមេរិក)។
ការផ្លាស់ប្តូរក្លិបរបស់កីឡាករទាំងពីរនាក់នេះបានធ្វើឲ្យអ្នកតាមដានបាល់ទាត់បើកភ្នែកធំៗ ជាពិសេសគឺកីឡាករ Yannick Carrasco ព្រោះគាត់ទើបតែមានវ័យ២៤ឆ្នាំប៉ុណ្ណោះ ហើយបន្ថែមលើនេះទៀត គាត់ក៏ជាកីឡាករដ៏សំខាន់ម្នាក់ដែលជួយឲ្យ Athletico Madrid បានទៅលេងនៅវគ្គផ្តាច់ព្រ័ត្តក្នុងព្រឹត្តិការណ៍ UEFA Champions League ក្នុងឆ្នាំ២០១៦ ទៀតផង។
ការផ្លាស់ប្តូរក្លិបរបស់កីឡាករទាំងពីរនេះធ្វើឲ្យអ្នកគាំទ្រក្លិបដទៃប៉ុន្មានក្រុមអាក់អន់ស្រពន់ចិត្តតិចតួចដែរ ដោយកាលពីទីផ្សាដោះដូរកីឡាករខែមករាកន្លងទៅ ក្លិបកាំភ្លើងធំ Arsenal និង តោខៀវ Chelsea បានបង្ហាញនូវចំណាប់អារម្មណ៍នាំយកខ្សែបម្រើស្លាបស្តាំ Yannick Carrasco មកក្រុមរបស់ខ្លួន ចំណែកឯកីឡាករ Nicolas Gaitan ក៏ទទួលការចាប់អារម្មណ៍ពីក្លិបមាន់ខ្នាយមាស Tottenham និងក្លិបអ្នកមាននៅក្របខណ្ឌកំពូលរបស់រុស្ស៊ី Zenit St. Peterburg ផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]